EZRA 6 - Cho Bible Common Language 2016

Uktubawi Sairus ah Ng’thukbäi cu Hmu ba ci gui

¹ Cun ah kyasei Dirius ghangpughang naw thukbäi ne, Babilon ung mi gim ah bawi ah rekawt cu shui sak gui ci.

² Cun ung phi cun ah ca chaw cu Media khopäng Ekbatanamang gaw ung va hmu ba ci gui. Cun ah rekawt ung:

³ “Ghangpughang Sairus naw a uk nak ah akum htük kum ung ang thumkhän cu, Jerusalem ung Taigüim cu khawihnah nak man la bi nak man, m’khih ne douthak nak man ah hmun ung cawh ba vai nei. Taigüim ah a hlüng cu metre m’ku lei chih ang shawng cu metre m’ku lei chih lawk khai nei.

⁴ Paang gui cu lung kleep thum päng ah akhan ung sing klep ät ciah phah ne cawh vai. Ng’pyi ciah a phu avan cu bawi mang ah ngui m’küm ungka pek vai.

⁵ Acun ah mäih ah ghui la ngui khawh gui cu ghangpughang Nebukhadnezzar naw Jerusalem Taigüim ungka Babilon ah alaw püi cu Jerusalem Taigüim a om nak ung hteh püi ba ne tha ba vä” ciah kyak ci.

Uktubawi Darius naw Taigüim K’täi ne Cawh vai ah Ng’thukbäi ci

⁶ Cun kawn ah Darus naw shin ah ng’thu m’hlan ba gui ci; “Tattenai, Euphratis akhei täng uktu, Shethar Boyenai, la Euphratis akhei täng ung na bawi gui, Taigüim awn ang shawng ah nami om vai.

⁷ Ami cawh kyan nak ung kä nami tawmgu en tu vai, Judah uktu la Jew ang vai gui naw Khanpughi ah Taigüim cu acau a om nak te ung co ba u sä!

⁸ Cawh kyan nak ung ami bawm gui vai ah kei naw thumkhän ka ning pe gui ci, cawh pyan nak ung ng’pyi ciah ngui cu Euphratis akhei täng ung akhon loh ah mang im ngui ungka kä m’düm ne pek vai nei. Cun ung bi nak cu kä ng’düm khai.

⁹ A hnüüp tä sei hnüüp kä m’chüh en ne Jerusalem ung taigü gui naw ami ng’yak hlü ami ning m’thein gui phung cu nami pek gui vai nei. Sei hta, htome, htome hta, cun gui cu Khankho Khanpughi am m’khih ne douthak vai, cun kawn ah htang m’shii, sapyit tui, oliv situi,

¹⁰ Acun ah nami bi vai, cun ung ngami naw Kkankhaw Khanpughi naw a dou thei vai ah khawihnah nak cu douthak khai gui. Kei la ka hta gui ah phäh ah ani ah phyuhtheh nak cu ng’yoi thäh khai gui.

¹¹ Kei naw ka thumkhän ba mä cu, chang tumat mat naw shin ah thukhyän kä a läk ah a kyak ung ani ah im ungka ng’lawng tumat mat ng’yuuk ne, amawng vangtäng m’shum neta, ani ah pum cu thawng täih vai nei. Ani ah im cu ng’awt ng’bum ah kyak khai nei.

¹² Ani khawihnah nak vai ah hmun ah Jerusalem mang gaw ghü ciah Khanpughi naw a u ghangpughang phi a u pakhui phi, shin ah thumkhän hnungtuk ne Taigüim m’di vai ah tha nak ci phung cu, gawt sä. Kei, Darius naw shin ah thukbäi ka pek ci nei. Shin cu akbe ah nami läk vai nei” ciah kyak ci.

Taigüim Ap nak

¹³ Cun kawn ah uktu bawi Tattenai, Shethar Boyenai, la ami bawi gui naw ghangpughang ah pyen ah mäih ah bik ci gui.

¹⁴ Jew ami ng’vai gui cu prophet goi Hakkai la Zachariah naw thagui pe gui u sei, Taigüim ami cawh cu bä law pi khai ah bik ci gui. Ngami naw Israel Khanpughi ah ang’thukhän la persia ghangpughang gui Sairus, Darius la Artaxerxes gui ah thukbäi awn ngami naw Taigüim cu m’khüüp ne co ci gui.

¹⁵ Darius ghangpughang ah uk nak akum chuk nak Adar cha ah a hnüüp thum hnüüp ung ngami naw Taigüim cu pyi ci gui.

¹⁶ Cun kawn ah Israel chang gui — taigü gui, Levit gui, la omktu khaw ah ka law ba ci gui ami van naw — Taigüim cu yeikyai ne ap ci gui.

¹⁷ Cun ah ap nak ung ngami naw seipat phia, htome phia goi, la htome hta phia phli cu khawihnah nak ah bi u ne, Hmakat douthak nak ah me gha lei goi, Israel pakhui tumat ah phäh ah tumat ciah kyak ci.

¹⁸ Jerusalem Taigüim khawihnah nak ung Moses ah ca uk ung m’shümthein nak ah mäih ah tängpang khai ah taigü gui la Levit gui phi tha gui ci.

Phyawn nak Pawi

¹⁹ Omktu khaw ah ka law ba ciah chang gui naw a hengkum a cha ät nak ah a hnüüp gha lei phli nak ung phyawn nak pawi cu bik ci gui.

²⁰ Taigü gui la Levit gui ami van cu theingcim nak bi u ne, akcang ah theingthap ci gui. Levit gui naw law ba ciah chang gui avan ah phäh, taigü gui ah phäh ami mät ah phäh ah seime gui ngawn ne phyawn nak khawihnah nak bik ci gui.

²¹ Khawihnah nak cu omktu khaw ah ka law ba ciah Israel chang gui ami van naw ei ci gui. Cun kawn ah acun ah khaw ung om ci gui ah khoshe khawihnah nak m’lungsi ne law ba ne, Israel Khanpughi Bawipa khawihnah ci gui ami van naw ei ci gui.

²² Ngami naw k’caw kä shum ah m’htut ei nak ah pawi cu hnüüp chih ung yeikyai ne bik ci gui. Ngami cu yeikyai aih ci gui. A i ah kyasei ci ung Bawipa naw Assiria ghangpughang cu ngami m’hlüngtai gui khai ah bii bik ci. Cun ah kyasei Israel Khanpughi ah Taigüim ami cawh ba nak bii ami bi cu ani naw k’cang na gui ci.