EZRA 8 - Cho Bible Common Language 2016

Omktu Khaw ah ka Law ba ciah Chang gui

¹ Shin gui cu Babilonia ah omtu ah kya ne om tu te ci gui ghangpughang Artaxerxes ah uk yah ung Ezra awn atäng ah Jerusalem ah law ba ci gui ah pahta gui ah ami ng’vai gui ah kyak ci.

^2-14 Kershom, Phinehas pahta Daniela, Ithamar pahta Shekaniah ah hta Hattush, David pahta Zechariah, Parosh, pahta, apahta ung chang 150 ah ami pupa gui ah mawng ca awn guk om ci. Eliehoenai, Zerahiah ah hta, pahath Moab pahta, a chang 200 lawk ci. Shekeniah, Jahayiela ah hta, Zattu pahta, a chang 300 lawk ci. Ebed, Jonathan ah hta, Adin pahta, chang 50 lawk ci. Jeshaiah, Mathaliah ah hta, elan pahta, chang 70 lawk ci. Zebadiah, Mischael ah hta, Shepha tiah pahta, chang 80 lawk ci. Obadiah, Jehiel ah hta, Bani pahta, chang 218 lawk ci. Shelomith, Josiphiah ah hta, bani pahta, chang 160 lawk ci. Zechariah, bebai ah hta, chang 28 Johanan, haka tan ah hta, Aykad pahta, chang 110 Eliphelet, jeuela, la Shemaiah Adonikam pahta, chang 60, ngami cu ak hnu ah law ba ci gui. Uthai la Zakkurbikvai pahta, chang 70 lawk ci

Im ung ka vai ah Ezra naw Levit gui Shui ne Hmu gui ci

¹⁵ Kei naw chang bum avan cu Ahava gawnu ung long lawk ciah tui cawh pei ung ka ng’bum sak gui ci. Cun ung hnüüp thum phung tu na kami om ci. A cu ah taigü gui ng’bum tu u sei ka hmu gui ci. Cun ung Levit a u kä om tuk ci.

¹⁶ Kei naw ang vaihta gui chang sing kaw ka tüi gui ci. Eliezer, Ariela, Shemaiah, Elnathan, Jarib, Elnathan, Nathan, Zehgariah, la Meshullam. Cun kawn ah saya hnih, Joiarib la Elnathan.

¹⁷ Kei naw ngami cu Kasiphia ung chang bum ami ng’vai Iddo ah tüi gui ne, ani la a chang gui ni, Taigüim ung bii bi gui ni cu Taigüim ung Khanpughi ah bii bik khai gui ah chang gui ami na tüih law vai ah ka k’thäh sak gui ci.

¹⁸ Khanpughi ah bä nak awn ngami naw Mahli pahta ungka Levit chang ni, Sherebiah cu na tüih lawk ci gui. A hta gui la anau gui gha lei cheit ani awn atäng ah law tuk ci gui.

¹⁹ Merari pahta Hashabiah la Jeshaiah cun phi ami mätyah chang m’ku awn atäng ah ngami naw tüi gui ci gui.

²⁰ Akbe nak ah Taigüim ung biik bi 220 phi tüi ci. Cun gui ah pupa gui cu ghangpughang David la abawi gui naw Levit gui bilawh püi gui khai ah ami ghü gui ah kyak ci. Ngami cu ami ming avan guk gui pyi ah kyak ci.

Ezra naw Chang gui cu Ei Hlawi ne Taigü vai ah Tängpang püi gui ci

²¹ Cä ah Ahava tui cawh pei ung mik mi ah phäh ah tuhbäi ka pek ci. Mi van ei hlawi ne mi Khanpughi ah ma ah m’lung mi ng’neim sak khai. Mihteh nak ah lam ung ma ana tawn gui vai ah mi k’thäh khai. Mi mät mi hta nau gui la mi khawh cham avan ana shungvong gui vai ah,

²² Lam mi hteh sangung ga nü ung na shungvong gui khai ah ng’se cun gakap gui, ghangpughang ah k’thäh vai ah kei ka lü ng’aa ci nei. A i ah kyasei ci ung, ani yi hnei ci phung cu, kami Khanpughi naw phyuhtheh ci nei. Cun ung phi ani ng’hlah tak ci läi cu, thüi na ne m’kyuk ci nei, cine ani am ka m’thein pyi nei.

