HEBRU 8 - Cho Bible Common Language 2016

Bawi Jesuh Mi Taigü Tung

¹ Mi pyein nak ah mawng avan ung ak tung pi cu, mik im ung cun ah Taigü Tung a om pyi ah mawng ah kyak ci. Ani cu Khankho Ghangpughang ah Mangkiang k’pat lam ung ngok ci.

² Bawipa cu a theingcim nak säih ung Taigü Tung ah kya ne bi bik ci, cun ah hmun cu chang ah cawh ah kä kyak ci, Khanpughi ah pian ah phung akcang ah kyak ci.

³ Taigü Tung phung cu Khanpughi am peit vai gui vawihpeh khai ah m’düih ah kyak ci. Cun ah kyasei mikmi ah Taigü Tung cun phi a vawihpeh vai tumat mat om khai ah kyak ci.

⁴ Ani cu m’dek khan ung a om ah a kyak ung taigü ah kä kya hlawt khai, a i ah kyasei ci ung, thukhän awn, peit vai gui cu, ap ciah taigü gui ami om pyii ah hmawk ah kyak ci.

⁵ Taigü gui ah bilawh nak cu khankho ah khawihnah nak ah a müi ah ang hniim ah kyak ci. Moses ah bilawh gui cun phi acun ah mäih ah kyak ci. Moses naw thukhän kho phung a cawh law vai ung, Khanpughi naw, “M’htung khan ah ka ning m’hnuh ah mäih ah apäng avan cu käm hnih en ne, na pyan vai nei,” cine am cäi ah hmawk ah kyak ci.

⁶ Cun ung tuhbäi Khanpughi la ak chang gui ah ng’lak ung Bawipa Jesuh naw a pyan ah thukhän cu, bä pi ciah shaitaak ung ng’yung ci kya ne, thukhän gui ah tah a bä pi ah mäih ah, Taigü ah kia ne Bawipa Jesuh ah bilawh gui cun phi, cun ah taigü gui ah bilawh gui ah mä bä pi ci nei.

⁷ Ak htük bäih ah thukhän ung cheishoh nak kä a om vai sü ung ak hnih nak thukhän kä hlü khai sü te.

⁸ Cun ung phi Khanpughi naw ak chang gui ah cheishoh nak hmuh netah; “Judah chang gui la Israel chang gui ung, thukhän thai ka bi vai ah a khin cu gawk lawk ci nei.

⁹ Cun cu ami pupa gui Egypt kho ah kaa ami kut ung pang gui ne, Kak plawk ba gui sang ung, ka peit gui ah thukhän awn kä täng ba khai nei. Cun ung ka peit gui ah thukhän cu m’shet u sei, Ngahmi cu kei naw ka nawng gui ci,” ci ne Bawipa naw pyein ci.

¹⁰ Ngawi ah Israel chang gui awn ka bi vai ah thukhän läi cu, “Kei naw ka thukhän cu ngami ah m’lung ung thun ne, Ami m’lung ung ka guk khai. Kei cu ngami ah Khanpughi ah ka kyak khai, Ngahmi cu kei ah chang ah kyak khai gui.

¹¹ A u chang naw phi amät ah pakhui chang la a im ng’gi lo ng’phei am, Khanpughi a hmat tu vai ah m’theithang vai kä hlü ba khai, Ak hmaw pi ung kaa, ang vai pi ung khüt sei, Chang avan naw kei cu na hmat khai gui nei.

¹² Kei naw ami shetkat nak gui cu kam gein gui khai, Ngahmi naw ami cheishoh nak gui kä shüm ba khai gui,” cine pyein ci.

¹³ Khanpughi naw cun ah thukhän thai ah mawng a pyein nak awn, ak htük ah thukhän cu kheei sak ci, cun ah kheei ci gui phung cu kä shou pha sei ng’kawn ne maih ci gui nei.