HEBRU 1 - Cho Bible Common Language 2016

A Htapa ung am shäk law ah Khanpughi ah Thu

¹ Caä Phanpughi naw, akda vei, a mawng a hei hei awn, profet gui ung, mi pupa gui am thu m’shäk law man ci.

² Cun ung phi shin ah ak hnubäih hnüüp gui ung läi A Htapa ung thu m’shäk lawk ci nei. A Htapa awn khopuui cu tüisho ne, kho ah kaa avan cu khäm khai ah Khanpughi naw A Htapa cu ghü ne m’düih ci.

³ Ahtapa cu Khanpughi ah bämang nak awn pyü ne ng’shü ci, ani cu Khanpughi ah müi akcang ah a kya nak ah hlüngtai ciah ang thu awn, khopuui avan cu khän sak ci. Hnicim chang ah shekat nak gui avan m’gein ne ak phiawn gui kawn ah, khan mawpi ah a hlüngtai säih ah Khanpughi ah k’pat lam ah ngok ci nei.

Khanpughi ah Htapa ah Küikyang Nak

⁴ Ahtapa cu khanchang gui ah küikyang pi khai ah tüi m’hnüt ne, aming cun phi küikyang pi khai ah Khanpughi naw pek ci.

⁵ Khanpughi naw a u khanchang am phi, “Nang cu ka ning Htapa nei; tuhngawi kei cu nang ah Pa ah ka kya lawk ci,” cine kä pyein man ci. A i khanchang ah mawng ung phi Khanpughi naw, “Kei cu ani ah Pa ah ka kyak khai, ani cu kei ah Htapa ah kyak khai,” ci ne kä pyein man ci.

⁶ Cun ung phi Khanpughi naw ng’tüi htük ciah A Htapa cu m’dekhan ah a tüih law vai ung, “Khanpughi ah khanchang avan naw, Ani cu ami khawihnah vai nei”, ci ne pyein ci.

⁷ Cun ung phi khanchang gui ah mawng a pyein nak ung, “Khanpughi naw ak khanchang gui cu, khokhi ah pyang gui ne, ak changshäm gui cu meidäi ah pyang gui ci,” ci ne pyein ci.

⁸ Cun ung phi A Htapa ah mawng a pyein nak läi ung Khanpughi naw, “O Khanpughi, na uknak ah kho cu, ang täi sei khäng khai nei! Nang naw na chang gui cu ng’müi khai ah Na uk gui ci nei.

⁹ Nang naw akcang cu m’hni ne, cheishoh cicu na thüi nak ci nei. Cun ah kyasei Khanpughi, na Khanpughi naw, nang cu ning ghü ne, Na paw gui ah tah küikyang pi khai ah, ning m’tamkhah ne, yeikyai nak cu ning pek ci”, cik ci.

¹⁰ Cun kawn ah Khanpughi naw, “Nang Bawipa naw ak htük bäih ah Khomdek cu na tüisho ci, Khan mawpi phi na mät ah kut awn na pyang ci.

¹¹ Cun gui cu ng’kawn yawp khai gui, Cun ung phi nang cu na om lä khai; Ngahmi cu suisak ah mäih ah kheei lawk khai gui.

¹² Nang naw yihphak cho ah mäih ah ngahmi cu na cho gui khai, Ngahmi cu suisak ah mäih ah ng’lat yawp khai gui. Cun ung phi nang cu kä na khukhlat ci, Na ghin nak cu kä ng’pyi hlawt ci nei.”

¹³ Khanpughi naw, a u khanchang am phi, “Na gaa gui avan na kho kaa ah, Kä ka gawk sak gui yawp pha ah chuih, Ka k’pat lam ah na ngoh vai nei,” ci ne kä kyak na man ci.

¹⁴ Cun ung khanchang gui cu, a i gui ang? Ngami cu hun nak gah ciah chang gui m’hteihtang gui khai ah Khanpughi naw a tüih gui ah, Khanpughi ah khuut bik ciah mümcha gui ah kyak ci.