HEBRU 4 - Cho Bible Common Language 2016

¹ Khanpughi naw mikmi am ang thu ah shaitak cu mi gah vai ah na pe gui ci. Cun ah ng’düm nak vai ah shaitaak cu phlawi düt ci tumat phi kä om men khai ah nami geing nak vai nei.

² Cau ng’vai gui ah mäih ah mikmi naw Thuni cu mi ng’yak ci nei. Ngami naw Thuni cu ng’yak ci gui, cun ung phi ngami ah phäh ah a bäkhäk nak kä om ci. A i ah kyasei ci ung ngami naw ng’yak u ne phi yum nak awn kä ami dou ah hmawk ah kyak ci.

³ Mi yum ciah mikmi läi naw Khanpughi ah shaitaak ah bämang nak cu mi gha ci nei. “Kei naw m’lung k’she netah, Ka m’hnüt ah shaitaak cu, ‘Kei naw ka peit gui vai ah, hüi nak ah khonglei ung ngami cu kä lut tu hlawt khai gui nei,’ cine a pyen ah mäih ah kyak ci. Khomdek khan a tüisho sang ung a bi lawh gui vai ng’pyi pang sei phi, shin ah thu cu a pyein ah kyak ci.

⁴ Cacim theing ung ak hnüüp chih hnüüp ah mawng a pyein nak ung, “Khanpughi cu ak hnüüp chih hnüüp ung abi gui avan ung ng’düm ci,” ciah om ci.

⁵ Cun ung phi a pyein ba hei ah cacim cu, “Kei naw ka peit gui vai ah hüi nak ah khonglei ung ngami cu kä lut tu hlawt khai gui nei” ciah om ci.

⁶ Cun ah Thuni ng’ya law htük ciah chang gui naw cun ah hüi nak cu kä gah ci gui, a i ah kyasei ci ung ngami naw kä ami yum ah hmawk ah kyak ci. Cun ah kyasei cun cu a hei gui naw gah ci gui nei.

⁷ Cun ah ami gah mawng cu, Khanpughi naw “Tuhngawi” ciah ming khai ah am hnüt ah hnüüp naw dang sak ci nei. Khokum ak sho lüng khätah, acun ah mawng cacim theing ung, David am, am thein cu; “Tuhngawi nangmi naw Khanpughi ah k’aw cu nani ng’yak ah a kyak ung, Nami m’lung kä ling-en sä,” ciah kyak ci.

⁸ Joshua ah peit ah hüi nak cu Khanpughi ah shaitaak ah a kyak vai sü ung Khanpughi naw ak hnüüp hei cu kä pyein ba khai sü te.

⁹ Cun ah kyasei ak hnüüp chih hnüüp Khanpughi ang düm ah mäih ah, Khanpughi ah chang gui ami düm nak vai hnüüp om ba ci.

¹⁰ A i ah kyasei ci ung Khanpughi ah shaitaak ah düm nak gah ciah chang cu, Khanpughi ah mäih ah amät ah bi a bi ung düm nak gah ci nei.

¹¹ Cun ah kyasei düm nak gah vai ah mik tha nak khai nei. Cun ung kä a mi yum ah hmawk ah düm nak kä gah ci gui ah Israel chang gui ah kä mi kyak khai nei.

¹² Khanpughi ah Thu cu ghing ne hnüntho ne, hmün ne ghaat ciah m’htakhim ah tah ghaat pi ci. Cun ah khim naw, ghin nak la mumcha ah ng’chum nak, khlingthang ah kyum nak ung khüt sei, aat pit pit ci. Acun naw chang ah m’lung ung yaak hlü ngaih-tüh gui cu m’khoi chak ci.

¹³ Khanpughi ah ng’thuh haih ci a i kä om ci a tüi sho phung phung cu a mik ah hmuh ah dang yawp ci. Acun ah kyasei mi bilawh, ngaih tüh gui phung cu Khanpughi-am mi ap khai nei.

Jesuh, Hlüngtai ciah Taigü Tung

¹⁴ Cun ah kyasei mi yum nak cu m’htek ne mik pang khai nei. A i ah kyasei ci ung, mikmi ung Khanpughi ah ma ah düi ciah Khanpughi ah Htapa, hlüngtai ciah Taigü Tung, Bawipa Jesuh cu om pyi ci.

¹⁵ Mikmi ah Taigü Tung cu mikmi ah shetkat nak kä nam gein gui hlawt ciah kä kyak ci. Mikmi ah Taigü Tung cu, mikmi ah mäih ah tüihtok nak aut ci, cun ung phi cheishoh nak ung kä gawk ci.

¹⁶ Cun ah kyasei mikmi cu mi khüighaat ne, m’gein nak ah hmun Khanpughi ah mangkiang ung mi hteit khai nei. Cun ah hmun ung chik-hna nak la gein nak cu, mi ng’yak hlü phung ung mi gah khai nei.