ISAIAH 14 - Cho Bible Common Language 2016Omktu Khaw ah ka Law ba ci gui 1 Bawipa naw a chang Israel gui cu m’gein ba gui mä ne, amät ah chang ah ghü ba gui ci. Aui naw ami mät ah khaw ung om ba sat gui mä khai, akhawhei chang gui cu a cu ah law u ne ngami awn atäng ah om khai gui. 2 Bawipa naw a pek nak gui ah khaw ah Israel chang gui ami hteh ba vai ah chang pak hui akda naw m’hteihtang gui khai gui, acu ah chang pakhui gui cu Israel gui ah chang shäm ah kyak khai gui. Israel gui näng gui min ciah chang gui cu Israel gui naw näng ba gui khai gui, ngami yawshe na man ciah chang gui cu Israel gui naw ukgui khai gui. Sihnak ah Khaw ung Babilonia Ghangpughang 3 Bawipa naw Israel chang gui cu ami m’neh m’awh nak la ami yaica nak, ling ne bi ami sak nak gui ung ka zu chang gui khai. 4 Cun ah ani naw abi law ung, ngami naw Babilonia ghang pughang cu m’kpse une ami pyen cu: “A i ghämce ciah ghangpughang cu kyu ng’tääk pyi ci nei! Ani naw a u kä shedam na ba khai nei! 5 Akshe ah uk ci gui ah huham cu Bawipa naw ng’pyi sak pyi ci nei, 6 Cun gui naw chang gui cu m’lungshe ne shadam na u ne, ngami naw ami khäm ah pakhui gui cu kä ng’düm ne kdukdein nak ci gui nei. 7 Tuhbäi ak huu ah khondek khan avan cu yeikyai düm ne dimdeeih ci nei, chang päing naw yeikyai ne ng’äi m’cu ci nei 8 He sing gui la lebanon ung ceda sing gui cu kyu ng’täale ciah ghangpughang ah khan ah zeikian ci gui nei, a i ah kyasei ci ung, tuhbäi ani cu ng’pyi ciah kya ne, ngami chudeng gui khai a u kä om ba ci nei! 9 Sihnak ah khaw naw Babilonia ghangpughang cu don ge khai ah om ci. M’dek khan ung hnham mah man ci gui ah ami mümcha gui cu hnün tho ci gui. Ghangpughang gui ah ami mümcha gui cu hnün tho ci gui. Ghangpughang gui ah ami micha gui cu, ami mang kaing ung ka naw tho lawk ci gui. 10 Ngami ami van naw ani cu khü ci gui. Thubäi nang cu keimi ah mäih ah na k’tha ken ci nei! Nang cu keimi ung ka turnat ah nakiak ci nei! 11 Nang cu tingtäng tum ne m’hlüngtai nak na gah man ci, cun ung phi tuhbäi, shin ung sihnak ah khaw ung na om ci nei. Nang cu m’kyitzawp ah ih khan ah ng’zän ne, cakaw ah kyak ciah yih na khuih ci nei! 12 Babilonia ghangpughang khang ciah thaihke aisi, nang cu khan khaw ah ka na kya kyum ci nei! Acau läi nang naw chang pakhui gui na näng man ci, cun ung phi tuhbäi m’dek ung ning yuk ghawt ci gui nei. 13 Nang naw khankhaw ah hang kai ne, akhlüng pikbäih ah aisi gui ah khan ah na mangkiang k’süm vai ah nakbäi te ci. Khan pughi gui ah ami ng’bum nak a siiptäng khomhtung ung ghangpughang ah mäih ah ngoh vai ah nang naw na ngai te ci. 14 Nang cu khaw ng’mei gui ah apam ah hang kai ne, m’gäi ciah kyak vai ah na pyen te ci. 15 Cun ung phi cun nak vaisü ung, nang cu sihnak ah khaw akthuk nakpi ung nang cu ning law püi ci gui nei. 16 “Aksi gui naw cäi ne ning teng khai gui. Ngami naw ng’shik khai gui, shin ah chang cu khomdek thüng ne, uknak khaw gui thüng sak ciah kä kya ne ang? 17 Mang gaw gui m’di ne, khaw cu khaw ng’gau ah ng’lat. Sak ciah chang ah kä kya ne ang? Thawng kium ci gui kä m’hlawt