EPHESIAN 6 - Cho Bible Common Language 2016

Hta Gui La Nupa Gui

¹ Hta hmaw gui, nami nupa ah thu cu nami läk vai, cun cu khritha gui ah bi vai ah kyak ci.

^2-3 “Na nu la na pa cu nak chang m’sui vai, Cun ung nang cu bämang ne khoding ung ak shou na ghing khai,” ciah cacim ung om ci, cun cu shaitaak nak ah ak htük bäih ah thukhän ah kyak ci.

⁴ Nupa gui, nami hta hmaw gui cu ami m’lung thüi khai ah kä nami bi en vai. Cun ung phi Khanpughi ah ng’yak hlü ah khritha hläkhäm nak awn nami m’shümthein vai.

Bawi La Changshäm

⁵ Changshäm gui, Bawi Khrit ah khuut nami bi ah mäih ah kyih-aa ne, khüighaat ne nami chang bawi ah thu cu nami läk vai.

⁶ Nami bawi gui naw ami ning yum gui vai ah, ami ma bäng ah ami thu nami läk ciah kä kya ne, Bawi Khrit ah changshäm ah nami kyak ciah kyasei, Khanpughi ah ang yak hlü ah nami m’lung ngaih avan nawn nami hnün thawh vai nei.

⁷ Chang ah changshäm ah mäih ah kä kyak ciah Bawipa ah khuut bi ah mäih ah yeikyai ne nami bilawh vai nei.

⁸ Nami shüm vai cu, changshäm ah a kyak ung phi, ng’päi om chang ah a kyak ung phi, ak ni bik ciah chang phung cu Bawipa naw m’cümhnah nak pek khai nei.

⁹ Bawi mang gui, nangmi naw phi nami changshäm cu acun ah mäih ah nami om püi vai nei. Nami m’kyihkyawk nak gui cu nami m’düm vai nei. Nangmi la nami changshäm gui cu, khankho ah Bawipa tumat bäng naw ning khäm gui ne, yodäm pyammang käm hnga ne a täng ah m’khoi chaa nak bik ci cicu nami shüm vai nei.

Khanpughi ah Likhim k’Be

¹⁰ Ak hnu bäih ah ka ning m’cäi gui cu, Bawipa ung kawngät nak la küikyang ciah a hlüngtai nak ung thamah ne khüighaat vä.

¹¹ Khoshe ah thuvi tüihtok nak näng m’khüt nak vai ah, Khanpughi ah ning peik gui ah likhim k’be cu nami awi k’bah vai nei.

¹² Mikmi cu hnicim cang awn ng’tuk mi bik ciah kä kyak ci, khankho ah om ciah mümcha she gui la shin ah kho hmüp nak kho ung, uk ci gui, huham mah gui, la hlüngtai nak om ci gui awn ng’küükneet ne ng’tuk mi bik ciah kyak ci.

¹³ Cun ah kyasei Khanpughi ah likhim k’be cu nami awi k’bah vai nei! Cun ung vah shekat geinvai nak ah hnüüp a gawk law ung, gaa ah tuk nak cu nami näng hlawt khai nei. Ng’tuk lu küm sei nami ng’tuk kawn ah nangmi cu nami kho ng’lei ung khüi ne nami ng’düi lawk khai nei.

¹⁴ Cun ah kyasei khüi ne nami ng’düih ge vai nei, thu thuuk ah kyak ciah m’ciu vawp u ne, düngdau nak ah kyak ciah saphaw k’bah u ne,

¹⁵ dimdeih nak ah Thu Ni ng’shäu nak ah kyak ciah phahnak cu nami ng’cum vai nei.

¹⁶ Zum htek nak ah kyak ciah shawiphaw cu angtäi sei nami kawh vai nei, cun ung khoshe naw a shunkah law ah mei ah däi ciah li k’htei cu nami m’diim hlawt khai nei.

¹⁷ Hun nak ah kyak ciah m’si lukhu cu kutshum ne, Mumcha ah m’shumphyuk ah Khanpughi ah ng’Thu ah kyak ciah khimgan cu nami kawh vai nei.

¹⁸ Khanpughi ah m’hteihtang nak gah vai ah ng’yoi thäh ne, taigü nak awn shin gui cu nami bi vai nei. Mumcha ah lam shüm ah mäih ah a mawng ama avan ung nami taigü vai nei. Cun ah kyasei nami cimgang cüivai vai, kä nami pyai phung vai, Khanpughi ah chang gui ah hmawk ah angtäi sei nami taigü vai nei.

¹⁹ Kei thu ka pyein yah ung Khanpughi naw thu m’gawng thei nak ana peit vai ah nami na taigü peit vai nei. Cun ung kei naw Thu Ni ah a thuuk nak ah mawng cu dang ne ng’hmat khai ah ka pyein thei khai nei.

²⁰ Kei cu thawng ka cun pang ung phi, shin ah Thu Ni ah hmawk ah ng’shä ah ka kyak ci nei. Shin ah Thu Ni ka pyein khai ah kang düi ci kyasei, khüighaat ne ka ng’shäu vai ah nami na taigü peik vai nei.

Ak Hnu Ah Zavaih Nak

²¹ Tichikus, mi m’hni bekhüt ciah mi nau, Bawipa ah khuut bik ciah changshäm naw, kei ah mawng avan cu ning m’thein gui khai nei. Cun nung kei a i ah kya ne ka om cu nami hmat khai nei.

²² Cun ah kyasei ani nang mi ah om nak ah ka tüih law cu, keimi ah mawng a ning m’thein gui vai la k’tha mah nak a ning peit gui vai ah hmawk ah kyak ci.

²³ Pa Khanpughi la Bawipa Jesuh Khrit naw khritha phäi nau nami van am, dimdeeih nak, la yum nak awn m’hni nak cu ning pe gui sä.

²⁴ Kä si hlawt ciah m’hni nak awn mi Bawipa Khrit m’hni ciah chang gui ah khan ah Khanpughi ah m’geinsei nak cu kümbe ne om sä.