EPHESIAN 2 - Cho Bible Common Language 2016

Sih nak ung ka Ghin Nak

¹ Yanä nang mi cu ngaih she nak la shetkat nak ung mümcha aksi ah nami kyak ci.

² Khomdek khan ah cheishoh nak lam cu nami läk ci, kho k’häüung ka, mumchashe ah hlüngtai nak ah uknak cu nami läk ci, acun naw tuhbäi Khanpughi kä ngai ciah chang gui cu shum gui ci.

³ Zanä mikmi phi ngami ah mäih ah mi kya man ci. Pumsa ah ng’yak hlü ah mi om ne, pumsa la m’lungngaih ah ni vai düt ah mi bilo man ci. Mikmi cun phi pumsa lam ung, a hei chang gui ah mäih ah Khanpughi ah m’lungshe nak gah khin ciah mi kyak ci.

⁴ Cun ung phi Khanpughi ah m’gein nak cu däm aih ne am hni nak cu hlüng aih khä tah,

⁵ ang thu kä ngaih nak awn mi mümcha a sih nak ung ka, Bawi Khrit awn a täng ah na ghin ba sak gui ci. Nang mi cu Khanpughi ah a gein nak bäng awn hun nak nami gah ciah kyak ci.

⁶ Mikmi cu Bawi Khrit ung mi kawng ät nak awn, sih nak ung ka atäng ah na thawh ba püi gui ne, ani awn a täng ah khankho uk nak vai phi na pe gui ci.

⁷ Cun ah a bi ah mawng cu, mikmi-am am hni nak cu Bawi Khrit awn am dang nak ung, ani ah am gein nak a i hlawk ah adäm ah mawng cu, ngawi yä chang gui naw ami hmat vai ah hmawk ah kyak ci.

^8-9 Khanpughi ah m’gein nak ung yum nak awn hun nak nami gah ci. Nami mät ah ni kyom nak la k’tha nak awn ah kä kyak ci, Khanpughi ah m’gein nak ah kyak ci. Cun ah kyasei a u naw a khäh ghah nak vai kä kyak ci.

¹⁰ Bawi Khrit awn kawng ät ne, Khanpughi naw am hnüt bäi ah om k’ni nak ah mäih ah mi om ih vai ah, Khanpughi naw a na tüi sho gui ah kyak ci.

Bawi Khrit ung Kawng ät Nak

¹¹ Ayan ä nang mi cu pumsa awn bi vai kä nami bi tuk ciah kyasei, chang khui hei ah ami ning khü gui cu nami shüm ba vai nei. Pumsa awn bi ah vun ah nak bik ciah Jew chang gui naw, nangmi cu vun ah nak kä nami bi tuk ciah ning khei gui ci gui.

¹² Cun yah ung nang mi cu Bawi Khrit awn nami ng’shawng ci. Nangmi cu a kho hei chang gui ah kya u ne, Khanpughi ah ghü ah chang ah kä nami kya tuk ci. Khanpughi naw ak chang gui ah hmawk ah shai a taak ah ng’thukhän ung phi, nangmi cu kä nami ng’khämtuk ci, khomdek khan ung Khanpughi kä hmu ne, ngaih u vai kä om ciah chang ah nami kya man te ci.

¹³ Cun ung phi tuhbäi Bawi Khrit Jesuh ung nami kawng ät pyi ci kia sei, Khanpughi awn nami ng’shawng te ciah nang mi cu, Bawi Khrit a sih nak awn nami ng’et pyi ci nei.

¹⁴ Bawi Khrit amät naw Jew chang gui la chang khui hei gui cu, chang pakhui ät ah na pyang gui ne, dimdeeih nak na pe gui ci. A pumsa a peit nak awn changpakhui goi ah ng’tukgen khoikhei nak phi gäi ne m’shet pyi ci nei.

¹⁵ Cun kawn ah Jew chang gui ah thukhän shaitaak gui cu nawng-en ne, Jew chang gui la chang khui hei gui cu, amät ung kawng ät sak gui ne, pakhui thai ah kyak sak gui ci. Acucha ah dimdeeih nak cu a peit gui ah kyak ci.

¹⁶ Bawi Khrit naw kutlamtung ung a sih nak awn, chang gui ah thüigen nak cu m’dim netah, changpakhui hnih cu kawngät sak ne, Khanpughi ah law püi ci.

¹⁷ Cun ah kyasei, Khanpughi awn nami ng’shawng te ciah chang khui hei gui la, Khanpughi awn ng’et ci gui ah Jew chang gui, nami van ah ma ah Bawi Khrit cu kium law ne, dimdeeih nak ah Thu Ni cu shäu ne pyein ci.

¹⁸ Acun nak awn chang khui hei gui la Jew pakhui mi van cu Bawi Khrit awn Mumcha tumat ung mi kium ne, Pa Khanpughi ah ma ah mi gawk lawk ciah kyak ci.

¹⁹ Cun ah kyasei nangmi chang khui hei gui cu, chang heinu, thümnu m’donghman ah kä nami kya ba ci: keimi awn a täng ah Khanpughi ah chang, Khanpughi ah kiong khui chang ah nami kya pyi ci.

²⁰ Nangmi cun phi Angdüih püi gui la purofet gui naw ami k’süm ah lung ung ng’lin ah nami kya pyi ci. Cun ah lung k’tung cu Bawi Khrit Jesuh amät ah kyak ci.

²¹ Ani naw cun ah imlo cu shum ne han chang sei, cun cu Bawipa-am ap ah bum im theing ah kya lawk ci.

²² Nangmi cun phi, Bawi Khrit ung kawng ät nak awn, chang khui hei gui awn a täng ah cawhkyan nak nami gah pyi ci kya ne, Mumcha awn Khanpughi ah om nak ah hmun ah nami kya lawk ci.