HABAKKUK 2 - Cho Bible Common Language 2016

Bawipa naw Habakkuk am shan nak

¹ Kei cu ka nayi tänghän ung kai neta, Bawipa naw a i ng’thu ana m’thein law laka ng’shi nak ah khan ah a i ah ana m’shan law ah ka ngai khai.

² Bawipa naw shin ah na m’shang ci: “Chang naw akni ah a phat hning vai ah ka ng’thu m’than cu lung ng’htei khai ah na guk vai nei.

³ Gu ne na gim vai, aküm nak ah khin kä gawk law phak ci. Cun ung phi ka ning m’dang aküm nak vai ah akhin cu ang ghit ah gawk lawk khai. A law nak ung api ah a shokshü ung phi, na gin vai, akcang ah gawk lawk khai, kä hleei khai.

⁴ Cun ah ng’thu ung, ‘Shekak ci gui cu kä ghing ba khai gui, ng’düng ciah chang gui cu ghing khai gui, a i ah kyasei ci ung ngami cu Khanpughi ung bekhüt ci gui’ ” ciah om ci.

Kä düng ci gui ah khan ah Khaw ah Ng’yiin nak

⁵ Mang cicu theileh ci, m’gäi cicu chang ah ng’shei ci, pheetlah ci. Sih nak ah mäih ah ami ng’büh nak kä om ci, a i ah kyasei ci ung ngami naw changpakhui päng tu ne khäm ci gui.

⁶ Ami näng gui naw näng ci gui cu gaih tuk ci gui, shemshai ci gui, shemshai ci gui. Ngami naw, “Kä nami kaa nami lak ci, nangmi cu ng’yiin ciah chang ah nami kyak ci, Nangmi cu a i güt aphu nami gah vai ang’ceet ah shang ba ne, ng’bühmang ne nami om khai ang?”

⁷ Kä cun pha ung nangmi naw nami hmat ci, näng ciah chang gui nami mät nami pu om ci, Cun cu ang’ceet ah ning shang ba gui khai gui, alawn phi nami pek khai. Nami ga gui naw law ne ning ga gui khai gui, ning guttep gui khai gui.

⁸ Nangmi naw changpakhui akda nami guttep ci, tuhbäi om ba ci gui naw ning guttep tuba gui khai gui. Chang nami ngawn ah phäh la m’dek chang gui hnungtuk püi ne ami mang gaw gui nami m’shet ah phäh ah ning ci tuba gui khai gui.

⁹ Nangmi nami ng’yiin ci! kyawi m’sa u ne nami kyong khui nami bühmang sak ci. Nami mät ah kyong bäng ng’ä ai nak la kyihkyawk nak ung a phyawn vai ah nami tha nak ci.

¹⁰ Cun ung phi nami katnak naw nami kyong ning thui ng’aa sak gui ci. Chang ah pakhui akda nami m’di nak awn nami mät ah khan ah shetkat nak nami law püi ci.

¹¹ K’paang ungka lung gui naw ning kyap ne ning hnungtuk püi gui sei, ng’lawng dang piang ci gui ah kyah shalawng ci.

¹² Nangmi cu nami ng’yiin ci! Nami mang gaw cu cheishoh nak awn kümbe ci, ngawn sih nak awn nami co ci.

¹³ Nami nang gui ah pakhui gui cu, ami thagui akholä ah kia ne, ami cawh kyan avan cu mei m’lei ah kya yawp ci. Cun cu m’gäi ciah Bawipa ah bi ah kyak ci.

¹⁴ Cun ung phi tuinu ung tui abe ah mäih ah khomdek cu Bawipa ah bämang nak ah hmuhmat nak awn be khai.

¹⁵ Nangmi cu nami ng’yiin ci! Nami m’lung she nak awn nami pei ng’leng ah chang gui cu ng’dawk phah sak ne nami thüisei sak ci, awktat ciah mäih ah kyu shüi shüi khai ah nami ci gui ci.

¹⁶ Nangmi cu m’taam khah nak vaisü ung thui ng’aa nak naw ning küm gui khai nei. Nami mät cu aw u ne, nami kyu shüi shüi khai nei. Bawipa naw nami mät ah khap awn m’kyuk nak ning tu gui khai, Nami ng’taamkhah nak cu ng’yochaw nak ah ng’lat khai nei.

¹⁷ Nangmi naw Lebanon khawbung nami k’paai ci, tuhbäi nangmi ning k’paai ba gui khai. Nangmi naw akhisa gui nami ngawn ci, tuhbäi khisa naw ning plawh ba gui khai. Shin gui cu kya lawk khai, a i ah kyasei ci ung nami ngawn ah phih la, m’dek khan chang gui la ami mang gaw gui akshe ah nami hnungtuk püi ah phäh ah kyak ci nei.

¹⁸ Agup cu a i ah mang vai ang? Cun cu chang ah pyan ah kyak ci, cun naw a i phi kä ning m’thein gui khai, cun ung phi ning m’hleei gui khai. Ani yum ciah pyang ciam, ani naw nik ci a i ang abi pek, ani cu ng’thu ah phi kä ng’thu thei ciah khanpughi ah kyak ci!

¹⁹ Nangmi cu nami ng’yiin ci! Sing akpii am, “Tho vä!” nami cik ci. Lung shep ne pyan am, “Ng’düi ä!” nami cik ci. Cun ah agup naw ng’thu ning m’than ba gui hning ne ang? Ani cu ghui la ngui awn hluk ah kyak ci, cun ung phi akyong ah ghin nak kä om ci.

²⁰ Bawipa cu theingciim ciah a Taigüim ung om ci, m’dek chang phung cu adüm ah ama ah mi kawp khai nei.