HOSEA 14 - Cho Bible Common Language 2016

Israel gui Hosea naw am cäi nak gui

¹ Israel chang gui, Bawipa, nami Khanpughi ah ng’hlat ba vä, Nami katnak naw ning vawn sak gui ne ning kyuk sak gui ci nei.

² Bawipa ah ng’hlat ba vä, shin ah taigü nak cu ani am nai douthak ah ky a sä. “Kami kat nak avan na m’geinsei gui ne, kami taigü na dou pe gui ä, Keimi naw kami shaitak ah mäih ah kami ning m’hlüngtai khai nei.

³ Assiria naw kä na hun gui hning ci. Ng’tuk ciah ng’se gui naw kä na shungvong gui hning ci. Keimi naw kami pyan ah agup gui am kami Khanpughi ah kä kami pyen ba khai. O Bawipa ami ng’hlah shi vai kä om ci gui ah khan ah na chimgein nak m’dang ä.”

Israel gui ah phäh Bawipa ah shaitak

⁴ Bawipa naw pyen ci, “Ka chang gui cu kei ah ka law ba sak gui khai. Ka m’lungkyong avan awn ka m’hni gui khai. Kä ka m’lungshe na ba gui khai.

⁵ Kei cu Israel gui ah khan ah khong gau khaw ung khaw a aa ah mäih ah ka kyak khai. Ngami cu cheipai ah mäih ah pai khai gui. Ngami cu lebanon sing ah mäih ah khäng sei ng’yung khai gui.

⁶ Ngami cu akthai ah tho ne ghing u ne, Oliv sing ah mäih ah kyom ci gui. Lebanon cedar sing ah mäih ah Ngami cu ng’ui Ng’hnam khai gui.

⁷ Hnü ät mä ngami cu kei ah shungvong nak ung om ba khai gui. Ngami naw htang cu geit u sei, sapyit ah mäih ah m’theih khai gui. Ngami cu lebanon sapyit tui ah mäih ah ming thang khai gui.

⁸ Israel chang gui naw a i a gup phi kä bilo ba khai gui. Kei naw ami taigü m’shang gui ne ka m’hteihtang gui khai. Angtäi sei ching ciah sing ah mäih ah kei naw ka ng’hniim gui khai. Kei cu ngami phyuhtheh nak ah aphung ah ka kyak ci.”

Khüüp nak

⁹ Shin ung guk cu cüvai ciah chang gui naw hmuhmat u sä, Ami m’lung kyong ung tha u sä. Bawipa ah lam cu düng sä, Düng ciah chang gui naw acun gui läk ne ghing ci gui. Cun ung phi kat nak bik ciah chang gui cu ng’vawn ne kyuk ci gui. A i ah kyasei ci ung cun gui cu a i ah kä ami sui ah phäh ah kyak ci.