ESTA 1 - Cho Bible Common Language 2016

Ghangpughangnu Vashti naw Ghangpughang Ahasuerus cu kä ngai ci

^1-2 Persia khaw, Susa mang gaw, amang kyang ung om neta, Ghangpughang Ahasuerus naw khopäng 127, India ungka naw Sudan ung khüt khai ah avan uk ci.

³ A uknak a kum thum nak ung ani naw, abawi gui avan la a uktu gui avan cu aktung ah mang ei ei püi gui ci. Acun ung Persia la Media gakap gui phi om tuk ci gui, khopäng uktu gui la chang vai gui phi kai tuk ci gui.

⁴ Ani ah mang im ah bämang nak la chünla nak avan cu cha chuk lüng lüng ung m’dang ci.

⁵ Cun kawn ah ghanpughang naw Susa mang gaw ung om ciah akpyam ang mang chang avan am mang ei aktung tu m’bei gui ci. Cun cu mang im duum ung hnüüp chih bik ci gui.

⁶ Duum ah akyong ah ngui lawi awn ak hnga ami pyan ah toulung k’tung gui ung, yidung amkim la a bawk gui cu, linen pyai akni awn khawng ne tai ne cüiche ci gui. Ghui la ngui awn ami pyan ah ngoh ng’yän nak vai gui phi, cun ah duum ung tha ci gui. Cun ung toulung, lungsen vai, kikong lung la lung m’kim gui cu phah ci gui.

⁷ Awk vai cu ghui khap gui ung cuung ci gui, khap gui cu kä ng’müi shui ci gui, ghanpughang naw cun ah mang yu awn ng’khai ng’lang ci.

⁸ Cuchü bäng awk vai ciah k’bäinak kä om ciah chang nü naw, angyak hlü chü ah awk vai ah, ghangpughang naw thukbäi ne, mang im changshäm gui am cuun tei sak gui ci.

⁹ Cun yah ung mang im kyong ah ghangpughangnu Vashti naw hnumi gui am mang ei m’bei gui ci.

¹⁰ Mang ei pawi ah a hnüüp chih hnüüp ung ghangpughang cu ei aw ne yeikyai ci. Cun ah kyasei ani naw amät ah changshäm sing chih; Mehuman, Biztha, Harbona, Biktha, Abagtha, Zethar, la Karkas gui cu khü gui ci.

¹¹ Ngami naw ghangpughangnu Vashti cu mang lukhu k’bün ne ami law püi vai ah thukbäi gui ci. Ghangpughangnu kyom ci, cun ah kyasei ani ah kyom nak cu ghangpughang naw bawi gui la akhin gui avan am hmuh sak hlü ci.

¹² Ghangpughangnu Vashti am changshäm gui naw ghangpughang ah thumkhän cu m’thein u khäta, ani cu ma ne kä lawk ci. Cun naw ghangpughang cu m’lungshe sak ci.

¹³ Ghangpughang ah thungyo ung, ami ng’shica nak la uknak thukhän ah amawng ung hmuhmat ci gui ng’shi gui vai ah om ci kyasei, ani naw hmuhmat ciah a chang vai gui cu, khü gui neta, a i hawkcha ah bi vai cu, a u naw hmat ne ang cine ng’shi gui ci.

¹⁴ Ani naw ang shica gui pi ah angvai gui cu, Karshena, Shethar, Admatha, Tarshish, Meres, Marsena, la Memukan — ngami cu Persia la Media uknak khaw ung ak hlüng pikbäih bawi gui ah kyak ci gui.

¹⁵ Ani naw shin ah chang gui a pyen nak gui cu, “Kei ghangpughang Ahasuerus naw ka changshäm gui thumkhän ne m’cäi gui ne, ghangpughangnu Vashti ah ka tüi gui ci. Ani naw cun cu kä ngai ne mak ci. Thukhän naw a i cha ah ang a pyen? Ani ah khan ah a i cha ah bi vai ang?” ciah kyak ci.

¹⁶ Memukan naw ghangpughang la a bawi gui am, “Ghangpughangnu Vashti naw ghangpughang bäng akshedam nak ah kä kyak ci, a bawi gui la akcang ah uknak khaw ung pami avan ak shedam nak ah kyak ci!

¹⁷ Ghangpughangnu naw shin ah a bi ng’yak ciah hnumi päng naw a cei cu yawshe law nak khai. Ngami naw, ‘Ghangpughang Ahasuerus naw ghangpughangnu Vashti cu ani ah a law vai ah k’thäh sei, ani naw mak ci nei’ ci lawk khai gui.

¹⁸ Persia la Media ung om ciah bawi gui ah ami chu gui naw, ghangpughangnu ah om ih cu ami ng’yak ung, khaw kä a mü pha ung ami cei gui am m’thein khai gui nei. Khaw nü ung ami chu gui naw ami cei gui cu kä chang m’sui ba khai gui, ami cei gui naw ami chu gui cu m’lungshe nak khai gui.

¹⁹ Nang naw na yum ah a kyak ung ghangpughang ah ma ah Vashti cu kä ng’dang tuba phung khai ciah ng’thu ng’shäu sak gui ä. Cun cu Persia la Media khaw ah thukhän ung guk vai ah k’bäi gui ä. Cun ung cun cu kä ng’thawng ba hlawt khai nei. Cun kawn ah ani ah hnün ung bä pi ciah hnumi cu ghangpughangnu ah tha ba ä.

²⁰ Shin ah na uknak khaw ng’shawng avan ung, nang ah thu ng’shäu cu ami ng’yak ung, hnumi nü naw a pyam ang mang ung phi ami cei cu chang m’sui khai gui nei” cine pyen ci.

²¹ Ghangpughang la abawi gui naw cun ah a pyen cu yum u neta, Memukan naw a pyen ah mäih ah ghangpughang naw bik ci.

²² Ani naw a khaw päng päng ung ami ng’thu phäh phäh awn ca gu ne m’khäh gui ne, ami cei phung cu amät ah im ung ang vaipi ah kyak khai, ani ah ng’thu cu tungpa khai cine ng’shäu ci.