HOSEA 11 - Cho Bible Common Language 2016

Hnungtuk ciah chang gui ah khan ah Khanpughi ah M’hni nak

¹ Bawipa naw pyen ci, “Israel cu a hmaw sangung kei naw ka m’hni ci. Ka hta ah tha ne Egypt khaw ah ka, ka khü law ba ci.

² Cun ung phi kei naw ani khü law pi ngä sei, Ani naw kei nang hlah ta law pi k’täi ci. Ka chang gui naw baal am khawihnah nak pe u ne, agup gui am ang ui m’khih ne pek ci gui.

³ Cun ung phi kei naw Israel gui cu hteit thei khai gui ah ka m’thei gui ci, Ka chang gui cu ka kut ung ka pawm gui ci, Cun ung phi kei naw ka m’htei gui cu ngami naw kä hmuhmat ci gui.

⁴ Kei naw ngami cu yum nak la m’hni nak awn ka kaih gui ci. Kei naw ngami cu kaw gui ne ka ng’being pha khai ah ka chang gui ci. Kei naw ngami ah ma ah kawp ne ka m’bei gui ci.

⁵ “Ngami cu kei ah ami ng’hlah law ba vai ah mak ci gui. Cun ah kyasei ngami cu Egypt khaw ah ng’hlat ba khai gui. Assiria naw uk gui khai.

⁶ Ng’tuk nak naw ami mang gaw gui cu pheet gui khai. Mang gaw m’kawt gui ng’gäi ci gui, ka chang gui cu acun naw m’di gui khai. A i ah sei ci ung ami mät naw nipi khai amki ngaih ah ami bi ah phäh ah kyak ci.

⁷ Ngami naw kei nahlawi u ne na ng’hlah tak ci gui. Ami khan ah thapo ang taih ah phäh ah ngami cu kyap khai gui. Cun ung phi a u naw phi ami khan ungka kä chaan pe ba gui khai.

⁸ “A i hawkcha ah ka ning m’lungsi gui vai ang, Israel gui? A i hawkcha ah ka ning nawng gui vai ang? Kei naw admah ka m’di ah mäih ah, Zeboiim ah khan ah ka bi ah mäih ah? Ka m’lung naw cun ah kä na bi sak khai nei, Kei naw ka ning m’hni nak gui cu khüighat aih ci.

⁹ Kei naw ka m’lungshe nak awn kä ka ning m’kyuk gui khai. Kei naw Israel gui cu kä ka m’di ba gui khai. Kei cu Khanpughi ah ka kyak ci, chang ah kä ka kyak ci. Kei, theingcim ci naw ka ning om püi gui ci. Kei naw m’lungshe nak awn nangmi ah kä ka law ba khai.

¹⁰ “Ami ga gui ah khan ah phongkawng ah mäih ah ka m’ngaw law ung, ka chang gui naw na läk lawk khai gui, Ngami cvu akhei täng ah ka ang ghit ah kei ah law ba khai gui.

¹¹ Ngami cu kha ah mäih ah yong u ne, Egypt khaw ah kaa mümcha ah mäih ah Assiria khaw ah ka law ba khai gui. Kei naw ami im ah ka hteh ba püi gui khai. Bawipa naw ka pyen nei.

Israel gui la Judah gui cu M’kat gui ci

¹² Bawipa naw pyen ci, “Israel chang gui naw na veing u ne, hleeihlak ne na theileh nak ci gui. Judah chang gui naw bekhüt theingcim ciah Khanpughi cu tu ä na hnungtuk püi ci gui.