HEBRU 13 - Cho Bible Common Language 2016

A i Cha ah Khanpughi Yeikyai Sak Vai

¹ Krihta ah kya ne tumat la tumat nami yumhni tu vai nei.

² Nami im kyong ah khin nami m’kai vai cu nami shüm vai nei. Cun ah khin m’htei ci gui cun naw kä ami hmat ah khankho chang cu khin nak ci gui nei.

³ Thawng kium ci gui cu ngami awn a täng ah thawng nami kium tuk ciah mäih ah ngai ne nami shüm gui vai nei. Zaica geinvai ci gui cu ngami awn a täng ah yaica geinvai ah mäih ah ngai ne, nami shüm gui vai nei.

⁴ Chungla nak cu chang avan naw a htingling ah ang ngaih vai nei, Chu la cei cu tumat la tumat bekhüt ne ani om vai. Khanpughi naw cheishoh ci la hlawhlang ciah chang gui cu yuk m’khoichaa gui khai nei.

⁵ Ngui ng’ya hlü aih ne kä nami ghin vai, nami mät ung om ci awn nami ng’büh vai. A i ah kyasei ci ung Khanpughi naw, “Kei naw nang cu kä ka ning hteh ta phung khai, kä ka ning nawng phung khai,” cine a pyein ah hmawk ah kyak ci.

⁶ Cun ah kyasei, “Bawipa cu kei nam htei ciah Bawi ah kyak ci, Kei cu kä ka kyikyawk khai. A u naw kei ah khan ah a i bi hlawt khai ang?

⁷ Khanpughi ah ng’thu ning m’thein law gui te ciah nami ng’vai gui cu, nami shüm gui vai nei. Ami ghin nak la ami sik nak cu vang ngai ba u netah, ami yum nak cu nami thei leh gui vai nei.

⁸ Bawipa Jesuh Khrit cu yanta, tuhngawi, ngawi yä, käng khukhlat phung ci.

⁹ Lam ng’düng ungka lam hma vai ah a hlü hlü ah ami m’theithang nak cu kä nami läk-en vai nei. Ei ei vai ah mawng läk nak vai ah thukhän ah kä kyak ciah, Khanpughi ah m’gein nak awn gah ah thamah nak cu bä ci; acun ah thukhän läk ciah chang gui cu a i sang ung phi kä bä hlawt ci gui.

¹⁰ Khawihnah nak ah Jew chang gui ah kho phung ung bi bik ciah Taigü gui naw, mikmi ah ng’yokiang ung sonkiän phung api ah phi kä ei hning ci gui nei.

¹¹ “Jew chang gui ah Taigü Tung naw, sei me gui ah asi gui cu cheishoh nak küikyan nak vai ah, a Theingcim nak pi Säih ah a law püi ung phi; sei me gui ah pum cu phung ah ak pung ah mei awn m’khih ci ci gui.

¹² Cun ah kyasei Bawipa Jesuh Khrit cu a si ng’hlui awn chang gui ah, cheishoh nak m’si khai ah, mang gaw ah k’pung ah sik nak aut ci.

¹³ Cun ah kyasei mikmi cun phi gaw ah k’pung ah hteit ne, Bawipa ah lü ng’aa nak cu, mi ng’pai tuk khai nei.

¹⁴ A i ah kyasei ci ung mikmi ah hmawk ah khomdek khan ung ng’tüi hnga ciah mang gaw kä om ci; ngawi ah dang lawk khai ah mang gaw cu mi shui shüi yah ci nei.

¹⁵ Cun ah kyasei mikmi naw Bawipa Jesuh cu, Bawipa nei ciah ng’kiaa nak ah m’gawng awn, ani ah ming ung mi m’kümto nak cu ang täi sei Khanpughi am mi ap khai nei.

¹⁶ Akni bi vai lah tumat la tumat ng’hteihtang tu vai cu kä nami m’hnih-en vai nei, cun gui cu Khanpughi naw ng’yak hlü ah vawihpeh nak ah kyak ci nei.

¹⁷ Nami ng’vaihta gui ah ng’thu cu ngai u ne ami pyein ah nami om vai nei. Ngami naw ami bi lawh cu Khanpughi-am m’thein ba khai gui kiasei, kä ng’düm phung ne nangmi cu ning m’htei gui ci gui nei. Nangmi mi naw ami ng’thu cu nami ngaih ah a kyak ung ngahmi cu yeikyai ne bilo khai gui nei, Kä nami ngaih ah a kyak ung ngahmi cu thüisei u sei, nangmi ah hmawk ah a i phi a bä nak kä om khai nei.

¹⁸ Keimi ah hmawk ah angtäi sei nami taigü vai nei. Keimi naw kami m’Lung kyong theingcim ciah akcang ah kami hmat ci. A i ah kiasei ci ung keimi cu angtäi sei ng’düng ci bäng kami bi nak hlü ah hmawk ah kyak ci.

¹⁹ Khanpughi naw kä shou pha sei, kei cu nangmi ah om nak ah, ana tüih law vai ah nami taigü vai ah ka ning m’cäi gui ci nei.

Khüm Nak Taigü

²⁰ Sih nak ung khüt sei ng’ap ne, ng’täi ciah thukhän m’hnüt ne k’bäi ciah Htoshäm Bawi ah kyak ciah, Bawipa Jesuh cu Khanpughi naw, sih nak ungka thawh ba sak pyi ci nei.

²¹ Nangmi naw dimdeeih nak ah Bawi, Khanpughi ah ang yak hlü nami läk nak hning vai ah, nik ci phung avan ning m’shumphyuk gui sä. Bawipa naw a mät ah ng’yak hlü ah mäih ah mikmi cu, Bawipa Jesuh Khrit awn na piangtham gui sä. Bawi Khrit cu Ngawiyä ang’täi sei Bawi mang ne om sä, Amen.

Khüm Nak Thu

²² Phäi nau gui aw, shin ah k’tha peit nak cu hnimgei ne nami ngaih vai ah ka ning paa nah gui ci nei. Tuhbäi ca ka ning guk law gui cu kä ng’sau aih hnga ci nei.

²³ Mi nau Timothi cu thawng ungka phyawng law pyii ci nei ciah ka ning hmat sak gui hlük ci nei. Ani cu agawk law yät ah a kiak ung, nangmi awn ming hmuk khai ah ka law ung, ka khah law püi khai nei.

²⁴ Nami ng’vai gui la Khanpughi ah chang gui avan cu kami yavaih nah gui ci nei. Itali ah kaa phäi nau gui naw phi ning yavaih nah gui ci gui nei.

²⁵ Khanpughi ah chimgein nak cu nami van ah khan ah om sä.