HOSEA 4 - Cho Bible Common Language 2016

Bawipa naw Israel gui Hnungtuk ne K’bün gui ci

¹ Bawipa naw cun ah khaw ung om ciah chang gui cu hnungtuk ne k’bün gui ci, Israel gui ngai vä, ani naw a pyen cu, “Shin ah khaw ung bekhüt nak la m’hni nak kä om ba ci, chang gui naw kei cu Khanpughi ah kä na ngai ba ci gui.

² Ngami naw shaitak u ne, acun gui cu m’shet yawp ci gui, Ngami cu hleei ci gui, chang ngawn ci gui, m’guk ci gui, pletbeng ci gui, shetkat nak cu da law pi ne, chang ngawn law pi pi ci gui.

³ Cun ah kyasei shin ah khaw cu chawng yawp khai, ghing om ci nü si yawp khai. Khisa avan kha gui la nga gui phi si yawp khai gui.”

Bawipa naw Taigü gui cu K’bün gui ci

⁴ Bawipa naw pyen ci, “A u naw phi chang gui cu kä phuih bun en gui u sä — Taigü gui, kei naw ka ning hnungtuk püi gui vai om ci nei,

⁵ A mü a hnüüp nami cheishoh ci, prophet gui phi a cun ah kyak ci gui, Kei naw ami nu Israel cu ka m’di lawk khai nei.

⁶ Kei ah ka chang gui cu ng’yiin ci gui. A i ah kyasei ci ung ngami naw kei cu a i ah kü na ngai ci gui. Nami taigü gui naw kei ami na shüm vai ah na ngai ci gui, kei ah m’theithang cu hnungtuk ci gui, acun ah kya sei, kei naw ning hnungtuk gui ne, nami hta gui cu ka taigü gui ah kä ka ngai gui khai.

⁷ “Nangmi taigü gui da law pi u ne, kei na kat na ne hnungtuk ci da law pi ci.

⁸ Kei ah ka chang gui ah shetkat nak awn nangmi nami bühmang lawk ci. Cun ah kyasei nangmi naw nami shetkat law pi vai nami ng’ya hlük ci.

⁹ Nangmi phi chang gui ah mäih ah m’kyuk nak ung nami yaica khai. Kei naw ning m’kyuk gui ne kat nak nami bi nami thung vai ah ka ning ci gui khai.

¹⁰ Nangmi naw khawihnah nak ung nami chaw cu nami ei khai, cun ung phi nami cawi lä khai. Nangmi naw ng’shonbang nak ah khanpughi gui nami khawihnah khai, Cun ung phi kä nami hta nau khai. A i ah kyasei ci ung nangmi naw kei na ng’hlah ta u ne, ahei khanpughi gui nami läk ci.”

Khogam Khawihnah nak cu Bawipa naw Shedam nak ci

¹¹ Bawipa naw pyen ci, “Yu phyim la yu k’thai ami awk naw kei ah ka chang gui ah cüivai nak cu gut gui ci nei!

¹² Ngami naw na lam ah mawng sing k’pi ng’shik ci gui. Ngami naw ami hmat hlü cu htung phe naw m’thein gui ci. Ngami naw kei na hteh tak ci gui. Pawmyau ciah hnumi ah mäih ah ngami naw ahei khanpughi am ami mät cu ap ci gui.

¹³ M’htung lai ah atheing nak ah hmun gui ung, khawihnah nak douthak u ne, khomhtung gui ung sing ghing ang shäi gui, akdäm gui ang hnim nik ci gui ah kaa ah ngami naw tui ng’ui m’khih ci gui. Ai ah kyasei ci ung ang hnim gui cu yei nak vai kyak ci. “Ak hnu ah nami hta hnumi gui naw, pawmyau ciah bii bi u ne, nami hta gui ah chu gui cu pletbeng ci gui.

¹⁴ Cun ung phi cun ah phäh ah kei naw kä ka m’kyuk gui ci. A i ah kyasei ci ung nangmi nami mät cu ngami awn atäng ah pawmyau nak Taigüim ah hteit u ne, khogam khawihnah nak cu atäng ah nami douthak ci. Thu thuuk naw a pyen cu, ‘Cüivainak kä om ciah chang gui cu dishum khai gui.’

¹⁵ “Nangmi Israel chang gui cu kei ung kä nami bekhüt pang ung phi, Judah gui naw cun ah mäih ah cheishoh nak kä bi en u sä. Kikal la Bethaven ung kä khawihnah en u sä. Cun ung ghing ciah Khanpughi ah ming awn shaitak kä bi en vä.

¹⁶ Israel chang gui cu pat m’la ah mäih ah lingkeng ci gui nei. Kei naw a i hawk cha ah htome hta gui ah mäih ah kho k’pu ung ka m’bei gui hlawt khai aw?

¹⁷ Israel chang gui cu agup mang nak ah kaa ung om pyi ci gui. Ami hteh nak hlü ah lam ung hteit tei u sä.

¹⁸ Ngami cu yu akdäm aw u neta pawmyau ciah hnumi awn hlimtui ci gui. M’tam khah nak vai ah ta thüi sei nak cu m’hni pi ci gui.

¹⁹ Ngami cu khokhi ah yon ah mäih ah kyak khai gui, khogam ami khawihnah ah phäh ah thui ng’aa khai gui.