HABAKKUK 1 - Cho Bible Common Language 2016

¹ Shin cu Prophet Habakkuk ah ma ah Bawipa naw ng’thu am than ah kyak ci.

Kä Taga ciah mawng Habakkuk ah Ng’thu M’da

² O Bawipa, ka ng’thu ng’ya ne na na m’htei vai, kyawi m’sa nak ung na na hun vai ah, a i güt ka ning khü vai ang?

³ A i ah kyasei shin ah yaica nak na na hmuh sak ang? A i cha ah shin ah mäih cheishoh nak ung na teng düt ne na om ang? Dishum nak, kyawi m’sa nak gui naw na kyung ci nei. Kho päng ung ng’tuk nak la ng’vok nak bäng ah kyak ci nei.

⁴ Thukhän cu ng’yom ci, a i ah kä mawng ci, taga ciah m’khoicha nak kä om ci, changshe gui naw changnigui ah ni nak cu la u sei, taga nak cu ng’lat yawp ci.

Khanpughi ah M’shan nak

⁵ Bawipa naw a chang gui am, “Nami pei ng’leng ah pakhui gui cu teng vä, Nami hmuh gui ung nami cäi khai nei. Nangmi naw nami ng’yak ung kä nami yum hlawt vai cu kei naw ka bi lawk khai nei.

⁶ Kei naw Babilonian chang gui cu ka huham mah sak gui khai. Ngami cu theek ne pheet ci gui, Ngami naw khaw kaan ne a khaw hei phi näng khai gui nei.

⁷ Ngami cu kyikyawk ne püigai u ne, chang ah ami ng’shei nak naw ami mät m’khoicha gui ci nei.

⁸ “Ami ng’se gui cu kawng hta ah yaangkhai pi u ne, ei cawi ciah hngei ah ta nget pi ci gui nei. Ng’se cuum ci gui cu a shou nak ah kaa, ng’se awn ng’phäi lawk khai gui, ami k’se gui cu m’dek ung ng’laih khai gui. Ngami cu a i baw lo ne ei khai ah langta ah mäih ah ng’phäi lawk khai gui.

⁹ “Ngami ah gakap gui cu kyih vai ah näng nak awn ma law u sei, chang van naw kyih gui khai nei. Ami pha ah chang gui cu laigin chü lawk khai gui.

¹⁰ Ngami naw ghangpughang täitawk u ne, bawi ng’vai gui phi gaih tuk khai gui. Ngami cu a i gawnu naw phi kä k’büüp gui hlawt khai — ngami naw khomdek kai nak vai ah piang ne khäm khai gui.

¹¹ Ngami cu khokhi ah mäih ah maih ne ng’kawn ci gui. Ami mät ah huham cu ami Khanpughi ah kyak ci nei.”

Habakkuk naw Khanpughi ah Ng’thu m’kai ba mä ci

¹² Bawipa, nang cu a htük ge ung Khanpughi ah na kyak ci. Nang cu ka Khanpughi, ng’ciim ne angtäi ah na ghing ci, Bawipa, ka Khanpughi la ka ng’yii nak, nang naw Babilonian gui cu ghü gui ne, na k’thamah sak gui ci. Cun ah kia nei keimi na m’kyuk gui ci gui.

¹³ Shin ah changshe gui, kä bekhüt ci gui, a i ah kyasei na ng’düih püi gui ang? Na mik cu theing ciim ci, akshe kä na teng hlük ci, cheishoh nak bik ciah chang täng ah kä na ng’düi ci, Ngami naw ami mät ah mä yum pi ciah chang ami m’di yah ung, a i ah kyasei adüm ah na om ang?

¹⁴ Uk ne m’htei khai kä om ciah nga la m’kyiit hlom ah mäih ah kyak ciah chang gui cu a i cha ah na m’htei gui khai ang?

¹⁵ Babilonian gui naw chang gui cu, nga ah mäih ah ngamkaih awn pha gui ci gui, Ngami naw ng’vai awn pha ne hlawp gui ne yei ci gui.

¹⁶ Ngami naw ami ng’vai cu khawihnah u ne, vawihpeh ci gui, a i ah kyasei ci ung a cun naw akni pi apäng a gah sak gui ah hmawk ah kyak ci.

¹⁷ Ngami naw ami khim kawt lä ne, chang ah hta avan cu kä m’gein ne m’di lä khai gui ma?