ESTA 5 - Cho Bible Common Language 2016

Esther naw Ghangpughang la Haman cu Mang ei ei vai ah khü goi ci

¹ Ei a hlawi nak ah a hnüüp thum hnüp ung Esther naw mangnu ah suinu sui neta, mang im ah akyong täng chagä ung hteit ne mang kyang ah kyong täng ah mang ne ng’düi ci. Ghangpughang cu kyong ah valuh nak täng ah mang ne mang kyang ung ngok ci.

² Ghangpughang naw k’pung ah ng’düi ciah ghangpughangnu Esther cu hmu ne, yei na neta, ghui ng’shopawng cu shäng ne pek sei, ani naw law ne a mawng cu tawn ci.

³ Ghangpughang naw, “Ghangpughangnu, amawng a i ang a om? Na ng’yak hlü cu na m’thein ä, na gah khai nei — ka uknak khaw ah a teih phi ka ning pek khai nei” cik ci.

⁴ Esther naw, “Nang na yeikyai nak vai a kyak ung nang ah phäh ah tuh mü ka pyan ah mang ei cu, nang la Haman naw law ne nani ei law vai nei” cik ci.

⁵ Ghangpughang naw ang ghit ah Haman a law vai ah thukbäi ci. Cun ah kyasei ngani cu Esther ah khin ah kyak ci goi. Cun kawn ah ngani cu Esther ah mang ei ah hteit ci goi.

⁶ Sapyit tui aw neta ghangpughang naw, “Na ng’yak hlü cu na m’thein ä, na gah khai nei, nang ah na k’thäh cu ka ning pek khai nei” cik ci.

⁷ Esther naw,

⁸ “Nang ka bawimang naw kei ah k’thäh cu na na pek khai ah na m’gein nak a om ah a kyak ung, nang ah phäh ah kei naw ka pyan tham ah mang ei cu ngawi ung nang la Haman naw kei ah khin ah kya ne, nani ei law vai ah ka ng’ya hlük ci nei. Acun ung kei naw ka ng’yak hlü cu ka ning m’thein khai nei” cik ci.

Haman naw Mordekai ngawn vai ah pawngpüi ci.

⁹ Mang ei ei ne hteit ba neta Haman cu ang htei ah yeikyai ci. Cun ung phi mang im luh nak ung om ciah Mordekai naw, ani naw sun ne a hteh yah ung kä ng’düi law ne, chang m’sui nak a i phi kä m’dang khäta, Haman cu ang htei ah m’lungshe ci.

¹⁰ Cun ung phi am lung k’üüp ne a im ah hteit ba ci. Cun kawn ah ani naw a im ah a teihpüi gui khü gui ci, ak chu Zeresh phi atäng ah om tu sak ci.

¹¹ Ani naw ngami ah ma ah khähghah ne, a i hlawk ah ang bähmang, a i chü ah a hta, ghangpughang naw hlüng pi ciah bawi ah atha, ahei ghangpughang ah bawi gui ah ta, ani a i hlawk ah a küikyang tuba, gui cu pyen ci.

¹² Haman naw k’täi ne a pyen cu, “Cun kawn ung phi ghangpughangnu Esther naw a u phi mang ei ei vai ah kä khü man ci, kei la ghangpughang bäng na khü goi ci, ngawi ung phi na khü ba goi ci.

¹³ Cun ung phi mang im luh nak ung Jew chang Mordekai ngo sei ka hmuh ah chuih kei ah phäh ah a i phi kä bä khai nei” cik ci.

¹⁴ Cun ah kyasei a chu la a teihpüi gui naw m’cäi tu u ne, “Nang naw ng’awh k’tung, metre m’ku lei goi ah hlüng ci cu, ng’lin sak gui ä. Ngawi ung khaw ngawi shin ah tung ung, Mordekai cu m’awh vai ah ghangpughang ah na k’thäh vai, cun kawn ah nang cu mang ei ei vai ah yeikyai ne na hteit khai nei” cik ci gui. Haman naw cun ah ami pyen cu bä ciah ngai neta ng’awh tung cu ng’ling ci.