HABAKKUK 3 - Cho Bible Common Language 2016

Habakkuk ah Taigü

¹ Shin cu prophet Habakkuk ah taigü ah kyak ci.

² O Bawipa, na bi cu ng’ya ne, kei cu kyih aa nak awn ka be ci nei, tuhbäi bi law ba ä keimi ah khin ung, dämduh ciah hnünthawh na bilawh man cu. Na m’lungshe ung phi na chimgein gui ä.

³ Khanpughi cu Edom khaw ah ka law ba ci nei; Khanpughi theing cu Paran m’htung ah ka kyum lawk ci nei, Ani ah hlüngtai nak naw khankho cu küm ci’ khomdek cu ani m’taam nak awn be ci nei.

⁴ Ani cu pyü ne ng’shü ne lawk ci, akut ung lailäp ne ng’shü ci nei, a cun ung a huham cu thup ci nei.

⁵ Ani naw natnak cu tüi law ma ci, sik nak naw a läk law vai ah ng’thumkhän ci.

⁶ Ani ang düm ung shihpi thüng ci; Ani ah yei nak ung chang pakhui gui ng’hlet ci gui. Angtäi ah om ciah khomhtung gui cu pyawn u ne; angtäi om ciah khogui gui kyeim ci gui, m’htung gui cu cau pui tün ne ani ah hteh nak ah kyak ci.

⁷ Kuhshan chang gui cu kyi u ne, Midian chang gui cu ng’hlet u sei ka hmu gui ci.

⁸ Bawipa, tuinu gui naw na m’lung ning shet sak u ne ma? Tuilinu gui naw na m’lung ning so sak u ne ma? Nang cu khongmei ah khan ah na ng’cum ci; puikho khi cu na ng’hlee ah kyak ci nang naw na chang gui ah näng nak na law püi ci.

⁹ Nang naw na li na m’cuung ge ci, Na m’la phun ge ne na kap vai ci, Na kho lailäp naw khomdek ng’hmawn sak ci.

¹⁰ Khomhtung gui naw ami ning hmuh ung ng’thüng ci gui, khomik ungka tui phu ne kya lawk ci. Khomdek ah kaa ah tui gui gaai ci gui, ami tui hnawk gui ak hlüng tho lawk ci.

¹¹ Ng’ghin ne yong ciah na m’la ah lailäp la, khang ciah na k’htei ah ang shü ung, hni la cha cu ng’düm ci goi nei.

¹² Na m’lung she nak awn khomdek cu kaan ne, na nget nak awn chang pakhui gui cu na kaai nak ci.

¹³ Na chang gui na hun gui khai ah na hteit ci, na ghü ah ghangpughang phi na hun khai, changshe gui ah ami ng’vai gui cu nang naw hniim ne, ani läk ci gui cu na m’di yawp ci.

¹⁴ Na m’la naw gabawi cu kaang ci nei, na k’phyitpai gui khai ah khokhi nu ah mäih ah a law yah ung. Dukhaih ci gui shedam nak ciah mäih ah teng m’shuk ci nei.

¹⁵ Na ng’se gui awn tuinu na kai nak ci, chün ciah tuinu cu m’naw ci nei.

¹⁶ A cun gui ng’ya neta kei cu ka ng’hlet ci; ka kyih su ah ka m’nei phi ng’haam ci, ka pumsa phi ng’yai ci. Ka mät ah kaa ah ka khaw ka m’thuih ci. Gawk lawk khai ah akhin cu kei naw düm ah ka ngäng khai, cun cu na ng’tuk püi gui ci cu Khanpughi naw am kyuk nak gui ah kyak khai.

¹⁷ Thei gui kä a m’theih ba ung phi, Sapyit gui kä a ng’shun ba ung phi, Olive sing theih a kyawi yawp ung phi, lolai ung geit kä a thawh ba ung phi, htome gui avan a sih yawp ung phi, sei ng’vong gui a ghawng yawp ung phi.

¹⁸ Kei cu ka yeikyai lä khai nei, a i ah kyasei ci ung Bawipa Khanpughi cu ka Hunbawi ah kyak ci.

¹⁹ Uktu Bawipa naw thagui na pek ci. Kigang ah mäih ah ka khaw na yaang sak ci. Khomhtung gui ah khan ah k’pang ne nak phyawn ci.