ISAIAH 1 - Cho Bible Common Language 2016

¹ Shin ah ca-uk ung Judah la Jerusalem ah mawng Khanpughi naw Amoz ah hta Isaiah am ng’thu am than cu guk ah kyak ci, cun cu Judah ghangpughang Uzziah, Jotham, Ahaz la Hezekiah gui ah khin ah kyak ci.

Khanpughi naw Achang gui Angceet ah M’cäi gui ci

² Bawipa naw, “Khomdek la khomik, kei naw ka pyen law vai cu ngai vä! Kei naw ka m’ghin gui ah ak hmaw gui naw na hnu ng’tuk püi ci gui nei.

³ Seipat gui naw a u naw aka nak gui cu hmat ci gui, ng’sela gui naw ami mah naw a vuh gui mawng hmat ci gui. Cun gui cu ka chang Israel gui ah ta hmat pi ci gui nei. Ngami cu a i phi kä hmat ling ci gui” cik ci.

⁴ Nangmi nami hmüp ci, nangmi cu cheishoh ciah pakhui, Nangmi m’shetkat ne shekak ciah chang! Nami hmakat nak naw ning kaih tawn gui ci nei! Nangmi naw Bawipa, Israel gui ah theingcim ciah Khanpughi cu hnu na u ne, ani cu nami ng’hlah tak ci.

⁵ A i ah kyasei nangmi naw nami hnu ng’tuk püi lä ang? Nangmi naw m’kyuk nak nami ng’ya ba hlü mä ne ma? Israel gui, nami lu cu hmaleim bäng ah kyak ci, nami m’lung la ngaih cu gaw pai pyi ci nei.

⁶ Lu nug ka naw khaw ung khüt khai ah pumsa avan kä a ng’gai nak kä om ci nei. Nangmi cu leim ni, hmaleim ui, ak hma kauh ni bäng ah nami kyak ci vei. Nami leim gui cu kä m’si pha, kä hlawp pha, kä m’tui pha nei.

⁷ Nami khawpäng cu m’dimshum u ne, nami mang gaw gui cu m’dek ah khüt khai ah m’khih ci gui nei. Nami hmuh ge aha akhaw hei Chang gui naw nami khaw la u ne, avan hteh püi ne m’di ci gui nei.

⁸ Ami kai ah mang gaw Jerusalem bäng k’pawih ba ci — ani cu ngäng ci yä om ciah ah sapyit la k’pyu ah mäih ah kyak ci, pacüh lo ung phung ah mäih ah kyak ci.

⁹ M’gäi ciah Bawipa naw chang amshah kä ak pawih nak vai sü ung, Sodom la komorrah ah mäih ah Jerusalem cu avan ah m’di khai süte.

¹⁰ Jerusalem aw, na uktu gui la nak chaung gui cu, Sodom la Komorrah ah mäih ah kyak ci gui nei. Bawipa naw nangmi ah khan ah a i a pyen cu ngai vä. Mi khaupughi naw aning m’thei gui cu ngaih nah vä.

¹¹ Ani naw, “Nangmi naw k’pang ne kei am nami douthak al khawihnah nak a vim cu kei naw ka ng’ya hlük ciah nami ngai ne ma? M’khih ne nami khawihuah nak ah htome la nami setme akni pi gui ah thau vata, bä pi ci kei ung om ci nei. Vantang gui, htome gui la me ah si gui cu kei naw kabawung na pyi cinei.

¹² Kei nami na khawihnah khai ah nami law yah ung, shin gui avan nami law püi vai ah a u naw ang aning k’thäh gui? Kei ah pum im ung tut aat ne nami kyak vai ah a u naw ang aning k’thäh gui?

¹³ Deuthak nak nami law püi cu a khaw lä nei. Nangmi naw nami m’khih ah ang ui aha khu cu kei naw ka m’shem shai ci nei. Nami chathai pawi, kyinnak hnüüp la yum nak nami ng’bum nak ung kei kä ka om hning kahi; cun gui avan ca nami katuak naw m’di yawp ci.

¹⁴ Kei naw nami Cha thai pawi gui la hnüüp theing gui cu ka thüi nak ci nei; Cun gui cu kei naw kä ka phuih ba hlü ah phuih ah kyak ci nei.

