ISAIAH 11 - Cho Bible Common Language 2016

Dimdeeih ciah Uknak Khaw

¹ David ah uknak cu chuk pit ah sing ghing ah mäih ah kyak ci; cun ung phi sing hmui lim ne akthai ah a toi law ba ah mäih ah, David ah hta ng’shon ung ka, ghangpughang akthai tho law bakhai.

² Bawipa ah mümcha naw aniam cüivai nak pek khai, Ak chang gui a uknak vai ah hmuhmat nak la m’khütnäng nak cu pek khai. Ani naw Bawipa ah ang yak hlü cu hmat ne, ani cu kyih aa khai;

³ Ani ngaih nak awn yeikyai nak gah khai. Ani naw a hmuh düt ang yak düt awn kä m’khoi m’cha khai.

⁴ Ani naw dukhaih ci gui cu nik khai ah m’khoi m’cha gui ne. Am gein kaa gui cu shungvong gui khai. Ani naw ang thukhäm awn chang gui cu m’kyuk gui khai, changshe gui cu sik khai gui.

⁵ Ani naw a chang gui cu taga nak la dung nak awn uk gui khai.

⁶ Hnei gui la htome gui cu dimdeeih sei atäng ah om khai gui, kawnghta gui awn atäing ah ng’baw khai gui. Seihta gui la phongkawng hta gui cu a täng ah vuh khai gui, cun gui cu ak hmaw hta hta gui naw shäm gui khai gui.

⁷ Seipat gui la khawm gui cu atäng ah ei ei khai gui, ami hta nau gui cu dimdeeih sei ng’baw ghawm khai gui. Phongkawng gui naw sei ah mäih ah khu ei khai gui.

⁸ A hmowhta cu phyu m’äm mah ah pei ah a gü ung phi, Phyu naw kä k’dawk khai.

⁹ Zion ah khan, khanpughi ah m’htung theing ung, nat nak la akshe a i pi kä om khai. Tuinu cu tui awn abe ah mäih ah khaw cu Bawipa ah hmuh hmat nak awn be khai.

Omktu ghang gui Law ba khai gui.

¹⁰ David ah uknak ng’shon ungka, pakhui gui m’hnüt nak vai ah ghangpughang akthai cu ani ah uknak mang gaw ung ng’bum u neta, ani cu m’tamkhah khai gui.

¹¹ Cun ah hnüüp a gawk law ung, Bawipa naw a huham cu mang ba mä ne, Assiria la Egypt ung ami nawng shüt gui ah a chang gui cu law püi ba gui khai, Pathros khaw, Sudan khaw, Elam khaw, Babilonia khaw la Hamath khaw la tuiyung khaw gui la tuinu ah khawtang khaw gui ung om shüt ci gui ah kyak ci.

¹² Püipyang ciah Israel la Judah chang gui, khomdek khan khawkit phli ung ka, a law püi ba gui, atäng ah akbum ba gui amdang nak ah, Bawipa naw m’hnüt nak alan cu m’tho khai nei.

¹³ Israel uknak khaw cu Judah khaw ah khan ah vamneng nak kä om ba khai, Judah cu Israel ah ga ah kä kya ba khai.

¹⁴ Ngami naw atäng ah akhei tang ung Philistin gui cu tu gui u ne, ak kyang tang ung om ciah chang gui cu guttep gui khai gui, Ngami naw Edom la Moab chang gui cu tu ne naing khai gui, Ammon chang gui naw ngami cu läk gui khai gui.

¹⁵ Bawipa naw Suez tuikhep cu ket sak ne, ani naw khaw aling ah khi sak ne Euphratis tuinu ket sak khai, tukhta lawng chih bang on ba sei, cahngpäng naw kat hlawt khai.

¹⁶ Assiria ah akping ung tamu om kahi, cun cu a cu ah k’pawih ci gui ah a chang gui, Israel ah phäh ah kiah ci cun cu ngami naw Egypt khaw ami hteh tak yah ung ami pupa gni ah hmawk ah mäih ah kyak ci.