ESTA 3 - Cho Bible Common Language 2016

Haman naw Jew gui m’di gui vai ah pawngpüi ci

¹ Shäng hta khäta ghangpughang Ahasuerus naw Haman ming nak cicu bawi ng’vaipi ah tha ci. Haman cu Hammedatha ah hta, Akak ah ng’shon ah kyak ci.

² Ghangpughang naw a bawi gui avan cu thukbäi gui ne, a bii ami bi nak ung m’kukdong ne kawp ne Haman ami chang m’sui vai ah pyen ah gui ci. Ngami ami van naw acun ah bik ci gui. Cun ung phi Mordekai naw cun ah kä bi tuk ci.

³ Mang im ung bii bik ciah ahei bawi gui naw, a i ah kyasei ghangpughang ah thumkhän kä na läk tu, cine ng’shik ci gui.

⁴ A hnüüp tä sei cun ah kä a kyak ba vai ah pyen nak ci gui. Cun ung phi ani naw kä ngai gui ci. Ani naw, “Kei cu Jew chang ah ka kyak ci, Haman ah ma ah kä ka kawp khai nei” cik ci. Cun ah mawng cu ngami naw Haman am m’thein ba ci gui, cun ah Mordekai ah om ih cu ngaih pe hning khai aw?

⁵ Mordekai naw ani ah ma ah kä ka m’kukdong khai, kä ka kawp khai a ci cu, Haman naw ng’ya neta ang htei ah m’lungshe ci.

⁶ Ani naw Mordekai cu Jew ah a kyak hmat law neta, kä Mordekai bäng m’kyuk gui vai ah k’bäi ci. Persia uknak khaw avan ung Jew nü nü cu ngawn vai ah ani naw pawng püi ci.

⁷ Ghangpughang Ahasuerus ah uknak a kum gha lei goi nak, ak htük bäih ah cha, Nisan cha ung Haman naw ng’thu k’bäi ne, “Purim” ah ami pyen ah m’shüih tawk nea bi nak vai ah hnüüp la cha cu ghü ci. Ani naw a cha gha lei goi nak ah Adar cha ah a hnüüp gha lei thum ah k’bäi ci.

⁸ Cun ah kyasei Haman naw ghangpughang am, am thein cu, “Na uknak ah khaw avan ung püi ne om ciah changpakhui tumat om ci, cun gui cu khopäng päng ung hmuh gui vai kyak ci, Ngami ah thungyo cu ahei chang gui ah thungyo awn kä täng ci. Ngami naw uknak khaw ung thukhän gui cu kä läk ci gui. Cun ah kyasei nang naw m’lung sau ne na om ung kä bä khai nei.

⁹ Ka bawi aw, nang naw na yum ah a kyak ung ngami ngawn gui vai ah k’bäi ä. Cun ah na bi ah a kyak ung khaw uknak ung mang vai ah mang im m’küm ung 340, 000 kilokram ah däm ciah ngui cu thun law vai ah kei naw ka ng’kham ci nei” cik ci.

¹⁰ Thushäu akcang ah dang khai ah m’hnüt ne k’bäi nak vai ah, akutcüp cu ghangpughang naw suut neta, Jew chang gui ah ami ga ah kyak ciah Haman, Hammedatha ah hta, Akak ah ng’shon am pek ci.

¹¹ Ghangpughang naw pyen ne, “Chang gui la ami ngui gui cu nang ah kaa ah kyak ci, ngami ah khan ah na m’hni ah na bi vai nei” cik ci.

¹² Cun ah kyasei akhtük bäih ah, a hnüüp gha lei thum nak ung Haman naw ghangpughang ah yungbawi gui cu khü gui neta, pyen ne m’thein gui ne, uknak khaw ung om ciah ng’thu päng awn k’phlan ne gu ne, Uktu gui, uktu bawi gui, bawi gui avan am pek vai ah pyang ci. Cun cu ghangpughang Ahsuerus ah ming awn gu ne, kutcüp awn m’hnüt ci gui.

¹³ Ca tei ci gui naw cun ah ng’shäu nak cu uknak khaw khopäng avan ung tei ci gui. Cun ah ca ung, Adar cha, a hnüüp gha lei thum nak hnüüp ät bäng ung Jew gui avan — a hmaw ang vai, hnumi nau sen — gui cu ngawn gui vai. Cun gui cu kä m’gein en gui ah ngawn gui ne, ami khawh gui cu lak yawp vai.

¹⁴ Cun ah hnüüp a gawk law ung chang nü naw a pawng m’htein nak vai ah cun ah ng’shäu nak cu khopäng päng ung chang avan ah hmuh vai ah ng’shäu vai.

¹⁵ Ghangpughang naw thumkhän ne ak bäi cu, Susa mang gaw ung chang khli ah ma ah tai ci gui. Cun kawn ah ca tei ci gui naw khopäng gui ah tei ci gui. Susa mang gaw ung thüngphyong ne ami kyak yah ung, ghangpughang la Haman cu sapyit tui aw ne ngok ci goi.