ISAIAH 15 - Cho Bible Common Language 2016

Khanpughi naw Moab M’di khai

¹ Shinah ng’thuwmoab ah mawng ah kya ci. Ara la kira mang gaw cu mü ät ung m’di u sei Moab khaw cu ding kyip ci.

² Dibon chang gui cu agup ah pei ah kyap khai gui ah khawgui ah hang kai ci gui. Moab chang gui cu Nebo la Medeba mang gaw gui ah phah ah thüi aih u neta; ami lumu k’tei u ne m’khamu cu m’sei ci gui.

³ Lan yung ung chang gui au thüisui sui u ne; mang gaw ng’lung gui la um m’cung gui ung chang gui cu thüi ne kyap ci gui.

⁴ Heshbon la Elealeh chang gui cu kyap m’lau ci gui, ami kyah cu Jahaz güt ah ka naw ng’yak ci ci gui. Gakap gui phi kyik ci gui, ami m’gäi nak maih yawp ci.

⁵ Kei ah kamlung cu Moab ah phäh ah kyap ci nei! Chang gui cu Zoara gawnu la Eklath Shelishiyah ung gawk ne dawng ci gui. Amshah ui luhith lam ung kai ci gui, ami hteh yah pum kyap ci gui; amshah cu m’lau ne kyap ne, Hero naim ah phyawng ne gawk ci gui.

⁶ Nimrim tuilawng cu ket ci, a pei yun ah khumghaw gui cu chawng yawp ci, a i phi khu ching kä om ba ci.

⁷ Chang gui cu Willows Khongnawi kan ne hteit ci gui, ami khawcham avan awn phyawn vai ah tha nak ci gui.

⁸ Moab ah khawgui pang ung kyah m’lau ah k’aw cu ng’zak nei. Cun cu Eklaim la Beerelim gawnu gui ungka naw phi ng’yak nei.

⁹ Dibon gawnu ung tuinu cu si bäng ah sen ci nei, Khanpughi naw cun ung om ciah chang gui ah hmawk ah akshek pi khawh cu m’cun pe gui ci nei. Moab ung om ba ciah chang nü cu si long ciah ngawn shep nak om khai nei.