Biblia Todo Logo
Bib sou entènèt

- Piblisite -

EZRA 7 - Cho Bible Common Language 2016


Jerusalem ah Ezra gawk lawk ci.

1 Khokum akda lüng khäta, Artaxerxes cu Persia ghangpughang ah a kyak yah ung, Ezra ming nak ciah chang tumat om ci. Ani naw apupa gui cu Taigütung Aaron ung va leng ne shin ah ng’dang sak ci. Ezra cu Seriah ah hta, Seriah cu Azariah ah hta, Azariah cu Hikiah ah hta,

2 Hilkiah cu shalum ah hta, Shalum cu Zadok ah hta, Zadok cu Ahitub ah hta,

3 Ahitub cu Amariah hta, Amariah cu Azariah ah hta, Aazriah cu Merioth ah hta,

4 Merioth cu Zerahiah ah hta, Zerihiah cu Uzziah ah hta, Uzziah cu Bukki ah hta,

5 Bukki cu Abishua ah hta, Abishua cu Phmehas ah hta, Phinehas cu Eleazar ah hta Elesyar cu Aaron ah hta ah kyak ci.

6-7 Ezra cu Israel Khanpughi Bawipa naw Moses am a pek ah thukhän hmuhmat yüm yüm ciah hmuhmat cüivai chang ah kyak ci. A i ah kyasei ci ung Bawipa a Khanpughi naw hriham a pek ah kya ne, ghangpughang naw ani naw ak thäh phung cu pek ci. Artaxerxes ah uk nak akum chih nak ung Ezra cu Babilonia ah ka Jerusalem ah Taigü gui, Levit gui, Taigüim ung ng’äi awm ci gui, Taigüim ngäng ci gui la Bii bi gui ah kyak ciah Israel amshah ng’bum gui awn atäng ah law tuk ci gui.

8-9 Ngami naw a cha ät nak ah a hnüüp ät nak ung Babilonia cu hteh ta u ne, Khanpughi naw am htei nak gui awn cha hma nak ah a hnüp ät nak ung Jerusalem ah gawk ci gui.

10 Ezra naw a ghin nak ap neta, Bawipa ah thukhän cu ng’thei ne acun ah bi ne, thukhän gui la läk vai gui avan cu Israel chang gui am m’thei gui ci.


Artaxerxes naw Ezra am a Pek ah ca

11 Artaxerxes naw Ezra am shin ah ca cu pek ci, Ezra cu taigü, cüvai chang Bawipa naw Israel gui am a pek ah thukhän gui la thumkhäm gui avan yüm yüm cu hmat ciah kyak ci.

12 “Artaxerxes ghangpughang naw Ezra taigü, Khankho Khanpughi ah thukhän ung cüvai ci am a pek,

13 Kei naw ka thukhän cu ka uknak khaw ung Israel chang avan Taigü gui, Levit gui la hteit ba hlük ci avan cu nang awn atäng ah Jerusalem ah hteit ba u sä.

14 Kei naw ng’shin ah chang chih cu nang awn atäng ah Jerusalem la Judah ung ng’täi khai ah ka ning tüi gui ci nei. Nangmi naw nami yi hnei ah nami Khanpughi ah thukhän cu a i hlawk ah nami läk ah nami teng vai nei.

15 Jerusalem Taigüim ung Israel Khanpughi am kei la ka ng’shica ah chang gui naw kami dpouthak vai ah ghui la ngui cu nangmi naw nami hteh püi vai nei.

16 Babilon khopäng nü ung nami lak ah ngui la ghui avan la Israel chang gui la ami taigü gui naw Jerusalem, ami Khanpughi ah Taigüim ung ami douthak vai gui phi nami htehpüi vai nei.

17 “Nangmi naw shin ah ngui cu geing na ne, nami mang vai, seipat htome la, htomehta, m’vapüm la sapyit tuicu hleih ne Jerusalem Taigüim sonkiang khan ung nami douthak vai.

18 “Pawih ciah ngui la ghui cu nangmi la nami paw chang gui ah yum ah nami Khanpughi ah ang yak hlü ah nami mang vai.

19 Taigüim pum nak ung mang vai ah ning pek ah mangca vai gui ning pek avan cu Jerusalem ah Khanpughi am na pek vai.

20 Cun kawn ah Taigüim ah phäh ah na ng’yak hlü a i phi a om ah akyak ung, mang gaw m’küm ungka la ne na mang vai nei.

21 “Kei naw Euphratis akhei täng khopäng ung ngui m’kümbawi gui ami van am ka thumkhän gui ci, Taigü ah kya ne, khankho Khanpughi ah ang thukhän ung cüvai chang ah kyak ciah Ezra naw ak thäh phung cu aktung ah nami pek vai nei.

22 Ngui 34000 kilokram, htang 10000 kilokram, sapyit tui 2000 litre, oliv situi 2000 litre la m’shii hlü ci hlawk nami pek vai.

23 Khankho Khanpughi naw amät ah Taigüim ah phäh ah ak thäh phung cu, nangmi naw geing na ne nami pek vai, Kei ah khan ah phi kya, kei ah hnu ah uk lawk ciah khan ah phi kya, ani kä a m’lungshe phung en vai ah nami bi vai.

24 Nangmi naw taigü gui, Levit gui, ng’äi awm ci gui, Taigüim ngäng ci gui biik’bi gui a u phi a shin ah Taigüim ah mawng phung ung a i akhon phi kä nami loh vai.

25 “Nang, Ezra naw Khanpughi naw aning pek ah cüvai nak cu mang ne Khanpughi ah ang thukhän awn ghing u ne, Euphratis ah akhei täng ung om ci gui ah chang avan uk gui khai ah uktu gui la suki gui cu na m’düih gui vai nei. Cun ah thukhän cu kä hmat tu phak ci päng am m’thein gui vai nei.

26 Chang tumat mat naw na Khanpughi ah thukhän gui, kä cung ghangpughang ah thukhän gui, Kä aläk ah akyak ung ani cu akcang ah m’kyuk vai nei. Sih nak, omktu ah hteh nak, a khawh guh pek nak, thawng ung chum nak pek vai nei.


Ezra naw Khanpughi M’hlüngtai ci.

27 Ezra naw, “Mi pupa gui ah Khanpughi Bawipa cu m’hlüngtai nei. Jerusalem ah Bawipa ah a Taigüim shicha ah ghangpughang naw am tamkhah hlü vai ah ani naw bik ci nei.

28 Khanpughi ah bä nak awn ghangpughang, ang shica ah chang gui la huham mah ciah a bawi gui avan ah hmai kyang nak cu kei naw ka gah ci nei. Bawipa ka Khanpughi naw kei cu thamah nak na pe sei, Israel pahta gui ah ami ng’vai akda cu, kei awn atäng ah law tu ba khai gui ah kei ka ng’ge hning ci nei.”

Cho Bible Common Language © Bible Society of Myanmar, 2016.

Bible Society of Myanmar
Swiv nou:



Piblisite