HOSEA 7 - Cho Bible Common Language 2016

¹ “Kei naw ka chang Israel gui ka gai sak hlü gui laka bühmang ba sak hlü gui päng ung kei naw ami cheishoh nak la akshe ami gui avan ka hmuk ci. Ngami cu tumat la tumat ng’hleeihlak tuk ci gui. Ngami im gäi ne lut ne m’guk ci gui. Ngami naw lam ung chang guttep ci gui.

² Kei naw ngami am shet nak avan ka shüm hmat ciah ngami naw kä hmat ci gui. Cun ung phi ami kat nak naw koi gui sei, kei naw k hmuh ah kä ka om hlawt ci.”

Mang im kyong ah Ng’tuk ah nak

³ Bawipa naw pyen ci, “Chang gui naw akshe ah om u ne ghangpughang la bawi gui cu m’hleei gui ci gui.

⁴ Ngami ami van cu beit kä ng’yak ci, kä bekhüt ciah kyak ci gui. Ngami ah thüigen nak cu meibum ung mei, m’htut ng’shai nak vai kä kia pha sei, kä ng’ai pha veih ciah mäih ah kyak ci gui.

⁵ Ghangpughang ah pawi hnüüp ung ngami naw ghangpughang la bawi gui cu sapyit tui tu ne awktat sak u ne gu sak gui ci gui.

⁶ Ä, ngami naw uih sak ci gui. Meibum ung mei ah mäih ah ami m’lung so awn amü pum ung ngami ah m’lungshe nak cu ngän ngän ah ui ci. Khongawi hta ung cun cu ui ne däi lawk ci.

⁷ “Ami m’lungshe nak ng’ling law aih sei, ngami naw ami uktu gui cu, ngawn gui ci gui. Ami ghangpughang gui cu tumat kawn ah tumat ngawn ci gui. Cun ung phi a u naw phi m’hteihtang vai ah kei ah kä taigü lawk ci.”

Israel la Ahei pakhui gui

⁸ Bawipa naw pyen ci, “Israel chang gui cu ateih hmin ciah m’htut awn täng ci gui. Ngami naw ami pei ah pakhui gui ngaih u ci gui.

⁹ Akhui hei chang gui ami ngaih u nak naw ami thagui aguh tep gui cu ngami naw kä hmat ci gui. Ami hnüüp cu khei ci gui, cun ung phi ngami naw kä hmat ci gui.

¹⁰ Israel chang gui ah chang ah ami ng’shei nak awn gami cu m’lau ne hnungtuk püi gui ci. Ngami ung shin gui nü kia law sei phi ngami cu ami Khanpughi Bawipa kei ah kä ng’hlat law ba ci gui.

¹¹ Israel chang gui cu a i ah kä mawng ciah mümkha ah mäih ah kyak ci gui. Akhtük bäih ah a chang gui naw m’htei gui khai ah Egypt cu khü ci gui. Cun kawn ah Assiria ah dawng ci gui.

¹² Cun ung phi kei naw ng’vai phiaat ne ami heth nak päng ah kha ah mäih ahka pha gui khai.

¹³ “Ngami cu ng’yiin ci gui. Kei cu na hteh ta u ne na hnungtuk püi ci gui. Ngami cu m’di gui vai. Kei naw ka hun gui hlük ci, cun ung phi ngami naw kei ami na khawihnah cu chei ci.

¹⁴ Ngami naw m’lung üp nak awn kei ah taigü ci gui, cun ung phi ami mät kyu u ne kä yum ci gui ah mäih ah m’lau ng’pyang ci gui. Ngami naw htang la sapyit tui ah phäh ah ami taigü ung kä yum ci gui ah mäih ah ami mät naw am mät nat sak ci gui. Ngami cu a i hlawk ah ng’küknet ci gui ang?

¹⁵ Kei cu ngami law püi ba gui ne thagui be sak ciah kya pang ä sei phi kei na hnungtuk püi ci gui nei.

¹⁶ Ngami naw kei na ng’hla ta u ne, a huam kä om ciah khanpughi ah hteit ci gui. Ngami cu ng’koi ciah lihtung ah mäih ah kä ngaih gep vai ah kyak ci gui. A i ah kyasei ci ung ami ng’vai gui cu m’ghämce ne ng’htau ci gui. Ngami cu ng’sai ung sik khai gui, Egypt gui naw gaih tu gui khai gui.”