HOSEA 12 - Cho Bible Common Language 2016

¹ Israel chang gui naw khawngawi ung ka naw khomü ung khüt khai ah ami bi nü cu akholä dishum sak ciah kyak ci. Ngami cu Assiria gui awn ng’khawtsheng u ne, Egypt gui awn sumlei ci gui.”

² Bawipa naw Judah chang gui cu hnungtuk ne k’bün phei gui ci, Ani naw Israel gui cun phi ami hnün thawh ah ciah m’kyuk gui khai. Ngami naw ami bi lawh ah phäh ah ani naw pe gui khai.

³ Ami pupa Jakob cu ang phi püi ah anau Esua awn ngani cu ani nu ah puk kyong ung, ani om yah ge ung ng’tuk ci goi. Jakob cu ng’vai law neta, Khanpughi hnungtuk ne ng’tuk püi ci.

⁴ Ani naw khankho chang cu ng’tuk püi ne näng ci. Ani naw kyap ne hriham k’thäh ci. Bethela ung Khanpughi naw kami pupa Jakob ah law neta ng’thu püi ci.

⁵ Shin cu Bawipa, m’gäi ciah Khanpughi nei — aming cu Bawipa ah kyasei ani cu khawihnah vai nei.

⁶ Cun ah kyasei tuhbäi, Jakob ah htangshon gui, Nami Khanpughi ung ng’ap u ne, nami law ba vai nei. Bekhüt ne taga ne, nami Khanpughi ah hnün thawh cun “lung na ne ngäng vä.

M’khoicha nak ah mawng Ng’thu pyen gui

⁷ Bawipa naw pyen ci, “Israel chang gui cu Kanaanit chang gui ah mäihah kya ne kä düng ci gui. Ngami naw kü hman khai ah kihn ne nän ne hleih ci gui am pek tu cu m’hni ci gui.

⁸ Ngami naw, “Mikmi cu mi bühmang ci, khawh akda mi tak ci. A u naw phi kä düng ci awn mi bühmang ciah kä na bün gui hning ci,” cik ci gui.

⁹ Cun ung phi Bawipa nami Khanpughi, Egypt ah ka ning law püi ba gui ci, kei naw, khong gau khaw ah nangmi ah kei ka law yah ung, nami bi ah mäih ah nangmi cu phung ung ka ning om ba sak gui khai.

¹⁰ “Kei naw prophet gui cu ng’thu püi gui ne, muimang akda ka pe gui ci, prophet gui ung ka chang gui cu ng’thukbäi ka pe gui ci.

¹¹ Cun ung phi Kilead ung a gup khawihnah ci gui, Cun ah khawihnah ci gui cu sik khai gui. Kilead ung vantang gui awn khawihnah ne bik ci gui, A cun ung sonkyang gui cu khongpyäu ung lung pum ah kya lawk khai gui.”

¹² Mi pupa Jakob cu Mesopotamia ah dawng nea chumah vai ah phäh ah chang tumat ah bii bi tu ne, ani ah htome cu shäm ci.

¹³ Bawipa naw prophet tüi law ne Israel chang gui cu Egypt khaw ah khleihtein ah kya ne om nak ungka gung gui ne m’hteihtang gui ci.

¹⁴ Israel chang gui naw Bawipa cu akha ah m’lungshe sak ci gui. Ami mät ah cheishoh nak ah phäh ah ngami cu sih vai ah khin ci gui. Ani ah khan ah m’lung thüi nak ami law pü ah phäh ah Bawipa naw ngami cu m’kyuk gui khai.