EPHESIAN 4 - Cho Bible Common Language 2016

Pumsa ah Kawngät Nak

¹ Cun ah kyasei Bawipa ah khuut ka bi hmawk ah thawng ka kyum ciah kei naw ka ning m’tholet gui ci nei. Nangmi cu Khanpughi naw khü ne a ning m’düih nak gui awn ng’müi khai ah, hnu m’khin, ma m’hlawi ne nami ghin vai nei.

² Ang täi sei nami m’lung neim sak ne, ng’awi ng’gi ne, hnimgei ne nami om vai nei. Tumat la tumat Lung gei, ngaih ni nak awn, nami m’hni cu dang sak vä.

³ Kawngät nak om khai ah ak ni pi ah nami hnün thawh vai nei, cun cu dimdeeih nak ung nami lukyum khai ah, Mumcha naw a ning pek gui ah kyak ci.

⁴ Khanpughi naw a ning khü nak gui awn, ngaih u nak tumat bäng a om ah mäih ah pumsa tumat Mumcha tumat bäng om ci.

⁵ Bawipa tumat, yumnak tumat, tui hnim nak tumat;

⁶ Hnicim chang avan ah Pa, Khanpughi tumat bäng om ci, Ani cu ang tü a van ah Bawipa, van ung bi bi ne, van ung om ci.

⁷ Bawi Khrit naw a nam shumphyuk gui ah mäih ah, mikmi tumat cicu küikyang ciah m’cümhnah nak mi gah ci.

⁸ Cacim theing ung lawk ci cu; “Bawipa cu a hlüng nakpi ah hang kai ne, Thawng kyum chang khli cu kai püi gui ci; Hnicim chang van am m’cümhnah nak, pek ci.”

⁹ Tuhbäi, “hang kai ci,” ci cu, a i a pyein hlü ang? Bawipa cu ang neim nak pi bäih ah khomdek ung kyum law ma ci, ciah kyak ci.

¹⁰ Kyum lawk ciah Bawipa cu, a hlüngtai huham awn khopuui be sak khai ah mawpi khankho ah hang kai ba ciah Bawipa ah kyak ci.

¹¹ Hnicim chang am m’cümhnah nak m’shumphyuk gui ci cun phi, acun ah Bawipa ah kyak ci. Ani naw amshah cu ang düihpüi gui ah, amshah cu profet gui ah, amshah cu thu shä ci gui ah, amshah cu pastor gui ah, amshah cu saya gui ah, m’düih gui ci.

¹² Cun ah abi cu Bawi Khrit ah pumsa cawh kyan vai ah, Khanpughi ah chang khli naw, krihta khuut bi vai ah, pawng m’hteim ge vai hmawk ah kyak ci.

¹³ Cun ah kyasei Khanpughi ah Htapa mi hmuhmat nak ung, mi yum nak tumat ah a kyak nak awn, mi van cu a täng ah mi kyumsawm khai nei. Mikmi cu Bawi Khrit ah küm ciah khüt nak ah mäih ah, ang htei ah a hlüng nak ah, cüivai lulaang ciah mi kya lawk khai nei.

¹⁴ Mikmi cu ak hmawhta ah kä mi kya ba ci, cun ah kyasei, ami mät ah m’lung hnga tüidawng düt awn, chang gui lam hma khai ah lam shüm ne thuvi theileh ci gui ah, m’theithang nak khokhni naw kä ning yon shüi shüi en gui sä.

¹⁵ Mikmi cu m’hni nak ah m’lung htek ung, thu thuuk mi pyein nak awn, chunglu ah kyak ciah Bawi Khrit ung ng’phaa vai ah, a mawng alam avan ung mi hlüngtai tuk khai nei.

