ESTA 2 - Cho Bible Common Language 2016

Esther cu Ghangpughangnu ah kya lawk ci

¹ Cun kawn ah ghangpughang naw am lungshe nak cu gei law khäta, Vashti ah bi gui la amät ah ng’thu ng’shäu ah mawng cu ngaih-tüh ba ci.

² Cun ah kyasei ghangpughang awn ng’et ne om ciah a bawi gui naw, “A i ah kyasei hnumi hta akiom gui cu kä na shui yap ba ang?

³ Nang naw shin ah uknak khaw, khopäng avan ung bawi gui tha neta, ami van naw hnumi hta akiom gui cu, Shin ah mang gaw Susa ung nang ah ma ah ami law püi vai ah ng’thu nak bäi gui hning ci nei. Hnumi gui ung ang vaipi ah na tha ah Hekai am ap ung, ani naw akiom ah pyang tham khai nei.

⁴ Cun kawn ah nang naw na m’hni pi ah hnumi hta cu la ne Vashti ah hnün ung ghangpughangnu ah na tha ba vai nei.” Ghangpughang naw cun ah m’shüm thein nak cu yum neta, ani naw acun ah bik ci.

⁵ Susa mang gaw ung Mordekai ming nak ciah Jew chang tumat om ci, ani cu Jaira ah hta ah kyak ci, Benjamin pakhui, Kish la Shimei ah htangshon ah kyak ci.

⁶ Babilon ghangpughang Nebukhadnezzar naw Judah ghangpughang Jehoiakhim cu pha ne omktu khaw ah a hteh püi yah ung, chang akda hteh püi gui ci, acun ung Mordekai phi tumat ah kyak ci.

⁷ Ani ung ang nam be Esther om ci, a Hebru ming cu Hadassah ah kyak ci, ani cu kyom ci, a pumgaw phi nik ci. Ani cu anupa gui si u khäta, Mordekai naw m’ghin ne a hta ah mäih ah a om püi ah kyak ci.

⁸ Ghangpughang naw thushäu akthai ng’shäu khäta, hnumi hta gui akda Susa ah law püi gui ci gui, Esther phi cun ung tumat ah kyak ci. Ani cu mang im ung hnumi gui ah ami ng’vai Hekai am ap u sei, ani naw m’htei ci.

⁹ Hekai naw ani cu m’hni ne yei na pi ci. Ani naw amüi kyom khai ah m’htei nak cu ang ghit ah pe ne, ei awk akni phi pyan pek ci. Ani naw hnumi hta gui ah om nak ung aknipi hmun pe ne, mang im ungka hnumi hta sing chih ghü ne, ani m’htei khai ah tha gui ci.

¹⁰ Tuhbäi Mordekai naw m’cäi sei, Esther naw Jew ah a kyak ah mawng cu m’yih ci.

¹¹ Ani a i ah a kyak la ani ah khan ah a i hawkcha ah a kyak cu hnumi hta gui ah om nak ah im ah a hmai täng ah hteit shüi shüi ne a hnüüp tä sei teng ci ci.

¹² Hnumi hta gui ami ng’bilawh sak gui cu kum ät lüng ci — Mura situi awn cha chuk, sing ui situi awn cha chuk ah kyak ci. Cun kawn ah hnumi hta gui cu tumat ciah ghangpughang Ahasuerus ah hteit ci gui.

¹³ Hnumi hta tumat cu ami om nak ah im ungka naw mang im ah a hteh law vai ung, amät ah ng’yak hlü ah sui awi ci.

¹⁴ Ani cu mühun täng ah mang im ah lut ne, a ngawi ung khaw ngawi hnumi gui ah om nak ah a im hei ung law ba ne, ghangpughang ah hnumi hta gui uk ciah Shaashkay ah m’hteihtang nak ung om ci. Ani cu ghangpughang naw ka m’hni ci nei, cine a ming ung kä a khü law ah a kyak ung ghangpughang ah kä hteit ba ci.

¹⁵ Esther cu ghangpughang ah a hteh vai ah akhin gawk lawk ci. Esther — Abihaila ah hta, Mordekai ah ng’nam be, a hta hnumi ah mäih ah a om püi, hmuk ciah chang päng naw am tamkhah ah kyak ci. Ani a hteh nak vai ah khin gawk law khäta, ani cu hnumi gui ah om nak ung m’htei gui ciah, Hekai ah m’cäi ah mäih ah sui awi ci.

¹⁶ Ahasuerus ghangpughang ah a kyak nak a kum chih nak, a cha gha nak Tabeth cha ung Esther cu mang im ah ghangpughang Ahasuerus ah hteh püi ci gui.

¹⁷ Ghangpughang naw a hei hnumi hta gui ah ta ani cu m’hni pi ci, a hei gui ah ta yei na pi ci. Ani naw mang lukhu alu ung k’bün neta, Vashti ah hnün ung ghangpughangnu ah tha ci.

¹⁸ Ghangpughang naw Esther m’tamkhah nak ah mang ei cu akdämduh ah m’hnüt neta, a bawi gui la a uktu gui avan khü gui ci. Ani naw a uktu khaw avan ung ng’shäu ne, ng’chin nak ah hnüüp cu k’bäi neta, ghangpughang awn khin kha ciah m’cümhnah nak phi pek ci.

Mordekai naw ghangpughang k’phiawn ci

¹⁹ Cun sangung Mordekai cu ghangpughang naw uktu bawi ah tha ci.

²⁰ Esther cu tu ä a u naw Jew chang ah kä hmat ci. Mordekai naw a u am kä a m’thein vai ah a pyen ak ah kyak ci. Ani cu a hmaw hta ge ung Mordekai ah m’htei ah kya ne, a m’cäi ng’ya man ciah kya ne, ani naw ngai ci.

²¹ Mordekai cu mang im ung uktu ah a kyak yahung ghangpughang ah im kyong luh nak ah m’kawt ngäng ciah mang im chang vai goi, Bikthana la Teresh naw ghangpughang Ahasuerus cu hnim vai ah k’bäi ci goi.

²² Mordekai naw cun ah mawng cu hmat neta, ghangpughangnu Esther am m’thein ci. Ani naw mä Mordekai ah hmuh cu ghangpughang am m’thein ba ci.

²³ Cun ah mawng cu ng’shi gui u ne, akcang ah a kyak cu hmu u neta, ani nik hnih cu singtung ung m’awh goi ci gui. Cun ah amawng gui cu uknak khaw ah yungca ung ami guk vai ah ghangpughang naw k’bäi gui ci.