DANIEL 8 - Cho Bible Common Language 2016

Daniel naw Htome Akhla la Me cu Muimang nak ci

¹ Belshazzar Ghangpughang ah a kyak nak a kum thum nak ung kei naw a hnih vai nak ah muimang ka hmuk ci.

² Ka muimang ung kei cu ang ghit ah Elan khopäng Susa mang gaw paang ah kyong ah ka gawk ci. Cun ung kei cu Ulai tuinu pei ung ka düi ci,

³ a cun ah tuinu ah pei ah htome khla om sei ka hmuk ci. Cun cu a ki hnih lawk ci, a ki tumat cu ahei tumat ah ng’shäi pi ne thai pi ci.

⁴ Kei naw ka teng sangung cun ah htome naw a ki gui awn akhei täng, a htum täng, a siiptäng gui ung su shüi shüi ci. A i khisa naw phi ani cu kä düm sak hning ci, a huham phi kä phiawn ah hning ci. Ani naw a bi hlü ah bi sei shetkat nak däm law pi k’täi ci.

⁵ Kei cu a shin ah mawng ung ka cäicat yah ung me tumat cu akhei täng ah ng’güüt ne dawng lawk ci. Gai aih khäta a khaw naw m’dek kä yu tawn ci. Ani cu a mik goi ah ng’lak ung a ki tumat ah lawk ci.

⁶ Ani naw tui pei ah ng’düi sei ka hmuh ah htome khla täng ah law ne, ng’lah ne suk ci.

⁷ Cun ah htome hla a suk cu kei naw ka teng ci. Ani cu ang htei ah m’lungshe neta, ng’la “h ne su sei a ki hnih cu hnget ci. Htome hla ung am khu “t nak tuba vai thagui kä om ci. Ani cu m’dek ung kyu ne ng’yän sei, a khaw awn kai nak ci, ani hun tuk khai a u kä om ci.

⁸ Me cu m’gäi law pi pi ne, a huham a hlüng law pi yah ung, a ki cu hnget ci. A cun ah hnün ung a ki phli ah law law ba ci, cun gui cu ahei täng bäng bäng ah mang ci gui.

⁹ Cun ah phli ungka tumat ung a ki hta tumat law law ba ci, Cun ah huham cu a htum täng, a khei täng la shaitaak khaw güt ah gawk ci.

¹⁰ Cun cu däm law ne gaigawng law ne, khankho gakap gui la aisi gui cu ng’tuk püi ne, amshah cu m’dek ung chah ne kai nak ci.

¹¹ Khankho gakap gui ah manghta phi k’taap ne, ani am a hnüüptä ami douthak phi ng’düm sak ci.

¹² Chang gui cu sheka u ne, a hnüüptä khawihnah nak douthak nak vaisü ung, yum nak akcang cu m’dek ung ghawt ci gui, A ki cu a bi nak nü ung näng nak gah ci.

¹³ Cun kawn ah khanchang tumat naw ahei tumat ng’shi sei ka ng’yak ci, “Muimang ung hmuh ah shin ah mawng gui cu a i güt shou khai ang? Shin ah kyih vai ah katnak cu a i güt a hnüüptä khawihnah nak ah hnün ung om khai ang? A i güt khankho gakap gui la Taigüim cu kai nak khai gui ang?”

¹⁴ Ahei khanchang naw am shan nak cu ka ng’yak ci, cun cu kho hnüüp 1150 lüng khai, Cun yah ung kho ngawi la mühun ah khawihnah nak cu a u naw kä douthak ba khai. Cun kawn ah Taigüim cu m’thou ba khai gui.

Khanchang Kabriel naw Muimang K’phlan ci

¹⁵ Kei naw muimang ah mawng ka hmat vai ah ka tha nak yah ung, ang ghit ah tumat mat cu ka ma ah law ne ng’düi lawk ci.

¹⁶ Cun kawn ah Ulai tuinu täng ah ka, ng’khü ah k’aw cu kei naw ka ng’yak ci, “Kabriela, ani naw a hmuh ah a mawng cu ani am m’thein ä.”

¹⁷ Kabriel cu law ne ka pei ah ng’düi sei, kei cu kyih aih neta m’dek ung kyu ne ka ng’yän ci. Ani naw na pyen nak ci, “Chang aw, amawng cu hmat ä, shin ah muimang cu kho ah ng’pyi nak vai ah a mawng ah kyak ci.”

¹⁸ Ani naw ng’thu a pyen yah ung kei cu m’dek ung kyu ne kä ng’shüm ne ka ng’yän ci. Cun ung phi ani naw kei cu na k’pang ne, ka khaw awn ka ng’düi khai ah na m’tho neta,

¹⁹ a pyen cu, “Khanpughi ah m’lung she nak a i cha ah kya lawk khai ci cu, kei naw ka ning m’dang nei. Muimang ah mawng cu kho ang pyi nak vai ah khin ah kyak ci.

²⁰ “Nang naw na hmuh ah hnih ki nak ciah htome hla ci cu, Media la Persia uknak khaw hnih ah kyak ci.

²¹ Me ci cu, Kreece uknak khaw ah kya ne, mik goi ah ng’lak ung a ki cu a htük ah ghangpughang ah kyak ci.

²² A htük ah a ki a hnget nak ung lut law ba ciah a ki phli ci cu, cun ah khaw ng’pai neta dang lawk khai ah uknak khaw phli ah kyak ci. Cun gui cu a htük ung uknak khaw ah mäih ah kä gaigawng khai gui.

²³ “Cun uknak khaw gui ang pyi nak vai ang et law ung, ngami cu sheka law aih u ne, m’kyuk nak gah khai gui. Cun kawn ah am lung ling ne, m’gäi m’cik ne, hleei hlak ciah ghangpughang om lawk khai.

²⁴ Ani cu däm ng’ghaw lawk khai, cun ung phi amät ah huham awn ah kä kyak khai. Ani naw kyihkyawk vai ah tuk thah nak cu bi ne, abi nak päng ung näng nak gah khai. Ani naw tuk thah nak cu huham mah ciah chang gui la Khanpughi ah chang gui ah khan ah law püi khai.

²⁵ A i ah kyasei ci ung ani cu thei leh ciah kya ne hleei hlak nak täng ung ani cu näng nak gah ci. Ani cu amät m’ghämce ne a u kä m’cäicat ah chang akda m’di khai. Ani naw ghangpughang avan ung dämduh pi ci phi küknet püi khai, Cun ung phi ani cu chang ah huham awn kä kyak ci awn m’di nak gah khai.

²⁶ Mühun la kho ngawi ah khawihnah nak ah mawng muimang kei naw ka ning m’thein cu akcang ah kya lawk khai. Cun ung phi tuhbäi m’yih vai, a i ah kyasei ci ung a cun ah a kyak law nak vai cu kho ak shou lüng ba cang khai.”

²⁷ Kei cu khaw hnüüp akda ung ka m’lung na sei ka gaw pai ci, Cun kawn ah kei cu tho law ne, ghangpughang ah ana bi sak ah bi cu ka bik khai ah ka hteit ci. Cun ung phi muimang ah phäh ah ka m’lung gogan sei, a i phi kä ka hmat hlawt ci.