EZRA 3 - Cho Bible Common Language 2016

Khawihnah Nak Tün Ba Ci Gui

¹ A cha chih nak ung Israel chang gui ami vancu ami gawnu gui ung om ba yawp ci gui. Cun kawn ah ami van Jerusalem ung ng’bum ci gui.

² Jehozadak ah hta Joshua la ak taigü paw gui, shealatiela ah hta Jerubabel la amätyah gui naw atäng ah Israel Khanpughi ah sonkiang cu co ba ci gui. Cun ah kya ne Khanpughi ah chang Moses ah thukhän ung ami guk ah mäih ah ngami naw sonkiang khan ung m’khih ne khawihnah nak cu bik ci gui.

³ Omktu khaw ah ka law ba ci gui naw acun ah khaw ung ana om ciah chang gui cu kyih gui ci gui. Cun ung phi sonkiang cu ayan a om nak ung co ba ci gui. Cun kawn ah ngami naw ami bi man ah khongawi la mühun ung m’khih ne khawihnah nak cu sonkiang khan ung bi ba ci gui.

⁴ Ngami naw ng’yiinak ah pawi cu thungyo man ah mäih ah bik ci gui. A hnüüp tä acu hnüüp khawihnah vai ah k’thäh phung cu ngami naw douthak ci gui.

⁵ K’be nak ah ami khawihnah man ah apum lüng m’khih ne douthak nak, cha lum thai pawi douthak nak, Bawipa khawihnah ung ahei ng’bum nak man gui avan la mät ah ngaih ah Bawipa am pek man ah douthak nak avan cu bik ci gui.

⁶ Cun ung phi chang gui naw pum im cawh ba vai cu, kä tün phak ci gui. A cha chih nak ah a hnüp ät hnüüp ung Bawipa am m’khih ne khawihnah douthak vai cu tün pyi ci gui.

Tagü im Cawh vai Tün ci gui.

⁷ Chang gui naw lung im co ci gui la peen im co ci gui am pek gui vai ah ngui cu pek ci gui. Lebanon ah ka cedar sing gui ami m’thawng nak ah Tire la Sidon mang gaw chang gui am ei vai awk vai la oliv situi gui cu pek ci gui. Ngami naw tuinu ung Joppa ah ami law püi vai ah kyak ci. Cun gui avan cu Persia uktu bawi Sairus ah shai chah nak awn ami bi ah kyak ci.

⁸ Ngami cu Jerusalem Taigüim hmun ung ami gawk law nak ba kum, a cha goi nak ung Taigüim cawh vai cu tün ci gui. Jerubabel, Joshua la ami paw chang guitaigü gui, Levit gui, omktu khaw ah ka Jerusalem ah law ba ci gui, ami van naw law ne bi tuk ci gui. Levit gui ami van akho kum kum m’ku lawk ci la kum m’ku ah däm ci phung cu Taigüim cawh ba nak bi lawh nak ung tängpang ci gui.

⁹ Levit Joshua la a hta gui la amätyah gui, Kadmiel la a hta gui (Hodaviah pahta) gui phi atäng ah ng’dawn tu u ne, Taigüim cawh ba nak ung tängpang tuk ci gui. (Ngami cu Henadat pahta Levit gui naw bawm gui ci gui.)

¹⁰ Chang gui naw Taigüim ah ang nei m’düih vai ami tün law ung taigü gui cu suinu sui nephyungheng khawt u ne, ami ng’düih nak vai ung ng’düi ci gui. Ngami naw David ghangpughang ah khin ung ami dou ah m’shümthein nak gui awn Bawipa cu m’hlüngtai ne m’lau ci gui.

¹¹ Ngami naw Bawipa m’hlüngtai nak ng’äi m’cu u ne, leng ba ba ne m’cu ci gui. Bawipa cu nik ci, ani naw Israel gui am hni nak cu khongtäi ci nei. Chang päng naw aktha avan la ne Bawipa cu m’hlüngtai ne m’lau ci gui. A i ah kyasei ci ung Taigüim ang nei cu tün ne m’düih ne bi pyi ah kyak ci.

¹² A htük ung Taigüim hmu man ci gui ah taigügham gui, Levit gui la pahta ung ami ng’vai gui akda naw Taigüim ang nei m’düih law cu hmu u neta, kyap ne m’lau ci gui. Cun ung phi cun ung om tuk ciah ahei chang gui cu yei ne m’lau ci gui.

¹³ Zei ne m’lau, la kyap ne m’lau cu a u naw kä ng’thumcha thei ci. A i ah kyasei ci ung ngami ah m’lau cu ng’shang aih sei a shou nak ah ka naw phi ng’yak vai kyak ci.