EZRA 9 - Cho Bible Common Language 2016

Kä Jew Chang gui awn Ami Ng’chungla cu Ezra naw Hmu Ng’yak ci

¹ Shin gui avan bi pyi kawn ah Israel chang gui ah ami ng’vai gui amshah cu law u ne, ami na m’thein law cu chang gui taigü gui la Levit gui cu ami pei yung ah khaw ah kyak ciah Ammon, Moab la Egypt khaw gui awn phi kya, Kanaanit gui, hittit gui, Perizzit gui, Jebusit gui la Amorit gui awn, phi ky a, ami mät ng’khoi chak khai gui ah kä om ci gui. Ngami cu cun ah chang gui naw shemshai ci gui, ami bi man ah mäih bä ah bik ci gui.

² Jew chang gui cu akhohei chang hnumi gui awn ng’chungla ci gui. Cun ah kya ne Khanpughi ah theingcim ciah a chang gui cu sheka lawk ci gui. Ang vai gui la bawi gui cu khawngmang ciah ng’vaipi ah kyak ci gui.

³ Cun cu ng’ya neta ka sui gui k’teek ne ayä ne, ka lu mu la ka m’khamu k’bawt ne thüi aih ne ka ngok ci.

⁴ Kei cu acun ung mühun täng ah khawihnah nak douthak vai ung khüt sei thüi ne ka ngok ci. Chang gui naw tün ne ng’bum ne nak koi ci gui — chang gui ami van kyik ci gui. A i ah kyasei ci ung omktu khaw ah ka law ba ci gui ah katnak ah mawng Israel Khanpughi naw a pyen ah phäh ah kyak ci.

⁵ Mühun täng khawihnah nak akhin gawk law khäta, thüi ne ka ngoh nak ungka tho law ne, sui teek sui ne, m’khukdong ne, taigü ne Bawipa kakhanpughi ah ka kut ka shäng ci.

⁶ Kei naw, “O Khanpughi, nang ah ma ah ka lu ka tä law vai ah ka ng’aa aih ci nei. Kami katnak cu ng’pum ci nei, kami lu ah ta hlüng pi ci nei. Khankho ah mäih ah hlüng lawk ci nei.

⁷ Cau kami pupa gui ung tün ne tuhbäi ung khüt khai ah keimi na na chang gui cu, aknui ah kami kak ci nei, Kami kat ah hmawk ah keimi, kami ghangpughang gui la kami taigü gui, khaw hei ghangpughang gui ah kut ung, kami gawk ci nei. Ami na ngawn shep gui, ami na guttep gui, la pha ne ami na hteh püi gui ah kyak ci nei.

⁸ Tuhbäi akhin aktawi ung, O Bawipa, Kami Khnapughi, nang cu keimi ah khan ah na bä ci nei. Keimi amshah cu khlei htein ungka na nak phyawn sak gui ci. Shin ah theingcim ciah hmun ung phyawng ne na na om sak gui ci. Nang naw khleihtein ungka nak phyawn gui ne, ghin nak ak thai na na pe gui ci.

⁹ Keimi khleihtein ah kami kyak ci. Cun ung phi nang naw khleihteinung kä na na nawng gui ci. Persia ghangpughang gui naw na hmai kyang na gui khai gui ah nang naw na bik ci. Ghing ne hteh ba sak gui ne, didap ciah na Taigüim na na cawh ba sak gui ci. Shin ah Judah la Jerusalem ung phyawng ne om vai ah na na m’htei gui ci.

¹⁰ “Cun ung phi tuhbäi O Khanpughi, shin gui avan a kyak ei kawn ah keimi ai kami pyen hning khai aw, Nnang ah thumkhän cu kä kami ngai ba mä ci nei.

¹¹ Cun cu na changshäm prophet gui ung na na pek gui ah kyak ci, keimi maw kami khäm law vai ah khaw cu kä theingthap ciah khaw ah ngami mi naw na m’thein gui ci gui nei, a i ah kya sedi ci ung cun ung om ciah chang gui naw, vang ungka vcang ah khüt khai ah shekat hnün thawh nak awn ami be sak nei.

¹² Ngami naw ami na m’thein gui cu, shin ah khaw cu yeikyai sak u ne, hta nau gui am phi ngawi yä kami pek gui hning vai ah khuihei chang gui awn kä kami chungla vai, ami bämang m’khüt näng nak vai, kä kami bawm gui vai ah kyak ci.

¹³ Apäng päng cu kami khan ah kya law ne, kami katnak la cheishoh nak ah khan ah m’kyuk nak om sei phi, Kami Khanpughi naw kami katnak ah ta ng’neim tuba khai ah na m’kyuk gui ci nei ci la ghing ne om vai ah ana om sak gui cu, kami hmat ci nei.

¹⁴ Cun kawn ah a i hawkcha ah na thumkhän cu, kami hnu nak ba mä vai ang? A i hawkcha ah shin ah chang omshe gui awn kami ng’chungla vai ang? Cun ah kami kyak ba ung, nang cu ang htei ah m’lungshe neta, na na m’di gui yawp khai nei, a u phi kä na k’pawih nak khai nei.

¹⁵ Bawipa, Israel Khanpughi, nang cu na taga ci cun ung phi nang naw na na ghin om sak gui ci. Kami hmakat nak cu nang ah kami ng’coipa ci nei, keimi na ma ah law vai ah kä kami khinkha ci nei” cine pyen ci gui.”