EZRA 5 - Cho Bible Common Language 2016

¹ Cun ah akhin ung prophet hnih Hakkai la Iddo ah hta Zechariah cu Israel Khanpughi ah ang ming awn Judah la Jerusalem ung om ciah Jew chang gui ah ma ah tün ne ng’thu pyen ci goi.

² Shealtiela ah hta Jerubabel la Jehoyadak ah hta Joshua naw ami ng’thu pyen cu ng’ya ni neta Ngani naw Jerusalem ung Taigüim cu Tün ne co ni sei prophet goi naw cawh püi gui ci goi.

³ Acun vai am Euphratis akhei täng uktu Tattenai, Shethar Boyenai la ami paw bawi gui naw Jerusalem ah law u neta ami k’thäh cu shin ah Taigüim co ne m’khüüp vai ah a u naw ang thumkhän aning pek gui?

⁴ Taigüim cawh nak ung bi püi gui ciah chang avan ah ming phi ngami naw k’thäh ci gui.

⁵ Cun ung phi Jew chang gui cu Khanpughi naw ngäng gui sei, Persian bawi gui cu Dirius am ca ami guk ung, kä ang hlan law pha ah chuih a i ah kä ci gui vai ah k’bäi ci gui.

⁶ Shin cu ngami naw ghangpughang am ami m’khäh ah ca ah kyak ci.

⁷ “Ghangpughang Darius, na uk nak cu dim deeih sä,

⁸ “Nang bawi naw na hmat khai nei, Keimi cu Judah khopäng ah hteit u neta, dämduh ciah Khanpughi ah Taigüim cu lung nu gui awn co ne khaai u ne, akpaang ung sing lawng nu gui ami dawn cu kami hmuk ci nei. Ami bi cu ang htei ah geing na ne bi u ne, ang khän ah bik ci gui nei.

⁹ Cun kawn ah keimi naw chang ah ng’vai hta gui cu a u naw cawh ba vi ah huham pe gui sei, Taigüim co ne m’khüüp ne ami cicu ami na m’thein gui vai ah kami k’thäh gui ci.

¹⁰ Keimi naw ami ming gui phi kami ng’shi gui ci, cun ah kya ne shin ah bii bi nak ung ami ng’vai gui cu kami ning m’thein gui hning ci.

¹¹ “Ngami naw, ‘Keimi cu khankho la khomdek ung Khanpughi ah nak changshäm gui nei, Keimi naw Taigüim kami co ba ci nei, cun cu cau pui ge ung huham ah ciah Israel ghangpughang naw a htük ge ung co ne am khüüp te ah kyak ci nei.

¹² Cun ung phi kami pupa gui naw khan kho Khanpughi cu m’lungshe sak ci gui nei. Ani naw chaldean pa ng’shon Babilonian ghangpughang Nebukhadnezzar am tu ne khäm sak gui ci nei. Taigüim m’shet u ne chang gui cu Babilonia ah hteh püi ne omktu ah tha gui ci gui.

¹³ Cun kawn ah Babilonia ghangpughang sairus ah uknak a kum ät nak ung, Sairus naw Taigüim cawh ba vai ah ng’thukbäi ne pe gui ci.

¹⁴ Nebukhadnezzar naw Jerusalem Taigüim ungka la ne Babilonia Taigüim kyong ah atha ah ghui la Taigüim ung mang ah ngui gui cu pe ba gui ci. Sairus naw cun gui cu Judah khaw uktu ah atha Sheshbayyar ming nak ciah chang ah a kut ung pe ba ci.

¹⁵ Ghangpughang naw ani a pyen nak cu, cun gui cu la ba ne Jerusalem Taigüim ung na hteh püi ba vai. Taigüim cu ayan ung ang düi nak man ung na cawh ba vai.

¹⁶ Cun ah kyasei Sheshbayyar law ne cun ah ng’nei cu m’düih ci. Ami cawh pyan nak cu cun ung tün ne tuh güt ung ah kyak ci. Cun ung phi Taigüim cu tuh güt kä ng’pyi ci, cine pyen ci gui.’

¹⁷ “Tuhbäi bawimang aw, Babilon bawi ah rekawt ung shui ba sak gui ä, Jerusalem ung cawh ba vai ah Taigüim ah phäh ah Sairus naw Thukbäi a pek cu hmuh ba vai aw, i vai aw? Cun kawn ah shin ah mawng ung a i na ng’yak hlü cu na hmat ba sak gui ä.”