HOSEA 1 - Cho Bible Common Language 2016

¹ Shin cu Beeri ah hta Hosea am Bawipa naw a pek ah ng’thu ah kyak ci. Cun sangung Judah ung Uzziah, Jotham, Ahaz la Hezekiah gui cu ghangpughang ah kyak ci gui. Israel ung Jehoash ah hta Jeroboam cu ghangpughang ah kyak ci.

Hosea ah Achu la Ahta gui

² Bawipa naw Hosea ungka naw Israel gui ang thu püi gui yah ung ani naw Hosea am, “Nang cu hteit ne chu mah ä, na chu cu kä bekhüt khai nei, na hta gui phi kä bekhüt khai gui nei. A cun ah mäih ah ka chang gui naw na hteh ta u ne, kä bekhüt lawk khai gui nei.”

³ Cun ah kyasei Hosea naw Komer ming nak ciah hnumi cu chu nak ci, Ani cu Diblaim ah hta hnumi ah kyak ci. Ani hta htük pami hta ah ani hta kawn ah

⁴ Bawipa naw Hosea cu pyen nak ci, “A ming cu Jezreelaa ah sui ä, a i ah kyasei ci ung, kä shou pha sei, kei naw Israel ghangpughang cu ka m’kyuk lawk khai, Cun cu ani ah pughi Jehu naw Jeyreel ung chang gui a ngawn ah phäh ah kyak ci. Kei naw Jehu ah ng’shon cu ka ng’pyi sak khai.

⁵ A cun ah akhin ung Israel ah gakap ah huham cu, Jeyreel khongnawi ung kei naw ka m’di khai.”

⁶ Komer cu ak hnih nak ah hta ba ci-cun cu hnumi hta ah kyak ci. Bawipa naw Hosea a pyen nak cu, “Ang ming cu ‘kä m’hni’ ah sui ä, A i ah kyasei ci ung kei naw Israel chang gui ka m’hni nak cu kä ka m’dang law ba khai, kä ka m’geinsei gui khai.

⁷ Cun ung phi Judah chang gui ah khan ah kei naw ka m’hni nak ka m’dang khai. Kei, Bawipa ami na Khanpughi naw, ka hun gui khai, cun ung phi ng’tuk nak — Khim, li, m’la la ng’se ng’cum ciah chang gui awn kä ka bik khai.”

⁸ Komer cu ahta hnumi tuui a chah kawn ah käumah ba ne pamihta ah hta ba ci.

⁹ Bawipa naw Hosea pyen nak ci, “Aming cu kei ah kä chang — ciah sui ä, a i ah kyasei ci ung Israel chang gui cu kei ah kä chang gui, kei cu ngami ah kä Khanpughi nei” cik ci.

¹⁰ Israel chang gui cu tuinu kem ah laigin ah mäih ah kyak khai gui, kä khei tai vai, kä nüt tai vai ah kyak khai gui, Tuhbäi Khanpughi naw pyen ah gui ci, “Nangmi cu kei ah kä ning chang gui nei,” Cun ung phi ani naw shi cha ah a pyen nak vai ah hnüüp cu gawk lawk khai nei “Nangmi cu ghing ciah Khanpughi ah hta nau gui nei!”

¹¹ Judah chang gui la Israel chang gui cukawng ät ba khai gui. Ngami naw ami mät ah phäh ah ng’vaihta tumat ghü khai gui. Ngami cu ami khaw ung geit kaw u ne, bühmang ba khai gui. Ä! Jezreela ah hnüüp cu dämduh ciah hnüüp ah kyak khai!