EPHESIAN 3 - Cho Bible Common Language 2016

Chang Khuihei Gui ah Hmawk ah Paul ah Bi Bi Nak

¹ Shin ah a mawng ung Bawi Khrit ah thawng kyum ah ka kyak ciah kei Paul naw, nangmi chang khuihei gui ah hmawk ah Khanpughi ah ka taigü ci nei.

² Nangmi ah hmawk ah shin ah bi bi vai ah, Khanpughi naw am gein nak awn kei-am a na ap ah mawng cu, nangmi naw akcang ah nami ng’yak pyi ah kyak ci.

³ Khanpughi naw thuuk ciah a pawngpüi gui cu kei-am nam thein ci. (Shin ah mawng cu ak tawi ah kei naw ka gu pyi ci,

⁴ Nangmi naw cun ah ka guk cu nami phat ah a kyak ung, Bawi Khrit ah mawng ak thuuk cu kei naw ka hmat ah mawng cu nami hmat khai nei.)

⁵ Cäu läi Khanpughi naw thuuk ciah a mawng cu chang ah hta-am kä m’thein man ci, cun ung phi tuhbäi theingcim ciah ang düihpüi gui la purofet gui-am, Mumcha awn m’thein gui ci nei.

⁶ Cun ah thuuk ciah a mawng ung, Thu Ni awn chang khuihei gui naw, Jew chang gui ah mäih ah Khanpughi ah yoshen nak cu gah tuk ci gui. Jew chang gui la khuihei chang gui cu, pumsa tumat ung ka, ang phyeek pai gui ah kya ne, Bawi Khrit Jesuh ung Khanpughi ah shaitaak cu ng’kühyah ci gui.

⁷ A hlüngtai nak ah a bilawh nak awn Khanpughi naw ana peit ah ak küikyang ah m’cümhnah nak cu, Thu Ni ng’shäu ciah ak chang shäm ah ana pyan ah kyak ci.

⁸ Kei cu Khanpughi ah chang gui ung ak chui pi bäih ah ka kyak ci. Cun ung phi Khanpughi naw, Bawi Khrit ah kä khei tai vai ah bühmang nak ah mawng Thu Ni cu chang khuihei gui am m’thein gui vai ah,

⁹ Khanpughi ah thuuk ciah ng’bü nak cu, a i cha dang lawk khai ci cu, chang gui naw ami hmuhmat vai ah m’thein m’kaan nak vai ah a khin ni cu kei am na pek ci nei. Ang tüi avan tüipian ciah Khanpughi naw cau pui pui ung cun ah ak thuuk kau gui cu, a thuh te ah kyak ci.

¹⁰ Cun ah abi ah mawng cu Khan uk ci gui la hlüngtai ci gui naw Bawipa ah cüivai nak a hlü hlü cu, tuhchü Krihtabum awn ami hmat sak nak vai ah kyak ci.

¹¹ Khanpughi naw ng’täi ciah ang bü nak awn, mi Bawipa Khrit Jesuh ung dang khai ah abi ah kyak ci.

¹² Mikmi cu Bawi Krih ung mi kawngät nak la ani mi yum nak awn, Khanpughi ah ma ah m’lung üp thamah ne mi gawk pyi ci.

¹³ Cun ah kyasei kä nami ng’yochaw vai, nangmi ah hmawk ah kei cu geinvai nak ka gah ci, cun cu nangmi ah ng’läh nak vai ah kiak ci, cun ah kyasei kä nami ng’yochaw vai nei.

Bawi Krih ah M’Hni Nak

¹⁴ Kei cu Pa Khanpughi ah ma ah m’kuukdong ne kang hui ci,

¹⁵ Ani cu Khankho la khomdek ung kyongkhui mah phung avan naw ming akcang ami gah nak ah kyak ci.

¹⁶ Khanpughi cu bämang ci kyasei, nami m’lung kyong a khüighaat vai ah, ang Mumcha awn hlüngtai nak a ning peit gui vai ah, kei cu ka taigü ci nei.

¹⁷ Nami yum nak awn nami m’lung kyong ung Bawi Khrit naw im ak süm vai ah ka taigü ci nei. Nangmi cu m’hni nak ung ng’yungpyaa ne nami khän htek vai ah ka taigü ci nei,

¹⁸ Cun ung nangmi cu Khanpughi ah chang gui awn a täng ah, Bawi Krih ah m’hni nak cu a i hlawk ah ayun, akdang, alu, alawng kiak ci cicu nami hmat lawk khai.

¹⁹ Ani ah m’hni nak cu nami hmat lawk khai, cun ung phi kümbe khai ah a i yah ung phi kä nami hmat hlawt khai — cun ah kiasei Khanpughi ung yungpyaa ne khänghtek vai ah ng’hläm ne nami ngaih gep vai nei.

²⁰ Mikmi ah m’lung kyong ung a hlüngtai nak awn bi bik ci naw, mik mi naw mi ngaih-tüh mi ng’yoih thäh ah tah, däm pi sei na pe gui hning ci nei;

²¹ Cun ah Khanpughi ah bäkhäk nak cu, khrithabum ung la Bawi Khrit ung a kho phlüt ah ng’shü ne om sä! Amen.