HEBRU 10 - Cho Bible Common Language 2016

¹ Jew thukhän gui cu be ci la bekhüt ciah akcang gui ah kä kyak ci: gawk lawk khai ah nikiom nak gui ah püpüi gui ah kyak ci. Thukhän ah ciah akum täi sei küikyan nak cu bi ah kiak ci. Cun ung a i hawkcha ah thukhän naw, Khanpughi ah lawk ciah chang gui cu, kümbe sak gui khai aw?

² A vai sü ah Khanpughi khawihnah ciah chang gui ah ami cheishoh nak cu, thukhän naw akcang ah theing cim sak ciah a kyak ung, cun ah chang gui naw ngami ung cheishoh nak kä om ba ciah ngai u ne, küikyan nak kä bi ba khai gui ah kyak ci.

³ Cun ah a kum tä sei küikyan nak vai ami bi nak naw chang gui ah cheishoh nak cu m’shüm thein ba gui ci.

⁴ A i ah kyasei ci ung sei ah si la me ah si naw cheishoh nak cu kä nawtpet hlawt ci nei.

⁵ Cun ah kyasei Bawi Khrit naw khomdek khan ung a kyum law sangung Khanpughi ah ma ah; “Nang naw küikyan ghutha nak la peittaak nak cu kä na ng’ya hlük ci nei, Cung ung phi kei ah hmawk ah pumsa nam hnüt pyii ci nei.

⁶ “Nang naw sei me awn m’khih ne ghuthaa nak la Zo kyaang ung vawihpeh nak awn cheishoh nak nawtpet ci cu kä nam hni ci nei.

⁷ Cun ah kyasei thukhän ung kei ah mawng ami guk ah mäih ah, “O Khanpughi, Na ng’yak hlü ka bik khai ah, shin ung ka om ci nei, cine ka pyein ci,” ciah kyak ci.

⁸ Akhtük bäih ah Bawipa naw, “Ghuthaa nak, peittaak nak, sei me m’khih ne kiang ung vawihpeh nak gui la cheishoh nak gui cu ghuthaa nak awn nawtpet nei, ci gui cu, thukhän ah ng’shui ah bi ah kia pang sei phi, Khanpughi naw kä am hni, kä ang yak hlü ah kiakci nei.

⁹ Cun kawn ah ani naw, “O Khanpughi nang yak hlü ka bik khai ah, shin ung ka om ci nei,” cine pyein ci. Cun ah kyasei Khanpughi naw, cäu ghuthaa nak man gui phung ghu shüt netah, Bawi Khrit naw ng’ap ne a küikyan nak awn am thon ah kyak ci.

¹⁰ Bawipa Jesuh Khrit naw Khanpughi ah ang yak hlü läk ne, amät ah pumsa cu, ang bäng ge ah ap ne a peit ah kyasei, mikmi cu theingcim nak mi gah ci.

¹¹ Jew taigü pängpäng naw ak hnüüp tä sei, apeitaak vai la am ghuthaa vawihpeh vai cu bik ci; cun ung phi cun ah ghuthaa nak naw cheishoh nak cu kä nawtpet hlawt ci.

¹² Cun ung phi Bawi Khrit naw hnü ät ang bängah küikyan nak bi ne, cheishoh nak cu nawtpet ci. Hta ng’shon ung ng’täi ciah ng’ap nak phi bik ci, cun kawn ah Khanpughi ah k’pat lam ung kai ne ngok ci.

¹³ Acun ung aga gui avan a kho kaa ah, Khanpughi naw a gawk sak güt ung ngäng ci nei.

¹⁴ Hnü ät ang bäng ah a küikyan nak awn, theingcim nak gah ci gui cu, angtäi sei kümbe sak gui ci.

¹⁵ Cun kawn ah Mumcha Theing naw phi saksi ana peit nak gui ung ak htükbäih ah,

¹⁶ “Bawipa naw, Shin cu lawk ciah kho hnüüp ung ngami awn shaitaak nak ka bi vai kyak ci nei: Kang thukhän cu ami m’sin ung chum ne, Ami m’lung ung ca awn ka guk khai nei,” cine pyein ci.

¹⁷ Cun kawn ah Bawipa naw, “Ngahmi ah cheishoh nak la shetkat nak gui phung cu kä ka shümba khai nei,” cine pyein ci.

¹⁸ Cun ah cheishoh nak ung kaa, m’geinsei nak a om kawn ah, cheishoh ah hmawk ah ghuthaa vawihpeh vai cu kä hlü ba ci nei.

