HEBRU 5 - Cho Bible Common Language 2016

¹ Taigü Tung nak cicu cheishoh nak ah hmawk ah phiawn nak vai la küikyan nak vai, chang van ah hmawk ah phyuhteh ne Khanpughi ah khuut bik khai ah ghü ne ami m’düih ah kyak ci.

² Ani amät cu kä a khüm be nak da ci kyasei, lam hma ciah chang, cheishoh ciah chang gui cu chimgein gui ci.

³ Amät cu kä kümbe ciah kya ne, chang ah phäh bäng ah kä kiak ci, amät ah phäh ah phi küikyan nak vai ah phyutheh ciah kiak ci.

⁴ A u naw phi amät naw amät cu taigütung ah käm düih hning ci. Khanpughi naw Aaron khü ne am düih ah mäih ah, Khanpughi naw khü ne am düih cun vah Taigü tung ah kya hning ci.

⁵ Acun ah mäih ah Bawi Khrit naw amät naw amät cu Taigü Tung ah käm düih ci. Khanpughi naw Bawi Khrit-am; “Nang cu Ka Htapa ah na kyak ci, Tuhngawi kei cu nang ah Pa ah ka kyak ci” cik ci.

⁶ Cun kawn ah mä a hei ung, “Nang cu Melchizedek ah hnün ung ngoh ciah Ang täi ah Taigü ah na kyak khai,” cine pyein ba ci.

⁷ Bawipa Jesuh cu khomdek khan ung a om yah ung, sih nak ung hun ciah Khanpughi ah ma ah ng’hui ne kyap ne taigü ci. Neim nak la ng’ap nak awn ak taigü cu Khanpughi naw phi ngaih pek ci.

⁸ Ani cu Khanpughi ah Htapa ah a kyak tupang ung phi, Khanpughi ah thu a läk thei vai ah yaica ne theithang ci.

⁹ Bawipa cu kümbe nak a gah kawn ah, ang thu ngai ciah chang gui-am, angtäi hun nak pe gui ciah ang yung ah kya lawk ci.

¹⁰ Khanpughi naw Bawipa cu Melchizedek ah hnün ung ngok ciah Taigü tung ah ming sak ci.

Lam Kä Hma Vai ah Khän ne Am Cäi Nak Gui

¹¹ Shin ah a mawng ung ning m’thein gui vai akda om ci, cun ung phi nangmi cu kä nami cüivai ngai ci kyasei, pyeinsak cu kä yäi ci.

¹² Nangmi cu nami m’theithang thei khai ah a khin ah kya law pyi ci, cun ung phi nangmi cu Khanpughi ah thu ak tün nak ung tün ne, chang naw a ning theithang gui vai hlü ba laih laih ci nei. Nangmi cu buh nami ei vai khin law sei phi suuktui laih laih nami awk ci nei.

¹³ Suuk awk cicu hta yüt nau sen akni akshe kä hmuhmat phak ciah kyak ci.

¹⁴ Guh ciah buh ei cicu ang vai pyi ah kyak ci, khritha ak ni ak she bui aut ne m’khoi chaa thei pyi ciah kyak ci.