HAKKAI 2 - Cho Bible Common Language 2016

Taigüim K’thai ah Ng’shü Khang Nak

¹ A cu kum a cha chih nak, a hnüüp m’ku lei ät nak ung Bawipa naw prophet Hakkai ung thu pyen ba ci.

² Zerubabel Judah uktu bawi ni, Joshua taigütung ni, chang gui ni, ah ma ah Hakkai naw ng’thu a pyen vai ah Khanpughi naw m’cäi ci.

³ “Taigüim a i ah mäih ah ng’shü khang man ci, cicu nangmi ungka shüm ba ci om ne ang? Nangmi naw tuhbäi a i ah mäih ah ang nami hmuh? A i ah phi kä ng’hmat ciah mäih ah kyak ci nei.

⁴ Cun ung phi tuhbäi a u phi kä nami kyak düt vai. Bii nami bi vai, ka ning om püi gui khai.

⁵ Egypt ah kaa nami law ba yah ung angtäi ah ka ning om püi gui khai, cine shai ka tak ci. Tuhbäi phi ka ning om püi gui ci kä nami kyih vai.

⁶ “Khomdek la khakho, tuinu la khawkawng, kä ka thüng sak pha hta ng’lung ung,

⁷ changpakhui avan cu k’thäh gui ne, ami khawh avan cu ka law püi sak gui khai, Taigüim cu khawh awn be khai.

⁸ M’dek ah khan ung ghui la ngui avan cu kei ah kaa ah kyak ci.

⁹ Taigüim akthai cu ayan ak phyim ah ta ng’shü khang pi khai, acun ungka chang gui am bühmang nak la dimdeeih nak cu ka pe gui khai.” M’gäi ciah Bawipa naw pyen ci.

Prophet naw Tagü am shümthein nak

¹⁰ Darius ah uknak a kum goi nak, a cha kaw nak a hnüüp m’ku lei phli hnüüp ung, hlüngtai ciah Bawipa naw prophet Hakkai am cäi ba cu,

¹¹ “Taigü gui cu uknak ah mawng shikcha ah na ng’shi gui vai,

¹² Avaisü ah chang tumat naw, tehing ciah meh cu vawihpeh nak ungka la ne, a suinu awn hlawp ne law püi khäta, m’htut, buh, sapyit tui, situi la ei vai phung cu a suinu naw a tawn ah a kyak ung, cun gui cu theing tuk khai gui ang?” Acun ah ng’shi gui khäta taigü gui naw, “Ka nei” cik ci gui.

¹³ Hakkai naw, “Chang aksii bi ne kätheing ciah chang naw, ei vai a bi ung, acun mä kätheingcim khai ma? cine ng’shi ba gui sei, taigü gui naw, “ä” cik ci gui.

¹⁴ Hakkai naw, “Bawipa naw pyen ci, “shin ah khaw ung chang gui cu acun na kyak ci gui, ami bilawh phi acun ah kyak ci. Sonkyang ung ami vawihpeh phung phi lelawi ci” cik ci.

Am shum phyuk nak Bawipa ah shaitak

¹⁵ Bawipa naw pyen ci, “Nangmi ung a i ah kya lawk ciah kä nami hmu hning ne ma? Taigüim tün ne kä nami cawh ba pha ung ngaih tüh ba vä,

¹⁶ Hmin ciah htang phia goi nami law nak man ung a phia bäng law ba ci. Sapyit tui k’am ung a phya nami law nak man ungka, k’am phlikip bäng law ba ci.

¹⁷ Kei naw ng’liing ciah khokhi, kho k’aa awn nami geit phung m’di ne, ka ning m’di gui ci. Cun ung phi nangmi kä nami ng’yuu ba ci.

¹⁸ Tuhngawi cu Taigüim lungtung k’süm, a küm nak ah a cha kaw nak, a hnüüp m’ku lei phi nak ah kyak ci. Tuhbäi ung tün ne ma lam ung a i ah a kyak law ah teng shüm vä.

¹⁹ Paan ung htang kä om ci, Sapyit, thei he, olive sing kä m’theih phak ci. Cun ung phi tuhbäi ung tün ne, hrilham ka ning pe gui khai” cik ci.

Zerubbabel am Bawipa ah shaitak

²⁰ Acun ah hnüüp, cun ah cha ah hnüüp m’ku lei phli ung Bawipa naw a hnih vei nak ah Hakkai cu ngh’thu püi ci.

²¹ Judah uktu bawi, Zerubbabel am na m’thein vai, “Kei naw khankho la khomdek ka k’thüng lawk khai,

²² uknak khaw gui avan lat ne, ami huham ka ng’pyi sak khai. Ng’hlee gui la kaih ci gui ka lat gui khai, ami ng’se gui sik khai gui, ng’cuum ci gui ng’ngawn tuk khai gui.

²³ A cu hnüüp ung Zerubbabel, ka chang shäm, nang cu ning la ne, ka ming awn uktu ah ka ning m’tüih khai, nang cu ka ning ghü pyi ci nei” cine hlüngtai ciah Bawipa naw pyen ci.