HEBRU 7 - Cho Bible Common Language 2016

Taigü Melchizedek

¹ Shin ah Melchizedek cu Salem ghangpughang ah kya ne, a hlüngtai säih Khanpughi ah taigü ah kyak ci. Abraham naw ghangpughang paphli tu ne näng ne a law ba ung, Melchizedek naw dou ne phyuhtheh nak pek ci.

² Abraham naw agah avan ah bum ghaa bum ät cu pek ci. (Melchizedek ah aming cu ‘Düng nak ah Ghangpughang,’ ciah kyak ci. A i ah kia sei ci ung ani cu Salem ghangpughang ah kyak ci. Cun kawn ah “Dimdeeih nak ah ghanpughang ngah phi ming ci.”)

³ Melchizedek ah anu apa, apu api gui la, ang tüi nak, asih nak ah mawng gui cu, ca ung ami guk kä om ci. Ani cu Khanpughi ah Htapa ah mäih ah kya ne, angtäi sei taigüpa ah kyak ci.

⁴ Mi pughi Abraham naw ng’tuk bi ne a gah ah bum ghaa bum ät a peit cu mi teng ung, ani a i hlawk ah hlüngtai ci, cicu mi hmat khai nei.

⁵ Taigü kyong ah kyak ciah Levi pakhui shon gui naw, Abraham ah hta ng’shon, ami mät ah hta nau gui ah kyak ciah, Israel chang gui ah bum-gha bum ät cu, thukhän ah ng’shui ah, look hning ci gui nei.

⁶ Melchizedek cu Levi pakhui ah kä kyak ci, cun ung phi Khanpughi ah shaitaak gah ciah Abraham ah bum ghaa bum ät cu look ne, phyuhtheh nak pek ci nei.

⁷ Phyuhtheh nak pek ci cu, phyuhtheh nak gah ciah chang ah mä hlüngtai pi ci, cicu ngaih khit vai kä om ci nei.

⁸ Taigü gui naw bum ghaa bum ät ami loh cu, si thei ciah chang gui naw ami loh ah kyak ci; cun ung phi Melchizedek naw a loh cu, cacim ah mäih ah ghing ci naw a loh ah kyak ci.

⁹ Abraham naw a peit cu, Levi naw Abraham ung a peit ah phi pyein hning vai kyak ci nei.

¹⁰ A i ah kyasei ci ung Abraham la Melchizedek ani ng’hmuh yah ung, Levi cu kä ng’tüi pha ne, Abraham ah pukhui ah om yah ciah pyein vai ah a kyak ah hmawk ah kyak ci nei.

¹¹ Israel chang gui-am thukhän a peit gui yah ung, Levi pakhui taigü gui ung ng’yung ne a peit gui ah kya ci. Tuhbäi Levi pakhui taigü gui ah bilawh cu a khüm be vai sü ung, Aaron ah a hnün ung Melchizedek ah khui m’düng khai ah taigü ang dang lawvai kä hlü khai sü te.

¹² Taigü pakhui ang thawng ah a kyak ung thukhän phi ang thawng vai a hlü ah hmawk ah kyak ci.

¹³ Shin ah a mawng gui ung ami pyein ah Mi Bawipa läi cu, Levi pakhui taigü kyong ungka ah kä kyak ci, a pakhui hei ung kaa ah kyak ci.

¹⁴ Bawipa Judah pakhui ung ang tüi law cu ak dei ang dang ah kiak ci. Moses naw taigü gui ah mawng a pyein nak ung, Judah pakhui cu kä pyein man ci.

Melchizedek ah Mäih Ahei Taigü

¹⁵ Melchizedek ah mäih a hei taigü dang law sei taigü a hei hei a om vai ah mawng ng’htei law pi ci.

¹⁶ Ani taigü ah a kyak law cu, chang ah thukhän thungyo awn ah kä kiak ci, käng pyii hlawt ciah ah ghin nak ah hlüngtai nak awn ah kyak ci.

¹⁷ Cacim theing ung, “Nang cu Melchizedek ah hnün ung ngok ciah ang täi ah Taigü ah na kyak khai,” ciah mäih ah kyak ci.

¹⁸ Ayan thukhän cu kä küm ne a kholä ah kyasei, ami nawng ah kiak ci.

¹⁹ Moses ah thukhän naw a i phi kä kümpäng sak hlawt ci. Tuhbäi mikmi cu bä pi ciah ngaih u nak mi gah pyii ci kyasei, cun ah ngaih u nak awn Khanpughi ah pei ah mi ng’et lawk ci.

²⁰ Cun kawn ah phi Khanpughi ah phyun nak cu om ci. Ahei gui taigü ah ami kyak sang ung cun ah mäih phyun nak cu kä om man ci.

²¹ Cun ung phi cun ah phyun nak awn, Bawipa Jesuh Taigü ah a kyak law sang ung Khanpughi ah thu pyein cu; “Bawipa naw küikyang ciah shaitaak nak bik ci, Cun cu kä ng’hlah püi ba düt khai; Nang cu angtäi sei Taigü ah na kyak khai nei,” ciah kyak ci.

²² Cun ah kä a täng nak awn Bawipa Jesuh cu bä pi ciah thukhän küikyan ciah kya lawk ci.

²³ Cun kawn ah kä a täng nak cu; ahei taigü akda gui cu sik ci guiah kya ne, ami bi kä bi ba hlawt ci gui.

²⁴ Cun ung phi Bawipa Jesuh cu angtäi ghing ci kya ne, Taigü ah kia ne khuut abi cun phi a hei ah kut ung kä gawk hlawt ci.

²⁵ Cun ah kyasei ani ah ang ming ung Khanpughi ah lawk ciah chang gui phung angtäi sei hun gui ci. A i ah kyasei ci ung Bawipa cu cun ah chang gui ah hmawk ah Khanpughi ah ng’coi ng’pak khai ah, angtäi ah a ghin ah hmawk ah kyak ci.

²⁶ Cun ah kyasei Bawipa Jesuh cu mikmi ung hlü ci awn ng’müi ciah Taigü Tung ah kyak ci. Ani cu theingcim ci, shetkat nak ani ung kä om ci. Ani cu shetkat nak ungka m’chah ne, khan mawpi ah a thawh ba sak ah kyak ci.

²⁷ Ani cu a hei taigütung gui awn kä täng ci, Amät ah cheishoh nak la chang hei gui ah cheishoh nak ah hmawk ah ak hnüüp tä sei küikyan nak vawihpeh vai kä hlü ci. A i ah kyasei ci ung amät naw amät apeit sang ung hnü ät ge ang bäng ah ang ap ah hmawk ah kyak ci.

²⁸ Moses ah thukhän naw kä kümbe ciah chang gui cu, Taigü ah m’düih gui ci; cun ung phi thukhän a om kawn ah, angtäi sei kümbe ciah A Htapa cu Taigü Tung ah phyun ne m’düih ci.