HOSEA 13 - Cho Bible Common Language 2016

Israel gui ah khan ah ak hnu ah M’khoicha nak

¹ Cau läi, Ephraim pakhui gui naw ng’thu ami pyen ung ahei Israel pakhui gui naw kyih ci gui. Ngami naw Ephraim cu han dan ci gui. Cun ung phi cun ah chang gui naw Baal khawihnah u ne kat nak ami bi ah phäh ah ngami cu sik khai gui.

² Ngami naw khawihnah vai ah ngui agup gui cu pyang u ne, kat nak cu k’pang lä ci gui — ngui agup gui cu hnicim chang naw am lung awn ngaih-tüh ne akut awn apyan ah kyak ci. Cun kawn ah ngami naw pyen u ne, “Shin gui am khawihnah nak douthak vä. Shin ah agup gui a i hawkcha ah chang naw m’hnam gui khai aw? Vantang ah müi gup gui!

³ Cun ah chang gui cu khongawi ah khüi toi ah mäih ah, khongawi hta ung maih ciah k’daam tui ah mäih ah maih khai gui nei. Ngami cu htang m’hai hmun ung khokhi naw ayon ah htang shi ah mäih, meikhu m’kawt ung meikhu ah mäih ah kyak khai gui nei.

⁴ Bawipa naw pyen ci, “Kei cu Egypt khaw ah ka ning law püi ba gui ciah Bawipa nami Khanpughi ah ka kyak ci. Kei ah kawn ah nangmi ung ahei Khanpughi kä om ci. Kei cu nangmi ah Hunbawi ah ka kyak ci.

⁵ Chawng ne ng’gau ciah khaw ung kei naw ka ning m’hteihtang gui ci.

⁶ Cun ung phi nangmi khaw k’ni ung nami luh law kawn ah nangmi cu phü ne ng’büh law u ne, chang ah ng’shei law u ne kei cu nami na m’hnih ci.

⁷ Cun ah kyasei kei naw phongkawng ah mäih ah ka ning tu gui khai. Nami lam pum ung kawnghta ah mäih ah ng’thup ne ka ning mah gui khai.

⁸ Ahta maih ciah khawm ah mäih ah kya ne nang cu ning tu ne, ka ning phyit khai. Phongkawng ah mäih ah kya ne ka ning hmuh nak ung ning lo ne, acun ung sak kyung ah mäih ah kya ne akhui akpi ah ka ning k’teek khai.

⁹ “Israel chang gui aw, kei naw ka ning m’di gui khai. Cun ung a u naw ning bawm gui khai aw?

¹⁰ Nang naw ghangpughang la angvai hta gui cu nak thäh khai. Cun ung phi a i hawkcha ah ngami naw pakhui khaw cu hun hning khai gui aw?

¹¹ Kei naw ka m’lungshe nak ung ghangpughang gui ka ning pe gui ci. Ka m’lungso nak awn cun gui avan ka la ba khai.

¹² “Israel gui ah kat nak la cheishoh nak cu ca ung guk ah kyak ci, Cun ah guk gui cu ng’geing khai ah gim ah kyak ci.

¹³ Israel gui cu ghin nak vai chaw nak ci gui. Cun ung phi cun ami lak vai ah ang aih ci gui — Hta nak vai ah akhin ah kyasei phi puk ungka aluh law vai ah mak ciah a hmaw awn täng ci gui.

¹⁴ Kei naw shin ah chang gui cu sih nak ah khaw ungka kä ka hun gui khai. Sih nak ah huham ungka kä ka gung gui khai. Sih nak, na leigai cu law püi ä, Kei cu shin ah chang gui ah phäh ah kä ka yeikyai ba ci nei.

¹⁵ Israel gui cu khum’gho she ah mäih ami thawh ung phi, kei naw khong gau ah ka khokhi ng’ling cu ka tüi lawk khai nei. Cun gui naw ami tui hta gui la tui shawk gui cu kawi sak khai gui, Cun ah aphu küi gui phung avan hteh püi khai.

¹⁶ Samaria cu kei ana hnungtuk püi ah phäh ah m’kyuk vai nei, a chang gui cu ng’tuk nak ung sik khai gui. Nausen hta gui m’dek vawih na gui khai gui, käumah ciah hnumi gui cu k’daai gui khai gui.”