ba gui phung ne, ami im ah kä hteh ba sak gui ciah chang ah kä kya ne ang? 18 M’dek khan ung ghangpughang gui ami van cu ami ng’phuh hmun ung ng’zän ci gui nei, 19 cun ung phi nang ah phuh hmun kä om ci, nang ah gook cu thu ne piawn khai ah ghawt ci gui nei. Cun cu ng’tuk nak ung sik ci gui ah gakap gui ah pumsa gui awn lin u ne, cun gui awn atäng lung khui ung yuk cha u ne, kai nak ci gui nei. 20 A i ah kyasei ci ung nang naw na khaw m’di ne, namätah chang na ngawn ci, nang cu a hei ghangpughang gui ah mäih ah kä ning phuh vai. Na kyong chang she gui tumat phi kä k’pawih khai. 21 Ngawn sih nak tuhbäi ng’tün sä! Ami pupa gui ah shekat ah phäh ah shin ah ghangpughang ah hta gui si u sä. A u naw phi khomdek kä uk khai gui, mang gaw kä uk khai gui. Khanpughi naw Babilon M’di khai 22 M’gäi ciah Bawipa naw a pyen cu, “Kei naw Babilon cu tu ne ka m’di khai. A u phi kä ka k’pawih nak khai — a u ak hmaw, a u phi kä k’pawih khai. Kei, Bawipa naw thu ka pyen ci nei. 23 Kei naw Babilon cu cüihnai ah ka lat khan, a cun ung pangpät gui om khai gui. Kei naw Babilon cu phaipheh awn ka pheik khai, cun naw avan phai yawp khai. Kei, m’gäi ciah Bawipa naw thu kä pyen nei.” Khanpughi naw Assyrian gui cu M’di gui khai 24 M’gäi ciah Bawipa naw thu khän ne a pyen cu, “Kei naw ka k’bäi cu kya tuk cang khai. Kei naw bi vai ah ka pyen cun phi bi vai. 25 Kei naw ka khaw Israel ung Assirian gui cu ka m’di gui khai, ka khomhtung gui ah khan ah ngamicu ka kai na gui khai. Kei naw ka chang gui cu phuih gih ah kyak ciah Assirian la phuih la phuih gih gui ung ka, ka k’phiawn gui khai. 26 Shin cu m’dek khan ah phäh ah ka m’hnüt bäi nei, chang pakhui gui m’kyuk nak vai ah kei naw ka kut ka shäng ci nei.” 27 M’gäi ciah Bawipa naw shin ah bi vai ah k’bäi ci nei; ani naw m’kyuk nak vai ah a kut cu shäng ci nei. A u naw phi kä ng’düm hlawt khai. Khanpughi naw Philistin gui cu M’di gui khai. 28 Shin cu Ghangpughang Ahaz asih kum ung ami ng’shäu ah ng’thu ah kyak ci. 29 Philistia chang gui. Nangmi ning thah nak gui ah htung cu hnget pyi ci nei, cun ung phi nami yeikyai nak vai kä om ci nei. K’phyu tumat a sih ung, cun ah hnün ung nget pi ci gawk law ba ci. K’phyu ah m’tui ung ka k’phyu k’cung kheh ci nei. 30 Bawipa cu dukhaih ciah a chang gui ah htoshäm ah kyak khai nei, ani naw phyawng m’hteim sei om sak gui khai. Cun ung phi ani naw nangmi philistin gui ah khan ah kyih kyawk vai ah kho zaw un tüi lawk khai nei, a cun naw nangmi api phi kä ning k’pawih na gui khai. 31 Philistin mang gaw gui avan, ning m’hteihtang gui khai, kyap ne khü vä! Nami van kyikyawk vä! Khameiah thawk ciah m’vut cu a siiptäng ah ka lawk ci nei — Cun cu chang kyi kä ng’caw ciah gakap ma ät ah kyak ci nei. 32 Philistia ah ung ka mikmi ah law ba ciah ng’shä chang gui cu a i hawkcha ah mi shang gui khai aw! Mik mi naw mi m’thein gui vai cu, Bawipa naw Zion cu m’düih pyi ci nei, ani ah yaica ciah achang gui cu a cu ah phyawng gai u sei hmuh gui vai. |
Cho Bible Common Language © Bible Society of Myanmar, 2016.
Bible Society of Myanmar