HEBRU 12 - Cho Bible Common Language 2016

Mi Pa Khanpughi

¹ Mikmi ah hmawk ah saksi khai ah chang akda naw nak koi gui ci. Cun ah kyasei mikmi na tüihtook gui ci phung la na shum gui ne mikmi ung kawp ciah shetkat nak phung cu nawtpet netah malam ah ng’bü nak ung gawk vai ah k’tha nakcang ne mi dawng khai nei.”

² Tün nak ungka naw pyii nak ung khüt sei, mi yum nak ah ang yung ah kyak ciah Bawipa Jesuh cu ng’kheing sei mi teng khai nei. Ani cu kutlamtung ah mawng ung käm lung k’si phung ci, Bawipa cu ani ung gawk lawk khai ah yeikyai nak ah hmawk ah kutlam tung ung käng yocho phung ne sih nak aut netah Khanpughi ah mang kiang k’patlam ung ngok ci.

³ Chang shekhaa gui naw a i hlawk ah ami thüigen nak cu ngaih tüh u netah, käng yocho käm lungksi phung ne nami om vai nei.

⁴ Nangmi cu shet katnak ung ng’tuk nami bi nak ung, sih nak ah m’lawi ung kä nami gawk pha hnga ci nei.

⁵ Khanpughi naw a hta ah ning k’hmoh gui ne, k’thamah nak pe ne a ning thu püi gui cu, nami m’hnih ei ci maa? Cun ah thu cu; “Ka hta aw, Bawipa naw a ning m’düng ung, Ngai ne na läk vai nei, A ning m’cäi ung kä na thüisei en vai nei,

⁶ A i ah kyasei ci ung, Bawipa naw am hni ah Chang phung cu m’düng ne, A hta ah k’bäi ne a dou phung cu M’kyuk ci nei,” ciah kyak ci.

⁷ Yaica geinvai nak nami gah cu kami pa naw kami hma anam kyuk nak gui ah kyak ci, ciah nami yum vai nei, nami yaica geinvai nak naw, Khanpughi naw a hta ah a ning k’bäi gui cu dang sak ci. A katnak m’kyuk ne apa naw kä a m’cäi man ah hta a u om ne ang?

⁸ Nangmi cu a hta akcang ah nami kyak ci kyasei, kat m’kyuk ne m’cäi nak kä ah om ah a kyak ung, nangmi cu hta akcang ah kä nami kyak ci, hta ng’bah ah nami kyak ci.

⁹ Hnicim chang mi pa naw hma m’kyuk ne nam cäi gui sei, mikmi naw phi mik chang m’sui ci. Cun ah kyasei mümcha lam ung mi pa ah nam cäi nak gui läi cu ak tung pui ah ngai ne mi ghin püi vai ah kyak ci nei.

¹⁰ Akhin ak tawi hta ah kyong ung hnicim chang mi pa naw bä ciah ang ngaih ah nam cäi gui ci; Cun ung phi Khanpughi naw mikmi ah mi kyom nak vai hmawk ah amät ah mäih ah mi theingcim vai ah nam cäi gui ci.

¹¹ Hma m’kyuk nak mi gah cu yeikyai vai ah kä kyak ci, thüisei vai ah kyak ci. Cun ung phi cun ah hma m’kyuk nak naw ang shung sak pyii ah chang cu chang k’ni ah kya ne dinggei ciah ghin nak gah ci nei.

M’shüm thein nak la khäntan nak gui

¹² Cun ah kyasei cüüm ciah nami kut cu m’cün u ne, gho ciah nami m’khuuk cu khüi sak vä.

¹³ Düng ciah lam ung k’tha nah ne hteit vä, cun ung ng’khem ciah nami kho cu gai om khai nei.

¹⁴ Chang päng awn dimdeeih sei nami om vai ah k’tha nah vä, theing cim sei nami ghin vai phi k’tha nah vä, cun ah kä om ciah chang naw a u naw phi Bawipa cu kä hmuk khai nei.

¹⁵ Khanpughi ah chimgein nak cu a u naw Kä noi maa-en sä. Khak ciah sing naw am äm tui awn chang akda cu yaica sak ci, acun ah mäih ah a u phi kä ah kiak-en vai nei.