¹⁶ Bawipa ah kut shum nak ah kaa ung a phäh phäh ah om ci gui ah pumsa ung ming bäng bäng ci gui cu a mi van kyumsawm yawp ci gui, pumsa tumat ung ng’gui ng’phaa yawp ci gui. Cun ah kyasei pumsa ung ming phäh phäh ci gui naw ami mät ah bi phäh phäh ami bi law ung, pumsa avan cu, m’hni nak awn däm ng’ghaw sak ci gui.

Bawi Khrit Ung Ghin Nak Thai

¹⁷ Cun ah kyasei nang mi cu kä yum ci gui ah mäih ah, kä nami om ih ngaih-tüh ba lä vai ah Bawipa ming ung ka ning khän gui ci nei.

¹⁸ Kä yum ci gui ah m’lung ngaih cu hnüp khui ah kyak ci. Ngami cu lulang nak maih ne cüivai nak kä om sei, ami m’lung ling ne, Khanpughi ah peit ah ghin nak awn api ah phi käng phaa ci.

¹⁹ Ngami cu lü ng’aa nak api phi kä om ba sei, ami m’hni hni ah m’gu plet sheka u ne, shungshet nak kä om sei, shemshai ci gui.

²⁰ Nangmi naw nami ng’theithang ah Bawi Khrit ah mawng cu cun ah kä kyak ci nei.

²¹ Bawipa ah mawng cu akcang ah nami ng’ya pyi ci nei. A hnu läk ciah ak chang gui nangmi naw Bawi Jesuh ung Thu thuuk ah mawng cu nami theithang pyi ci nei.

²² Cun ah kyasei ghin cu om düt ah ghin nak man, ak phyim cu lim ne nawng shüt vä. Mät ah ng’yak hlü hlimtui nak awn didap thei ciah, ghin nak phyim cu hnu nah vä.

²³ Nami m’lung la nami ngaih avan cu ak thai ah nami ng’pian sak vainei.

²⁴ Nangmi cu chang thai ah nami kyak vai nei, cun cu Khanpughi naw a müi ah a tüisho la ghin nak akcang ah ang dang sak ah düngdau ci la theingcim ciah kyak ci nei.

²⁵ Cun ah kyasei kä nami hleeihlak-en ba vai, mikmi cu Bawi Khrit ah pumsa ung a täng ah mi lukyum yawp ci kyasei, yum ciah chang gui tumat la tumat düng ciah thu bäng nami pyein vai nei.

²⁶ Nami m’lung a shet law ah a kyak ung phi, nami m’lung she nak cu cheishoh nak ung kä gawk en sä, nami m’lung she nak cu hni naw kä luh-en püi sä.

²⁷ Khoshe-am akhin kä nami peit-en vai nei.

²⁸ M’gu man ciah chang phi käm gu-en ba ne, khüighaat ne hnüntho ne, amät ah hnun m’ghin ne, pyamtham ci phi am hteihtang tu hning vai ah tha na sä.

²⁹ Thu she shaikaa api phi nami shai ung kä lut-en law sä, m’gein nak ah thu bäng lut law sä. Ng’awi gi nak, thamah nak la m’shümthein nak ah thu bäng nami pyein vai nei, cun ung vah ngai yak ci gui ah chang ah phäh ah ni kyom nak om khai.

³⁰ Khanpughi ah Mumcha Theing cu kä nami m’thüi-en vai; a i ah kyasei ci ung Mumcha Theing cu Khanpughi naw nangmi a ning khäm gui ah mawng m’hnüt nak ah kyak ci, ak hnu bäih ah Hnüüp ung nangmi a ning phiawn nak gui vai ah, a kyän ah phi kyak ci.

³¹ Thüisei nak, ngetngawng nak, m’lungshe nak gui cu nawng ge vä. Käng li ng’lai kä ng’plah ng’taang ba vä, käm thüikhang kä ng’gen hteet ba vä.

³² Tumat la tumat hnip hnoi ne ng’awi gi tu vä, Khanpughi naw Bawi Khrit ung a ning m’geinsei gui ah mäih ah tumat la tumat m’geinsei tu vä.