EZRA 1 - Cho Bible Common Language 2016

Jew Chang gui Ami Hteh ba vai ah Sairus naw Thumkhän ci.

¹ Sairus cu Persia Uktubawi ah a kyak nak akum htük nak ung prophet Jeremiah ung Bawipa naw a pyen ah ng’thu cu bäi lawk ci. Ani naw Sairus cu a shin ah thumkhän ang ng’shäu vai ah thawh let sak ci. Ca awn gu neta ani ah uknak khaw nü ung m’lau ne phat vai ah tüi gui ci.

² Shin cu Persia uktubawi Sairus ah thumkhän nei. Bawipa, Khankho ah Khanpughi naw m’dek ah khan avan ka uk vai ah na pyang ci nei. Judah khaw Jerusalem ung ani ah phäh ah Taigüim cawh vai ah bi vai na pek ci nei.

³ Khanpughi naw aning chang gui avan ning om püi gui khai nei. Nangmi cu Jerusalem ah hteit ne Israel Khanpughi, Jerusalem ung khawihnah ah Khanpughi, Bawipa ah Taigüim cu nami co ba khai nei.

⁴ Omktu khaw ah om tuk ciah a chang tumat mat cu a law ba vai ah bawm vai a hlü ah a kyak ung, a pei ung om ci gui naw bawm nak ami pek vai ah kyak ci. Ngami cu ngui ghui ei awk gui vai la phuih taih sela gui awn bawm gui vai. Jerusalem ah Khanpughi ah Taigüim ung douthak vai phi pek gui vai.”

⁵ Cun kawn ah Judah la Benjamin pakhui ung ami pahta ng’vai gui, Taigü gui, Levit gui la Khanpughi naw ami m’lungkyong ung ang dang na gui cu hteit ge u ne, Bawipa ah Taigüim cu Jerusalem ung co khai gui.

⁶ Ami pei yung ah ka gui ami van naw akda pe gui ne bawm gui ci gui. Ngui khawh gui, ghu gui, ei awk vai, phuih taih sela gui, ahei a phu tan gui la Taigüim ung douthak gui vai cu pe gui ci gui.

⁷ Nebukhadnezzar ghangpughang naw Jerusalem Taigüim ungka la ne amät ah khanpughi ah Taigüim ung a tha ah khawh gui la khap gui cu Sairus naw pe ba gui ci.

⁸ Ani naw cun gui cu mang ah ngui m’küm ciah angvai Mithredath am ap sei ani naw Sheshbayyar, Judah uktu am akni ah pyang ne

^9-10 shin ah ap ci; douthak nak vai ah ghui khawk 30 douthak nak vai ah ngui khawk 1000 Ahei khawk gui 29 ghui khawk aläm gui 30 ngui khawk aläm gui 410 ahei mangca vai gui 1000

¹¹ Avan ah ng’dawn ah 5400 lawk ciah ghui la ngui khawk gui ni, ahei mangca vai gui ni cu Sheshbayyar la omktu chang gui naw Babilon ungka naw Jerusalem ah ami hteh ba ung ami hteh püi ah kyak ci.