ISAIAH 16 - Cho Bible Common Language 2016

Ang Ngaih u ka, Moab khaw

¹ Khong gau khaw Sela mang gaw ung om ciah Moab chang gui naw Jerusalem uktu am htome hta tumat m’cümhnak ci gui.

² Ngami cu tuinu Arnon ah akem ung om ne ami ngäng yah ung, ami ng’bu ung ka k’tän gui ah kha gui ah mäih ah akholä ah lula ci gui.

³ Ngami naw Judah chang gui ami pyen nak gui cu, “A i bi vai cu na m’thein gui vä. Hnüüp lung kholing ung gei khai ah hnim ciah sing ghing ah mäih ah keimi cu na shungvong gui vä, nami ng’hnim ung na ng’düm sak gui vä, Keimi cu chang geinvai gui nei; a u naw kä ana hmuh nak gui vai ung na thup gui vä.

⁴ Nami khaw ung na om tu sak gui vä. Keimi na m’di gui hlük ciah kut ung na shung vong gui vä.” (Shedam nak la m’dishum nak cu ng’pyi ci, khopäng m’cin ciah chang gui maih ci gui nei.

⁵ Cun kawn ah David ah hta ng’shon ungka tumat cu ghangpughang ah kya lawk khai, ani naw chang gui cu bekhüt nak la m’hni nak awn uk gui khai. Ani naw hman cicu ang ghit ah bik khai nei, ani naw taga ciah bi cu teng khai nei.)

⁶ Judah chang gui naw pyen u ne, “Moab chang gui a i hlawk ah chang ah ami ng’shei cu mikmi naw mi ng’yak ci nei. Ngami cu m’ghämee, chang k’om u sei mi hmat gui ci, cun ung phi ngami ah khähghah nak cu akholä ah kyak ci.”

⁷ Moab chang gui cu khüikha nak ung ami yaica ah phäh ah thüikyap khai gui. Ngami naw Kir Heres mang gaw ung ami ei man ah ei k’ni ami shüm law ba ung, ngami cu ami van kyap khai gui. Ngami cu ang ngaih u ka ah kyak khai gui.

⁸ Heshbon pei ah ami lo gui la Sibmah sapyitlo gui cu m’di ci gui — Cun ah sapyitlo ung sapyit tui naw chang pakhui uktu gui cu awktat sak gui man ci. Ayanä läi ung sapyitshun cu Jazer mang gaw ung gawk ne, ak kyang täng ah kiangkhi ung gawk ci, ak khei täng ah Tuisi Tuinu ah vangtäng kem ung khüt ci.

⁹ Tuhbäi kei cu, Jazer ah phüh ah ka thüi kyah ah mäih ah Sibmah ah sapyit ah phäh ah ka thüi kyap ci nei. Kei ah ka ng’phlitui cu Heshbon la Ekaleh ah phäh ah kya lawk ci nei. A i ah kyasei ci ung, acun ung chang gui yei sak khai ah khäm tawng vai a i kä om ci nei.

¹⁰ Ang lei k’ni kho ung a u phi tuhbäi kä yeikyai ci nei. Sapyitlo ung a u phi kä kääi ci, kä ngäi ci nei. Sapyit tui vai ah sapyit theih neen ci phi a u kä om ci nei; yeikyai ne m’lau nak cu ng’pyi ci nei.

¹¹ Kei cu Moab ah phäh thüi ne ka ngüük ci nei, Kira Heres ah phäh ah ka thüi ci nei.

¹² Moab chang gui cu ami sui kheei sei, ami khomhtung agup gui ah hteit u ne, ami Taigüim gui ah taigü vai ah hteit cigui, cun ung phi acun naw kä akni ah kyak sak gui khai.

¹³ Cun cu Moab ah amawng Bawipa naw ng’dawt ne a pyen ah ng’thu ah kyak ci.

¹⁴ Tuhbäi Bawipa naw pyen ci, “Kum thum ah akyong ung Moab ah büh-mang nak gui cu maih khai nei. A ni ah ak chang akda ungka, apihta bäng k’pawih ba khai, cun gui cu ami k’tha ken khai.