HEBRU 9 - Cho Bible Common Language 2016

M’dek Khan Khawihnah nak La Khankho Khawihnah Nak

¹ Ak htük ah thukhän ung khawihnah nak ah thumyo la chang ah pyan ah khawihnah nak ah hmun hlü ci.

² Khophung ah ama lam cu, pyang hnga ne “Hmun Theing,” cine k’bäi ci gui. Cun ah kyong ah meidäi taih nak la Khanpughi am vawihpeh vai ah m’htut taih nak ah tawnglaai cu om ci.

³ Acun ah hnu lam yihdung awn shung nak, khophung ah ma bäih ah, “Ak Theing Säih Hmun,” cu om ci.

⁴ Acun ah kyong ah ang ui gui mei awn ami m’khih nak ah ghui mangkiang la, ghui bäng awn pyan ah Thukhän M’küm om ci. Cun ah m’Küm khui ah manna m’htut ah om nak ah ghui-am, lim ne hnah ciah Aaron ah ng’shopawng la thukhän gui guk ah lung k’paang hnih om ci.

⁵ Cun ah m’küm khan ah cherubim ah gup gui om u ne, cun gui naw cun ung Khanpughi a om ah mawng m’dang ci gui, ami ng’phiaa gui naw shetkat m’gein nak ah kiang cu küm ci gui. Tuhbäi cun gui apüh akheh ah pyein vai kä kyak ci nei.

⁶ Cun ah ami pyan kawn ah taigü gui cu bi bik khai gui ah, phung ah ak caw lam ah ak hnüüp tä sei hteit ci gui.

⁷ Cun ung phi Taigü tung tumat bäng vah phung ah ak kyong ah vah lut ci. Ani cun ah aluh cun phi kum ät ung hngü ät ah kyak ci. Cun ah aluh ung amät ah hmawk la chang gui naw kä hmat ne ami cheishoh ah hmawk ah, khawihnah nak vai ah si cu hteh püi ci ci.

⁸ Shin ah a mawng ung Mumcha Theing naw ang dang ah am theithang nak cu, ak pung ah phung a om ah chuih Hmun Theing Säih ah hteh nak vai ah lam kä ng’hmawng ci, ciah kyak ci.

⁹ Shin gui cu tuhchü tawk ne dang sak ciah a mawng gui ah kyak ci. Cun cu peit taak nak la ghuthaa nak gui naw khawihnah ciah chang gui ah m’lung cu kä kum be sak hlawt ci ciah kyak ci.

¹⁰ Cun gui cu ei awk la theingcim nak a hlü hlü bilawh nak gui ung phung ci. Shin gui cu ak pung lam m’hnütbäi nak gui ah kya ne, Khanpughi naw khokthai a pyan nak kä phaa sei ng’pyi khai gui.

¹¹ Cun ung phi Bawi Khrit cu om pyii ciah nikiom nak gui ah Taigütung ah kya ne gawk law pyii ci nei. Ani ah khuut bi nak ah phung cu hlüngtai ne kümbe pi ci nei: cun cu chang ah cawh ah kä kyak ci, atüi pyan ah khomdek ungka ah kä kyak ci.

¹² Bawi Khrit cu Hmun Theing Säih ah hnü ät ge ang bäng ah aluh sang ung, vawihpeh vai ah me ah si, sei ah si cu kä hteh püi ci; Amät ah si hlui cu hteh püi ne, mikmi ah angtäi hun nak cu na pe gui ci.

¹³ Mesi seisi la seipat hta awn m’kümbawh ne phyuhtheh nak naw, kä theing cim ci gui ah katnak cu, m’si ne, theingcim sak gui ciah a kyak ung,

¹⁴ Bawi Khrit ah si naw a i hlawk ah theingcim sak pi khai aw! Bawi Khrit naw ng’täi ciah Mumcha awn amät cu, katnak kä om ciah küikyan nak ah kya ne Khanpughi ah ng’ap pyii ci nei. Ani ah sihlui naw, alä düüt ah kyak ciah mi m’lung ngaih cu na theingcim sak gui khai, cun ung mikmi naw angtäi ghing ciah Khanpughi cu mi khawihnah khai nei.

¹⁵ Cun ah kyasei Khanpughi naw a khü ah chang gui naw, Khanpughi ah a shaitaak ah angtäi m’shumphyuk nak ami gah vai ah, Bawi Khrit naw thukhän thai cu pyang ci. Cun ah abi cu, ak htük ah thukhän ah kaa ah ami om sang ung chang gui ah ami cheishoh nak gui cu, phiawn khai ah, sih nak tumat a om ah hmawk ah kyak ci.

¹⁶ Sih hnuthu ca küm khai ah guk ci cu, akcang ah si pyii ci ci cu, dang pyii ci nei.

¹⁷ Sih hnuthu cu guk ciah chang kä a sih phaa ung kä kümbe ci; cun cu asih kawn ah vah kümbe ci.

¹⁸ Cun ah kyasei ak htük bäih ah thukhän cun phi si awn ah kümbe nak om ci.

¹⁹ Akhtükbäih ung Moses naw thukhän om ci gui phung cu chang gui-am ng’shäu ne m’thein gui ci. Cun kawn ah me ah si la sei ah si cu la ne tui awn k’caw netah, hissop singban la htomu a sen awn, thukhän ca-uk la chang gui cu k’peh gui ci.

²⁰ Cun kawn ah Moses naw, “shin ah si cu nangmi naw nami läk vai ah Khanpughi naw am hnüt ah thukhän cu, kümbe sak ci nei,” cik ci.

²¹ Cun ah mäih ah Moses naw, thukhän phung la khawihnah nak ung mangca gui phung cu si awn k’peh yawp ci.

²² Akcang ah thukhän ah pyein ah, a päng avan cu si awn vah theingcim ci. Si huk nak awn cheishoh nak cu phyawng hlawt ci.

Bawi Khrit ah Küikyan Nak Naw Cheishoh Nak Hteh püi Yawp ci

²³ A shin ah mawnglam awn khankho ung phungpawng ciah amüi gui cu theingcim sak ah kyak ci. Khankho müi gui theingcim nak sak ung küikyang pi ciah küikyan nak cu bi vai kyak ci.

²⁴ Bawi Khrit cu Hmun Theing akcang ah müi ah chang ah pyan ah Hmun Theing ung kä lut ci. Ani cu Khankho akcang ung lut ne, tuhbäi mikmi ah hmawk ah Khanpughi ah ma ah gawk ci nei.

²⁵ Jew chang gui ah Taigü Tung cu, a kum tä sei, sei me gui ah si hteh püi ne, Hmun Theing Säih pi ung hteit ci ci. Cun ung phi Bawi Khrit läi cu ng’ap khai ah akda vei kä lut ci.

²⁶ Akda vei lut khai ah a kyak vai sü ung Khanpughi naw kho akhan atüi pyan ung tün ne akda vei sih nak aut khai sü ah kyak ci. Tuhbäi kho a khüt law vai khin ung ang bäng ge ah hnü ät kium law ne, a hnun gui pe ne, cheishoh nak cu nawtpet yawp pyii ci.

²⁷ Chang cu hnü ät bäng si ne, cun kawn ah Khanpughi ah m’khawichaa nak cu gah ci.

²⁸ Acun ah mäih ah Bawi Khrit cun phi, chang gui ah cheishoh nak phiawn khai ah, hnü ät bäng küikyan ne ng’ap ci. Ani cu cheishoh nak nawt täm ba khai ah kä kyak ciah, ngäng ci gui ah chang gui hun gui khai ah ak hnih vei nak ah kyum law ba khai nei.