¹⁶ A u chang phi om k’she ne, mümcha kä cimvai ciah Esau ah mäih ah kä nami kiak-en vai, ani naw hta k’tak-hnga ah a kyak nak cu, ei m’ka ät ah yoi ci nei.

¹⁷ Nami hmat ah mäih ah, ani cu a ngawi ah apa ah m’shumphyuk nak cu ng’ya ba hlük ci. Cun ung phi kä gah ba hlawt ci, a i ah kiasei ci ung, ani naw chei khai ah abi pyii, a pyan nak ba vai ah lam cu, ang phli tui lut law sei shui ne phi kä hmu hlawt ci nei.

¹⁸ Nangmi cu Israel chang gui ah mäih ah tawnyap thei ah Sinai kho m’htung ung nami gawk ciah kä kyak ci. Cun ah m’htung cu mei m’lei tawt ne, kho m’than ne, puikho khi ne,

¹⁹ phyungheng tum k’aw la khankho k’aw ang thang law nak ah kyak ci. Chang gui naw cun nah k’aw ng’yah u netah, cun kawn ah kä ami ng’yak-en ba vai ah ng’coi ng’paa ci gui.

²⁰ A i ah kyasei ci ung, “Cun ah m’htung cu khisa naw phi a tawn ah a kyak ung lung awn vawi ne ngawn vai,” ciah thukhän cu ami kyih ah hmawk ah kyak ci.

²¹ Cun ah hmuh teng gui cu ang htei ah cäicat vai kya khätah, Moses naw, “Kei cu ng’khlet ne ka kyik ci nei,” cine pyein ci.

²² Cun nak vaisü ung nangmi cu Zion m’htung la angtäi ghing ciah Khanpughi ah mang gaw, Khankho Jerusalem, kä khei tai vai ah khanchang gui ah om nak ah nami gawk ci nei.

²³ Nangmi cu Khankho ah ang ming ami guk ah Khanpughi ah hta ak tahnga gui ami ng’bum nak ah yeikyai ne nami gawk pyii ci nei. Nangmi cu hnicim chang avan m’khoichak ciah Khanpughi la kümbe ciah chang gui ah mümcha gui ah om nak ah nami gawk pyii ci nei.

²⁴ Nangmi cu thukhän k’thai pyang ciah ah Bawipa Jesuh la Abel ah si ah mä bä pi ciah shaitaak nak om ciah si ng’hlui ah ng’peh nak ung nami gawk pyii ci nei.

²⁵ Nangmi cu thu k’aw ng’yak vai noi mak ciah chang ah kä nami kiak vai ah nami geing nak vai nei. Khomdek khan ung khankho thu ngaih yak vai ah mak ciah chang gui cu kä phyawng ci gui nei. Cun ah kiasei mikmi naw Khankho ah kaa ng’thu pyein lawk ci cu, mi hnu nak ah a kyak ung a i ung phi kä mi phyawng hlawt khai nei.

²⁶ Cun sang ung Khanpughi ah ng’thu naw khomdek cu thüng sak ci nei. Cun bäng ah kä kyak ciah, tuk bäi, Bawipa naw, “Kei naw hnü ät mä, khomdek bäng ah kä kya ciah, khankho phi ka thüng sak khai nei,” cine shai a taak om ci.

²⁷ “Hnü ät mä,” ciah thu m’kha naw ang dang sak cu, a tüi sho gui avan ng’tum sei thüng sak gui netah, m’hnawng gui khai, cun ung kä thük tuk ci gui cu k’pawih shüt khai gui, ciah kiak ci.

²⁸ Mikmi cu kä thüng hlawt ciah uknak kho mi gah pyii ciah kia sei, Khanpughi mi m’hlüngtai khai nei. Mikmi naw kyih aa nak la m’tamkhah nak awn, Khanpughi cu mi khawihnah khai nei.

²⁹ A i ah kyasei ci ung mikmi ah Khanpughi cu m’khih ne ui ciah mei akcang ah kyak ci nei.