Khanpughi ah Pei ah Ming Et Khai Nei

¹⁹ Cun ah kyasei ka phäinau gui aw, Bawipa Jesuh a sih nak awn mik mi cu kümbe ciah pängye ne Hmun Theing Säih ung mi gawk ci.

²⁰ Bawipa naw amät ah pumsa ah kyak ciah yihdung cu lim ne, lam thai, ghin nak ah lam cu nak hmawn pe gui ci.

²¹ Mikmi ung Khanpughi ah mang im uk ciah küikyang ciah taigü om ci.

²² Cun ah kyasei mikmi cu mi m’lung ngaih theingcim sak ne, mi pumsa tuikci awn m’si netah, ng’cim ciah m’lung, ng’htei ciah yum nak awn, Khanpughi ah pei ah ming et khai nei.

²³ Mikmi cu Khanpughi ah shaitaak kutshum ne mi ng’ap hning pyi ciah kyasei, mi yum la mi ngaih u nak cu khäng khai ah mi kut shum khai nei.

²⁴ Mikmi cu tumat la tumat mi ng’tengkhen tu u neh, mi ng’hteihtang tu u neh, mi ng’yumhni tu u ne, ni kyom ne mi om khai nei.

²⁵ Mi ng’hmuhteng kyumbom nak cu chang m’shah gui ah mäih ah kä mi nawng nüt ten neh, tumat la tumat k’thamah nak ming pe tuk khai, nami hmat ah mäih ah Bawipa ah Hnüüp phi ng’et law pi ci kia sei, tha ng’pe tu ne mi om khai nei.

²⁶ Mikmi cu düng nak mi hmat kawn ah a guih ah mi cheishoh ba ah a kiak ung katnak küikyan nak vai a i kä om ba khai nei.

²⁷ Mikmi naw m’khoichaa nak la Khanpughi hnungtuk püi ciah chang gui m’khih gui khai ah meiksam cu kyih en vüih vüih ne mi ngäng khai ah kyak ci nei.

²⁸ Moses ah thukhän kä läk ciah chang tumat cu hnih thum saksi sei, akat nak ang dang ah a kyak ung, m’gein nak kä om sei sih nak pek ci gui nei.

²⁹ Khanpughi ah Htapa cu päipih ne, katnak theing sak ne Khanpughi ah thukhän thai ah kyak ciah si ng’hlui cu gaih m’gin ne, m’gein nak m’kyum lawk ciah Mumcha shetkat nak ci naw, a i hlawk ah nuipai ciah shetkat nak gah khai cicu nami ngaihtüh shüm vai nei.

³⁰ “Kei naw phu phi ka tuk khai, pu phi ka thung khai, cine, Khanpughi naw ak chang gui cu ng’thumcha gui khai nei, ciah Bawipa cu mi hmat ci nei.

³¹ Ghin ciah Khanpughi ah kut khui ung kyumkiak cu kyihkyawk aih vai ah kyak ci nei.

³² Zan ä kho hnüüp gui cu ngai ne shüm ba vä, cun yah ung nangmi cu Khanpughi ah ak dei nami hmuh kawn ah yaica nak akda nami gah ung phi, cun naw kä ning m’dimshum gui hlawt ci.

³³ Nangmi cu chang ah ma ah päipih shedam nak nami gah ci, cun ung phi päipih shedam nak gah lawk ci a om ung nami m’gein tuk ci.

³⁴ Nangmi naw thawng ung cun ci gui cu nami chimgein ci, nami khawhcham avan ami ning khäm peit gui ung phi yei ne nami om düt ci, a i ah kyasei ci ung nangmi ung cun ah khawh chaam gui ah tah küikyang pi ne, käng pyii hlawt ciah khawh a om cu nami hmat ah hmawk ah kyak ci.

³⁵ Cun ah kyasei khüighaat ne om vä, cun ung m’cümhnah nak ak bä pi nami gah khai.

³⁶ Khanpughi ah ang yaak hlü bi hning vai la a shaaitaak gah hning vai ah hnimgei ne om vä.

³⁷ Cacim theing ung; “Kä shou pha sei kium lawk khai ah Bawipa cu lawk khai nei; Ani cu kä shokshü khai nei.

³⁸ Ng’düng ciah kakchang gui cu yum ne ghing khai gui nei; Cung ung phi ng’hlat ba ciah chang läi cu, kei naw kä ka yei nak khai nei,” ciah om ci.

³⁹ Mikmi cu hnu ah ng’hlat ba ne chükmaih ciah chang ah kä mi kiak ci, yum ne hun nak gah ciah mi kyak ci.