HEBRU 3 - Cho Bible Common Language 2016

Bawi Jesuh Cu Moses ah Kuikyang Pi Ci

¹ Khanpughi naw a khü gui ah khritha phäunau gui aw, ngai shüm vä! Bawipa Jesuh Mi yum nak ung Taigü Tung ah kyak khai ah Khanpughi naw a tüih law ah kyak ci nei.

² Moses cu Khanpughi ah im ung a bi lawh nak ung abekhüt ah mäih ah, Bawipacun phi shin ah bi bik khai ah ghü ne m’düih ciah Khanpughi ah ma ah bekhüt ci.

³ Im co ciah chang tumat cu a im cawh ah mä däm pi khai ah m’tamkhah nak gah khin ci nei.

⁴ Im phung phung cu chang naw co ci cun ung phi a päng avan cu Khanpughi naw co ci.

⁵ Moses cu Khanpughi ah im kyong ah ak changshäm ah kya ne bekhüt ne om ne, ma lam ah Khanpughi ah thu law vai gui cu, ana pyein law ma ci.

⁶ Bawi Khrit läi cu Khanpughi ah im uk ciah A Htapa ah kya ne, bekhüt ne om ci. Mikmi cu küighaat ne, mi ngaih u nak ah khan ah m’lung üp nak a om ah a kyak ung, Khanpughi ah im ah mi kyak ci.

Khanpughi ah Chang Gui ah Düm Nak

⁷ Cun ah kyasei Mumcha Theing naw a pyein cu, “Khanpughi ah k’aw Nangmi naw tuhngawi nami ng’yak ah a kyak ung kä nami ling keng vai,

⁸ Nami pupa gui cu Khanpughi ng’küükneet püi u ne, pui kiang ma ah phawtcam ci gui, ngahmi ah mäih ah kä nami lingkeng vai.

⁹ Nami pupa gui cu kum phli-kip ah kiong ung kei naw ka bi cu hmu lang u ne, na phawtcam ci gui,

¹⁰ Cun ah kyasei, kei cu ngami ah khan ah m’lung she netah, ‘Ngahmi cu angtäi sei pyai ba ci gui, Ka thukhän phi kä läk hlük ci gui, cine pyein ci.’

¹¹ Kei cu m’lung she netah, ‘Ami ng’düm nak vai ah kei naw ka peit gui ah kholei ung, ngami cu a ngawi ah phi kä lut tuk khai gui,’ cine shaita ne ka k’phyun gui ci,” ciah kyak ci.

¹² Zum ciah ka phäi nau gui, ghing ciah Khanpughi nawng nak vai amawng ah am lung kiong shekhak ciah chang, nangmi ung kä om en khai ah nami geing nak vai nei.

¹³ Nangmi cu cheishoh nak ung kä thuvi ne kä nami lingkheng-en vai ah, cacim theing naw “tuhngawi” ciah thu anam thein nak gui a om ah chuih, ak hnüüp tä sei tumat la tumat anmi hteinghtang tu vai nei.

¹⁴ Mikmi cu ak htük ah mäih ah a khüt nak ung khüt sei, khäng ciah ngaihgep a om ah a kyak ung Bawi Khrit awn bilo ghawm ciah chang ah mi kyak ci.

¹⁵ Cacim Theing naw, “Nangmi cu tuhngawi Khanpughi ah k’aw nami ng’yak ah a kyak ung kä nami lingkeng vai, nami pupa gui naw khanpughi ami küükneet püi yah ung ami om ah mäih ah kä nami om vai,” ci ne pyein ci.

¹⁶ Khanpughi ah k’aw cu ng’ya lang ne, ng’küükneet püi ciah chang gui cu a u gui ang? Cun gui cu Egypt kho ah kaa Moses naw ang khah law püi ba gui ah chang gui nei.

¹⁷ Khokum phli-kip ung Khanpughi naw am lung she nak gui cu a u gui ang? Cheishoh nak bi ne pui kiang ma ah kyu ne sik ci gui ah kiak ci nei.

¹⁸ Khanpughi naw shaita ne ak phyun nak gui ung, “Häi ne düm nak vai ah kei naw ka peit gui ah kholei ung, ngami cu a ngawi ah phi kä lut tuk khai gui,” a ci nak gui cu a u gui ang? A ni ng’küükneet püi ciah chang gui a pyein ah kä kya ne ang?

¹⁹ Ngahmi cu cun ah kholei ung kä lut tu hlawt khai gui ah mi hmu gui pyi ci, a i ah kyasei ci ung ngami cu kä yum tuk ci gui ah kiak ci.