Biblia Todo Logo
Bib sou entènèt

- Piblisite -

ESTA 4 - Cho Bible Common Language 2016


Esther naw am hteihtang vai ah Mordekai naw k’thäh ci

1 Mordekai naw cun gui avan hmat law neta, a sui gui k’teek ne cäi ng’ä ci. Cun kawn ah suishe sui ne a lu m’vut awn bu ne, kyap ne m’lau ne mang gaw kyong ah hteit shüi shüi ne,

2 mang im ung luh nak ung gawk ci. Ani cu kyong ah kä lut ci, a i ah kyasei ci ung suishe sui ciah chang cu a u phi kyong ah kä lut khai ami ciah phäh ah kyak ci.

3 Khaw päng avan ung ghangpughang ah thu ng’shäu cu hmat u neta, Jew chang gui cu thüikyap ci gui. Ngami cu ei hlawi u ne, kyap ne m’lau ci gui, Akda pi cu suishe sui ne m’vut ung ng’yän ci gui.

4 Esther ah changshäm hnumi hta gui la hnumi uk ci gui naw Mordekai cun ah a kyak cu m’thein u khäta, Esther cu ang htei ah cäi ng’ä ci. Mordekai naw suishe a sui cu suut neta a sui vai ah, ani naw sui m’khäh ci, cun ung phi ani naw kä dou ci.

5 Cun kawn ah ani naw ghangpughang naw a changshäm ah atha pek, mang im ung hnumi uk tumat ah kyak ciah Hathak cu khü neta, Mordekai ah hteh sak ne, a i ah kyak ci, a i ah kyak sei cun ah a kyak, cicu hmat sak ci.

6 Hathak cu mang im luh nak pei ah khaw k’häu ung om ciah Mordekai ah hteit ci.

7 Mordekai naw ani am a mawng avan m’thein tuk ci. Jew gui avan ami ngawn gui yawp ung, mang im m’küm ung ngui a i chü a tha vai ah ashaitak phi m’thein ci.

8 Ani naw Hathak am, Jew gui m’di gui vai ah Susa mang gaw ung ami ng’shäu ah canglep tumat phi pek ci. Mordekai naw cun cu Esther am a thak vai, amawng avan m’thein vai, ghangpughang ah hteit ne, a chang gui a chimgein gui vai ah, ang coipaa vai ah, a pyen nak vai ah k’thäh ci.

9 Hathak naw acun ah bik ci.

10 Esther naw Mordekai am shin ah thu m’khäh law ba ci;

11 “Hnumi phi, pami phi, a u phi ghangpughang naw kä a khü ah mang im kyong ah lut ciah chang cu sih nak gah khai kyak ci. Cun cu thkhän ah kyak ci. Khopäng gui ung ghangpughang ah chang gui la chang nü naw cun cu hmat ci. Cun ah thukhän phyawn nak vai tumat bäng om ci. Ghangpughang naw chang tumat mat am ak hteipawng a shäng ah a kyak ung, cun ah chang ah hnun gui cu phyawng ci. Cunung phi ghangpughang naw cun ah kei am ana pek nak cu cha ät law pyi ci nei” cik ci.

12 Mordekai naw Esther ah ng’thu cu ng’ya ba neta,

13 Shin ah ng’thu k’bäi cu m’khäh ba ci, “Nang cu mang im kyong ah na om ci kyasei, ahei Jew chang gui ah ta ng’gein pi khai ah käi en ä.

14 Shin ah mäih a khin ung nang a düm ah na om ah a kyak ung, Jew chang gui ah hmawk ah khankho ah kaa m’hteihtang nak cu gawk lawk khai nei. Cun ung ngami cu hun nak gah khai gui. Cun ung phi nang cu na sik khai, na pa ah kyongchang cu ng’pyi khai. Cun ung phi nang ghangpughangnu ah na kyak law cu shin ah mäih a khin ah phäh ah kä kya ne ang!”

15 Esther naw Mordekai am shin ah m’hlan ba ci;

16 “Hteit ne Jew gui avan Susa ung k’bum gui ä. Ei hlawi ne kei ah phäh ah taigü vä. Hnüüp thum la mü thum ung ei kä nami ei, tui kä nami awk en vai nei. Kei la ka changshäm hnumi hta gui phi acun ah kami bik khai nei. Cun kawn ah shin cu thukhän awn a hnungtuk ung phi, kei cu ghangpughang ah ka hteit khai. Shin bi ah phäh ah sih vai a kyak ung phi ka sik khai nei” ciah kyak ci.

17 Mordekai naw hteit ne Esther naw bi vai a pyen nü cu bik ci.

Cho Bible Common Language © Bible Society of Myanmar, 2016.

Bible Society of Myanmar
Swiv nou:



Piblisite