HOSEA 10 - Cho Bible Common Language 2016

¹ Israel chang gui cu am theih awn be ciah sapyit sing ghing ah mäih ah kyak ci gui. Ngami cu bühmang law pi u ne, sonkyang co law pi ci gui. Ami khaw ung geit m’sep law pi k’täi u ne, Khawihnah nak ah theingcim ciah lungtung cu, kiom law pi khai ah pyang ci gui.

² Amlung kyong kä düng cisah chang gui cu, atuhbäi ami kat nak ah phäh ah yaica ci gui. Khanpughi naw ami sonkyang gui m’shet pe gui ne, theingcim ciah ami lungtung gui m’di pe gui khai.

³ Shin ah chang gui naw atuhbäi gen khai gui, “Mikmi ung ghangpughang kä om ci, a i ah kyasei ci ung mikmi naw Bawipa kä mi kyih aa ah phäh ah kyak ci. Cun ung phi ghangpughang a om ung phi mikmi ah phä ah a i bi hning khai ang?”

⁴ A kholä ah ng’thu u ne, kä hman ciah shaitak u ne, kä mangca phyak khai ah ami om gui, taga nak cu kä taga nak ah kya law ne loma ah m’gui man ah ng’shun a däm law ah mäih ah kyak ci.

⁵ Samaria mang gaw ung om ciah chang gui cu kyikyawk khai gui. Agup ah bii bik ci gui ah ngami la taigü gui cu acun ah khan ah thüikyap ci gui. Cun ah ghui gup ah huham gui cu a maih ah a kyak ung ngami cu kyap m’lau khai gui.

⁶ Cun ah agup cu dämduh ciah uktu bawi am m’cümhnah ne pek vai ah Assiria ah hteh püi ci gui. Israel cu thuihmai ng’aca khai, a i ah kyasei ci ung, acun ah m’shümthein nak ami läk ah phäh ah kyak ci.

⁷ Tui ah khan ung ng’hteh ciah sing tawn ah mäih ah ghangpughang gu hteh püi khai gui.

⁸ Aven gawnu m’htung lai ung phung gui, Israel chang gui naw agup ami khawihnah nak gui cu, di khai gui. Ng’hling gui la m’ghaw gui naw ami sonkyang gui cu k’düi khai gui. Chang gui naw khomhtung gui cu khü u ne, “Na thup gui ä!” khogui gui cu khü u ne, “Na shung gui ä!” cik khai gui.

Israel gui ah khan ah M’khoicha nak cu Bawipa naw shäu ci

⁹ Bawipa naw pyen ci, “Israel chang gui naw kei na hnungtuk püi u ne, ami kat nak cu kibeah ung tün ne ami kat nak cu kä ng’düm ci. Cun ah kyasei ngami cu ami ng’tuk nak naw pha law gui khai.

¹⁰ Shin ah kat nak bik ciah chang gui cu kei naw tu gui ne, ka m’kyuk gui khai. Chang pakhui gui cu ng’dawn law u ne, ngami cu hnungtuk püi tu gui khai gui. Ngami ami kat nak ada ah phäh ah m’kyuk nak gah khai gui.

¹¹ “Israel cu m’thei pyi ah seipat m’la ah mäih ah kya man ci. Gängtha ne htang leh hlü ge ciah kyak ci. Cun ung phi kei naw ani ah kyom ciah ak hnü ung thapho tai ne, bii ak ghat cu ka bi sak khai ah ka k’bäi ci. Kei naw Judah chang gui cu lai thawn sak gui ne, Israel chang gui cu m’ghaw ka mawih sak gui khai.

¹² Kei naw ka pyen ci, ‘Nami mät ah phäh ah m’dek ak thai thawn vä. Düng nak cu geit u ne kei ah nami ng’ap nak ung m’theih pai lawk ciah hrilham cu khäm vä, Shin cu nangmi kei nami na Bawipa ah nami ng’hlah law nak ba vai ah akhin ah kyak ci nei. Kei cu law ne nami khan ah hrilham ka yuk lawn lawk khai nei.’

¹³ Cun ung phi nangmi naw shet kat nak geit u new, Acun ah m’theih pai cu nami khäm ci, Nami mät ah hleeihlak nak ah am theih pai cu nangmi naw nami ei ci. “Nami yatha gui la da aih ciah nami gakap gui cu nami ngaih u ah phäh ah

¹⁴ ng’tuk nak cu nami chang gui ah gawk law khai, Nami pigaw khäng gui avan cu di khai gui. Cun ah hnüüp cu ghangpughang shalman naw ng’tuk nak ung betharbel a mang gaw cu m’di ne, hnumi gui la ami hta nau gui güüt ne a ngawn gui ah mäih ah kyak ci.

¹⁵ Cun cu nangmi ah khan ah gawk lawk khai, Bethela chang gui, a i ah kyasei ci ung, kyihkyawk vai ah akshe nami bi ah phäh ah kyak ci. Ng’tuk nak ami leng law vai am, Israel ghangpughang cu sik khai.”