DANIEL 9 - Cho Bible Common Language 2016

Achang gui ah Phäh ah Daniela Taigü ci

¹ Ahasuerus ah htapa Darius, Mede chang naw Babilonia uktu khaw cu uk ci.

² Ani ah uknak a htük bäih ah khokum ung, kei naw caciim theing gui cu phat ne, Bawipa naw prophet Jeremiah am, am thein ah mäih ah, khokum chih kip ung Jerusalem dishum khai cicu kei naw ka ngaih-tüh pyi ci.

³ Kei cu düng nak awn Bawipa Khanpughi ah ka taigü ci, ani ung ka ng’coi pak ci, ei ka hlawi ci, sui she sui ne m’vut ung ka ngok ci.

⁴ Bawipa ka Khanpughi ah taigü ne, ka chang gui ah katnak cu ka ng’yuu ba ci. Kei naw ka pyen ci, “Bawipa Khanpughi, nang cu na dämduh ci, keimi naw kami ning m’tamkhah ci. Nang cu na thukhän ung bekhüt ne, nang ning m’hni ci gui la nang ah thumkhän bik ci gui ah khan ah ng’täi ciah m’hni nak na m’dang ci.

⁵ “Keimi cu kami hmakat ci, keimi cu kami sawkshe ci, keimi naw cheishoh khai ah kami bik ci. Kami bi vai ah nang naw na thumkhän ci keimi naw kami k’taih ci, nang naw a hman na na m’hnuh gui cu kami ng’hlah tak ci.

⁶ Na chang shäm prophet gui cu keimi naw kä kami ngai gui ci, ngami naw nang ah ming awn mi ghangpughang gui, mi uktu gui, mi pupa gui la mi pakhui avan am ng’thu pyen nak ci guii.

⁷ Nang Bawipa naw ak phlüt ah a hman cu na bik ci, cun ung phi keimi kami mät naw ak phlüt ah thang shet nak cu kami law püi ci. Shin cu Judea la Jerusalem ung om ci la kä ami bekhüt ah phäh ah aksho ang et khaw gui ung, nang na k’phyiit pai gui ah Israel gui avan ah phäh ah akcang ah kyak ci.

⁸ Kami ghangpughang gui, kami uktu gui, la kami pupa gui cu thui ng’a vai ah hnün tho u ne, na ming hnung tuk ne shekak ci gui nei Bawipa.

⁹ Nang naw na chimgein ci, na geinsei ci, cun ung phi keimi naw kami ning hnungtuk püi ci.

¹⁰ Aw Bawipa kami Khanpughi, na chang shäm prophet gui ung na pek gui ah thukhän ah mäih ah kami om ih vai ah na na pyen nak gui yah ung, keimi naw kä kami ning ngai ci.

¹¹ Israel gui ami van naw na thukhän m’shet u ne, nang ah thu pyen ngaih vai ah mak ci gui nei. Keimi naw hmaka u ne kami ning hnungtuk püi ci, cun ah kyasei nang naw na chang shäm Mosesah thukhän ung guk ah mäih ah phyun tam nak cu keimi ah khan ah na law püi ci.

¹² Keimi la kami uktu gui ah khan ah na bi vai ah na pyen cu nang naw na bik ci. Nang naw khomdek khan ah mang gaw gui nicii ah da pi khai ah Jerusalem cu na m’kyuk ci.

¹³ Moses ah thukhän ung om ciah m’kyuk nak gui avan cu nang naw na na pe gui ci. Cun ung phi tuhbäi güt ung, O Bawipa kami Khanpughi, kami hma nak ungka ng’hlat law ba ne, na düng nak läk ne ning yei nak vai ah kä kami tha nak ci nei.

¹⁴ Nang, O Bawipa kami Khanpughi, nang naw na na m’kyuk gui khai ah pawng ne a cun ah na bik ci, a i ah kyasei ci ung nang naw ak phlüt ah hman cicu na bik ci, keimi naw nang kä kami ning ngai ci.

¹⁵ O Bawipa kami Khanpughi, Na chang gui Egypt khaw ah kaa na law püi ba nak gui awn na huham cu na dang sak ci nei, na huham cu shüm lä ci gui nei. Keimi cu kami hmakat ci, cheishoh khai ah kami bik ci nei.