¹⁵ “Nangmi naw taigü nak ung nami kut nami shäng ung, Kei nan kä ka ning teng gui khai nei. A i Chü ah nangmi nami taigü ung phi kei naw kä ka ngai khai nei, a i ah kyasei ci ung nami kut cu si naw k’plüm ci nei.

¹⁶ Nami mät naw nami mät htaih khai ah m’si vä kei naw ka ning hmuh gui ah nami bi ah akshe avan cu düm sak vä. Ä, akshe bi cu ng’düm sak ne.

¹⁷ Ak ni bi vai ah ng’thei vä. Taga ciah bi cu nami teng vai — ami shedam nak cu nami m’hteihtang vai, hmei hta guiam ak chaw nami pek vai, hmeinu gui nami shungvong vai.”

¹⁸ Bawipa naw pyen ci, “Tuhbäi amawng ama mi pyen khai. Nangmi cu katuak ah sisen nawn nami ng’hläuk ci, cung ung phi khüi bawk vaisü ah theing kiah khai ah ka ning m’si gui khai. Nangmi cu lelawinak awn sisen ah nami kiakung phi. Htawmu ah mäih ah nami bawk khai nei.

¹⁹ Nangmi naw kei bäng nami na ngaih ah a kyak ung, khaw ung m’thawk ciah akni gui cu nami ei khai nei.

²⁰ Cun ung phi kei nami na lan ah akyak ung, nami khawmü sei nami sik khai. Kei, Bawipa naw ka pyen nei.”

Shekak ciah Mang gaw

²¹ Bekhüt mante ciah mang gaw u chaung pletah mäih ah kyak ci nei! Chang düng gui ah be nak man ung tuhbäi Chang ngawn ci gui bäng ah kyak ci nei.

²² Jerusalem, nang cu ngui ah mäih ah na kya man ci cun ung phi tuhbäi a khaw lä ah na kyak ci; nang cu sapyit tui k’ni ah na kya mante ci. Cun ung phi tuhbäi tui düt ah na kyak ci.

²³ Nami vgvai gui cu hnu ng’tuk ciah kya u ne, m’guk ei ah teihpüi ah kyak ci gui; ngami naw m’cümhnah nak la ng’mü khawk cu angtäi sei dou ci gui. Ngami naw yung aha m’kawt ung hmei hta cu kä shungvong ci gui, hmei nu ah mawngma phi kä m’khoi m’cha pek ci gui.

²⁴ Cun ah kya tuhbäi, m’gai ciah Bawipa, huham mah ciah Israel khanpughi ah a pyen cu ngai vä: “Nangmi ah khan ah phu ka tuk khai nei, ka ga gui ta nangmi naw, kei a i ah kä nami na ci tuba hlawt khai.

²⁵ Nangmi ah khan ah hnu ng’tuk ne bi ka bik khai. M’si ng’eek ngeet ah mäih ah kaning ngeet gui khai, kä nami theingthap nak avan ka nawt heng yawp khai.

²⁶ A can ka ah mäih ah kei naw uktu gui la ng’cäi ä ci gui cu ka ning pe gui khai. Cun kawn ah Jerusalem cu düng ciah bekhüt ciah mang gaw ah khü vai.”

²⁷ A i ah kyasei ci ung Bawipa cu düng ci, Jerusalem la a cun ung om ciah ng’zuba ciah chaung päng cu ani naw hun khai.

²⁸ Cun ung phi shekak ci la ani hnu ng’tuk püi ciah chang phung cu ani naw güüt khai. Ani nawng ciah chaung päng cu, ani naw ngawn khai.

²⁹ Nangmi cu sing ging gui nami khawihnah ah phäh la khawihnah nak vai ah dum gui nami geitkaw ah phäh ah nami thüisei khai.

³⁰ Nangmi cu si law hlük ciah oak sing ghing ah mäih, a u naw tui awn kä a shawi ah dum ah mäih ah nami ng’zai khai.

³¹ Khuchawng cu mei m’ghi naw a uih ah mäih ah, huham mah aih ciah chang cu amät ah amshe nak naw m’di khai, cun ah m’dimshum nak cu a u naw kä ng’düm sak htawt khai.