ISAIAH 10 - Cho Bible Common Language 2016

¹ Nami khaw mü ci nei! Nangmi naw kä taga ciah thukhän nami pyang ci, a cun naw ka chang gui shedam nak ci.

² Shin cu dukhaih ci gui naw ami chaw kä ami gah vai la taga nak kä ami gah vai ah nami shung nak ah kya ci.

³ Khanpughi naw aning m’kyuk law gui ung a i ah nami kyak khai ang? Ani naw a khawshou ah ka leigai gui nami khan ah a law püi ung a i ah nami kyak khai ang? M’hteihtang nak hmuh vai ah a hawi nami dawng khai ang? Nami khawh cham gui a hawi nami thup khai ang?

⁴ Nangmi cu ng’tuk nak ung ning ngawn gui khai gui, käcung thawngkyum ah pha ne ning kaih gui khai gui. Cun ung phi Bawipa m’lungshe nak cu kä ng’pyi khai, ani naw a kut cu m’kyuk nak vai ah shäng lä khai.

Assiria Ghangpughang Khanpughi naw a Htungmang ah Mawng

⁵ Bawipa naw, “Assiria gui! Kei naw Assiria gui cu, kei naw ka m’lungshe nak gui m’kyuk nak gui vai ah thah htung ah ka mang gui ci nei.

⁶ Kei naw Assiria gui cu, Khanpughi ka om ciah pakhui, kei na m’lungshe sak ciah chang gui tu gui khai ah ka tüi gui ci nei. Kei naw ngami ah ka tüih gui cu guttep ne, m’gu ne, lam ung m’vut ah mäih ah chang gui kai na gui khai ah kyak ci nei.”

⁷ Cun ung phi Assirian ghangpughang ung ak ghat ah bi vai ah am lung kyong ung a pawng püi om tu hnga ci. Ani naw chang pakhui akda m’di vai ah k’bäi pyi ci.

⁸ Ani naw khähghah ne, “Kei ah ka gabawi päng cu ghangpughang ah kyak ci nei!

⁹ Kei naw Kalno la Karchemish mang gaw gui, Hamath la Arpad mang gaw gui, ka näng ci nei. Kei naw Samaria la Damaskas cu ka näng ci nei.

¹⁰ Cun ah uknak khaw gui m’kyuk vai ah kei naw ka kut ka shäng ci nei, ngami naw agup khawihnah ci gui, cun ah agup gui cu Jerusalem la Samaria ungka ah ta da pi ci gui nei.

¹¹ Kei naw Samaria la ani ah a gup gui avan cu ka m’di ci nei, kei naw Jerusalem ah acun ung ami khawihnah gui ah a gup gui ah khan ung phi acun ah ka bik khai nei” cik ci.

¹² Cun ung phi Bawipa naw a pyen cu, “Kei naw Zion M’htung la Jerusalem ah khan ah ka bi cu ang pyi ah a kyak ung, kei naw Assiria ghangpughang cu a khähghah nak avan la chang ah ang shei nak avan ah phäh ah ka m’kyuk khai nei” cik ci.

¹³ Assiria ghangpughang naw khähghah ne a pyen cu, “Shin gui avan cu ka mät naw ka ci nei. Kei cu ka gaigawng ci, ka cüivai ci, ka lunglang ci. Kei naw chang pakhui gui ah ng’lak ung khawgi gui cu phye ne, ami gim ah eiawk gui cu ka lak ci nei. A cun ung om ciah chang gui ah khan ah kei naw vantang ah mäih ah ka kai na gui ci nei.

¹⁴ Chang pakhui gui ah khaw cu kha gui ah ng’bu ah mäih ah kyak ci. Kei naw kha m’tui ka mäih ah ngami ah khawh cu a yäi hta ah ka lak ci nei. Ai ng’phia naw phi hnün ne kä na m’kyih ci, a i m’gawng naw phi aang ne kä na m’kyih ci.

¹⁵ Cun ung phi Bawipa naw, “Ghei cu, acun bik ci chang ah ta dämduh pi ciah pyen hning vai ang? Ng’hlawh cicu m’hlawh ciah chang ah mä küikyang tuba ne ang? Ng’kii naw chang kä k’pang ci, chang naw ng’kii k’pang ci nei.”

