HOSEA 8 - Cho Bible Common Language 2016

Israel gui agup ami khawihnah ah phäh ah Bawipa naw M’kyuk gui ci

¹ Bawipa naw pyen ci, “Phyung puuk tum vä! Ga gui naw hmu ah mäih ah kei ah khaw cu m’tawn lawk ci gui nei. Ka chang gui naw ngami awn ka bi thukhän cu m’shet u ne, Kei ah m’theithang cu hnungtuk ci gui nei.

² Cun ung phi ngami naw kei cu ami na Khanpughi ah na khü u na, Ngami cu kei ah ka chang gui ah pyen u ne, kei cu na hmat ci gui.

³ Akni cu ngami naw hnungtuk ci gui nei, Cun ah kyasei ngami cu ga gui naw k’täm gui ci gui.

⁴ “Ka chang gui naw ghangpughang cu ghü ci gui, Cun ung phi cun ah khan ah ami mät ah ng’yak hlü ah bik ci gui. Ngami naw ami ng’vai gui cu m’düih ci gui, Cun ung phi kei ah yum nak kä om ci. Ngami naw ami ngui, ami ghui la ne agup gui pyang ci gui — cun cu ami mät ah di nak vai ah kyak ci.

⁵ Samaria mang gaw ung chang gui naw ami khawihnah ah ghui vantang gup cu kei naw ka thüi nak ci. Ngami ah khan ah kei cu ka m’lungshe aih ci, Ngami naw agup ami khawihnah nak cu a i khäta nawng khai gui ang?

⁶ Israel gui m’si shep ci gui naw agup gui pyang ci gui. Cun ung phi cun cu khanpughi ah kä kyak ci. Samaria ung ami khawihnah ah ghui vantang cu akhui ak pi ah kyak khai nei.

⁷ Ngami cu khokhi phu u ne kuiphak khäm ba khai gui nei. Lai ung htang kä a hmin ung ai m’htut phi kä pyan hlawt vai. Cun ung a hmin ung phi akhohei chang gui naw ei yawp khai gui.

⁸ Israel cun phi ahei pakhui awn täng ci. K’am payak ciah mäih ah akholä awn täng ci.

⁹ Ng’sela ah mäih ah ami m’lung ling ci. Israel chang gui cu ami mät ah lam ung hteit ci gui. Ngami naw Assiria ah hteit ne ami m’htei gui vai ah ng’shui ci gui. Ngami shungvong gui khai ah ahei pakhui gui cu ngui pe ne ghüh ci gui.

¹⁰ Cun ung phi tuhbäi kei naw hteit ne k’bum gui ne ka m’kyuk gui khai. Kä shou pha sei ngami cu Assiria uktu bawi ah shedam nak gah lawk khai gui. Ngami cu ng’hleei lawk khai gui.

¹¹ “Israel chang gui naw kat nak nawt heng nak vai ahsonkyang co law pi pi u sei, kat nak ami bi nak ah hmun da law pi pi ci.

¹² Kei naw chang gui ah phäh ah kä kheitai vai ahm’theithang nak cu ka guk ci. Cun ung phi ngami naw akhaw hei, akahnga cine hnungtuk ci gui.

¹³ Ngami naw khawihnah nak cu na douthak u ne, Khawihnah nak ah asa cu ei ci gui. Cun ung phi kei Bawipa naw kä ka yei na gui ci. Tuhbäi ngami ah kat nak cu shüm pe gui ne, acun ah phä ah ka m’kyuk gui khai. Kei naw Egypt khaw ah ka tüi ba gui khai.

¹⁴ “Israel chang gui naw mang im gui co ci gui, cun ung phi ami mät tüi pyang gui cicu m’hnih ci gui. Judah chang gui naw vongpaang mang im co ci gui. Cun ung phi kei naw mei ka chah lawk khai, cun naw ami mang im gui la mang gaw gui cu ui yawp khai.”