¹⁶ A cau nang naw na na shungvong gui ci, cun ah kyasei Jerusalem cu kä m’lungshe na en baä. Shin cu nang ah mang gaw, nang ah theingthap ciah khomhtung nei. A peileng yung ah om ciah khopäng gui ung chang avan naw Jerusalem la na chang gui cu kahta nak ci gui nei, a i ah kyasei ci ung kami hma nak la kami pupa gui naw akshe ami bi ah hmawk ah kyak ci nei.

¹⁷ O, Khanpughi, ka taigü nak la ka ng’coipa nak cu na ngaih peä, Ami m’di te ah na Taigüim cu m’tho ba ä; Cun na m’thawh ba ung chang nü naw nang cu Khanpughi ah na kyak ciah hmat khai gui nei.

¹⁸ Na ngai gui ä, O Khanpughi, na teng gui ä, keimi ah kami khüikha nak la na ming m’küi ciah mang gaw ah yaica nak cu na hmuh pe gui ä. Keimi nang ah kami taigü ci, cun cu keimi naw a hman kami bi ah phäh ah kä kyak ci, nang naw na chimgein ah hmawk ah kyak ci nei.

¹⁹ Bawipa, na ng’ya gui ä. Bawipa na m’geinsei gui ä. Bawipa na ngai gui ä, hnün tho ä Cun ung chang nü naw nang cu Khanpughi ah hmat khai gui nei, kä shoshü enä, Shin ah mang gaw la shin ah chang gui cu nang ah kaa gui nei.”

Kabriela naw Ng’cängbang K’phlan ci

²⁰ Kei cu hteit ne ka taigü ci, ka katnak gui la ka chang gui Israel gui ah katnak gui ka ng’yu ba ci, cun kawn ah Bawipa ka Khanpughi naw theingcim ciah a Taigüim am thawh ba vai ah ka ng’coipa ci.

²¹ Kei ka taigü sangung muimang ung kei naw ka hmuh te ah Kabriela cu kei ka om nak ah yong ne lawk ci. Cun cu douthak vai ah mühun täng khawihnah nak ah a khin ah kyak ci.

²² Ani naw phlan ne a pyen cu, “Daniela, cängbang nak hmat thei vah nang ka ning bawm khai ah shin ung ka lawk ci nei.

²³ Nang naw Khanpughi ah na ng’coipa sangung ani naw ning m’shang ci. Ani naw ning m’hni gui ci, cun ah kyasei ani naw a ning m’shan nak gui cu kei naw law püi ne ka ning m’thein gui ci. Tuhbäi muimang phlan ne ka ning m’thein gui yah ung geing na ne nami ngaih vai nei.

²⁴ “Kum chihkip chih vei lüng ci, cicu Khanpughi naw a chang gui la theingcim ciah na mawng gaw cu hmakat nak la shetkat nak ung am hlawt nak gui ah a khin ah kyak ci. Hmakat nak cu m’geinsei ne, angtäi ah taga nak cu m’düih khai nei. Cun ah kyasei muimang la cängbang nak gui cu bä khai, theingcim ciah Taigüim cu ap ba mä vai.

²⁵ Shin cu ngaih na ne hmuhmat vä. Jerusalem cawh ba vai ah thumkhän ah akhin ungka naw Khanpughi naw a ghü ah ang vaihta a law ung khut ciah khokum chih chih vei lüng khai, cun cu kum chukkip-lei goi chih vei khäng khai, cun ung phi cun cu khüikha nak ah khin ah kyak khai.

²⁶ Cun ah khin ang pyi law hlü ung, Khanpughi naw a ghü ah ang vaihta cu kä taga ciah ngawn khai gui. Mang gaw la Taigüim cu huham mah ciah uktu ah m’gäi ciah gakap naw m’di khai. Ang pyi nak vai cu tuii hlaw ah mäih ah lawk khai. Khanpughi naw a pawng püi ah ng’tuk nak la dishum nak cu law püi khai.

²⁷ Cun ah uktu naw chang akda gui awn yumnak ät cu kum chih khän sak khai, kum thum la avang a lüng ung ani naw khawihnah nak la douthak nak cu ng’pyi sak khai. Kyihkyawk shemshai vai kyak cicu Taigüim ah a hlüng nak pikbäih ung tha khai gui. Cun cu acun tha ci am Khanpughi naw a pawng püi pek ang pyi nak a bui awt güt ung om khai.”