¹⁶ M’gäi ciah Bawipa naw tuhbäi phü khai ah ami m’bei gui ah khan ah m’kyuk nak vai ah gawpai nak gui tüi lawk ge khai nei. Ami pumsa kyong ah mei naw ui ne ui gui khai nei.

¹⁷ Khanpughi, Israel gui ah akdei cu mei ah kya lawk khai nei. Israel gui ah theingcim ciah Khanpughi cu mei m’lei ah kya lawk khai nei. A cun naw hnüüp ät bäng ung ng’hlingcam la hling gui mah mah ah apäng cu ui yawp khai.

¹⁸ Bäimang ciah khaw bung gui la laima gui cu avan di yawp khai, a cun ah mäih ah sih nak hning ah gaw nak naw chang gui cu m’di khai.

¹⁹ Sing ghing apihta bäng om ba khai, cun cu ak hmawhta naw phi khei hning khai.

Chang Api Bäng Law Ba Khai

²⁰ K’pawih ba ciah Israel chang gui naw, ngami m’di gui ciah chang pakhui gui kä ami yii hnei nak ba vai ah a khin gawk law ci nei. Bawipa, Israel gui ah theingciim ciah Khanpughi cu akcang ah yum ne ngaih u khai gui nei.

²¹ Israel chang gui apihta bäng cu m’gäi ciah ami Khanpughi ah law ba khai gui nei.

²² Cun ung phi tuhbäi, Israel chang gui cu tuinu kem ah laigin ah mäih ah da ci gui nei, cun ungka apihta bäng nei law ba khai, Dishum nak cu chang gui ah phäh ah m’küm ci nei, cun cu akbe tucang ah kyak ci nei.

²³ Ä, khaw avan ung uk ciah, m’gäi ciah Bawipa naw, a pyen ah mäih ah dishum nak cu law püi khai nei.

Assiria cu Bawipa naw M’kyuk khai

²⁴ Uktu Bawipa m’gäi ci naw Zion ung om ciah a chang am a pyen nak cu, “Egypt chang gui ah mäih ah kya ne ami ning yoshe nak gui ung phi, Assirian gui cu kä nami kyih en gui vai.

²⁵ Nangmi ka ning m’kyuk nak gui ang pyi hta vai am, kei naw ngami cu ka m’di gui khai.

²⁶ Kei, m’gäi ciah Bawipa naw, Oreb Lungnu ung Midian gui ka m’ghuih gui ah mäih ah kei naw ka htung awn ka m’ghuih gui khai, Kei naw Egypt ka m’kyuk ah mäih ah Assiria cu ka m’kyuk khai.

²⁷ Cun ah khin a gawk law ung, kei naw nangmi cu Assiria ah huham ungka, ka ning m’hlawt gui khai, ngami ah phuih gih cu nangmi ah phleing ung kä ng’taih ba khai.”

Ng’tukbi naw Atuk Abi law ah Mawng

²⁸ Ga ah gakap gui naw Ai mang gaw cu tu ne khäm ci gui! Ngami naw Migron gawnu cu kan lawk ci gui! Ngami naw ami sho ei cu Michmash ung nawng shüt ci gui!

²⁹ Ngami cu k’hteng kau law une, Keba ung mü ip ci gui! Ramah gawnu ung om ciah chang gui cu kyih aih ci gui, Gangpughang Saul ah gawnu Kibeah ung om ciah chang gui cu a hei ah dawng ci gui.

³⁰ Kallim chang gui m’lau vä! Laishah chang gui ngai vä! Anathoh chang gui naw m’shang vä!

³¹ Madmenah la Kebim ung om ciah chang gui cu ami ghin vai ah dawng ci gui.

³² Tuhngawi ga gui cu Nob gawnu ung om ci gui. A cun ung ngami naw Zion M’htung, Jerusalem mang gaw ung ami kut m’hnüm ne k’thüng ci gui.

³³ M’gäi ciah Bawipa naw ngami cu sing ghing ungka sing ban tupit ne chuk ah mäih ah ci hlit gui khai. Chang k’om pikbäih ci la hlüngtai pikbäih ci gui cu tupit ne yuk chah gui khai.

³⁴ Bung puk ung sing ghing gui ghei awn chuk pit ah mäih ah, akni pi ah Lebanon sing gui ami kyuk ah mäih ah, Bawipa naw chu pit gui khai!