²³ Cun ah kyasei keimi cu Khanpughi naw ana shungvong gui vai ah ei hlawi ne kami taigü ci, ani naw kami taigü na m’shang gui ci.

Taigüim ah Phäh M’cümhnah gui

²⁴ Ma tawn ciah taigü gui ungka, Sherebiah, Hasha biah, la ahei sing gha cu kei naw ka ghü gui ci.

²⁵ Cun kawn ah Taigüim ung mang vai ah ghangpughang, am shümthein chang gui, a bawi gui la Israel chang gui, naw ami pek ah ghui ni, ngui ni, mangca vai gui ni cu, kei naw khin ne taigü gui am ak pe gui ci.

^26-27 Shin cu kei naw ka pek gui ah ky ak ci: Ngui — ton 25 mangca ah ngui 100 — 70 kilokram ghui — 3400 kilokram ghui khap 20 — 270 ounces ghui khap awn a phu täng ciah kyei khawk akni gui

²⁸ Kei naw ka pyen na gui ci, “Nangmi cu nami pupa gui ah Khanpughi Bawipa ah ma ah nami theingcim ci, cun ah kyasei theing ciah ngui la mangca ah ghui avan cu law püi ne ng’pängye douthak nak ah ani am nami ap vai.

²⁹ Taigüim ung kä nami gawk pha ah chuih, cun gui cu geing na ne nami ngäng vai, Cä ah taigü gui ah khan ung khin u neta taigü ng’vai gui, Levit gui la Jerusalem ung Israel chang gui am ami ng’vai gui am nami ap gui vai.”

³⁰ Cun ung taigü gui la Levit gui naw ngui ni ghui ni, mangca gui vai ni cu ngäng m’htei u ne, Jerusalem Taigüim ah hteh püi khai gui.

Jerusalem ah Hteit ba ci gui

³¹ Cun cu keimi naw Jerusalem ah hteh ba vai ah Ahava tui cawh hteh ta ne, kami hteh nak ah a cha ät nak, a hnüüp gha lei goi nak ah kyak ci. Kami Khanpughi naw na om püi gui ne, ga ah tuk nak la lam ung ga ah ng’mah nak ung na shungvong gui ci.

³² Jerusalem ah gawk u neta hnüüp thum kami ng’düm ci.

³³ A hnüüp phli hnüüp ung keimi cu Taigüim ah kami hteit ci. Ngui ni, ghui ni, mangca gui vai ni cu khiin u neta, Uriah ah hta taigü Merimoth am kami ap ci. Ani awn atäng ah Phinechas ah hta Eleazar la Levit hnih Jeshua ah hta Joyabad la Binnui ah hta Noadiah om tuk ci gui.

³⁴ Apäng cu khei ne khiin neta, acun ge ung küm khai ah ca awn gu ne pyan ah kyak ci.

³⁵ Omktu khaw ah ka law ba ciah chang avan naw Israel Khanpughi am douthak vai ah m’khih ne khawihnah nak cu, law püi ci gui. Ngami naw Israel gui ami van ah hmawk ah seipat gha lei goi, htmome hla 96, htome hta 77, douthak ci gui. Katnak ungka ami mät ami theingthap nak vai ah me gha lei goi phi douthak ci gui. Shin ah seime gui avan cu Bawipa am m’khih ne douthak ci gui.

³⁶ Ngami naw ghanpughang ah pek gui ah cacun phi la u neta, Euphratis akhei täng khopäng gui ung uktu gui la bawi gui am pek ci gui. Cun gui naw chang gui cu m’hteihtang gui u ne, Taigüim khawihnah nak ung k’tha na püi gui ci gui.