DANIEL 7 - Cho Bible Common Language 2016

DANIEL NAW AMIK HMUH GUI CU NG’DANG SAK CI ( 7:1—12:13 ) Daniel naw Khiküi Phli Mik Hmuk ci

¹ Belshazzar cu Babilon ghangpughang ah a kyak nak a kum ät nak ung, mü ah kei cu ka mang shek ci, ka mik hmuk ci. Ka mang cu kei naw ca awn ka guk ci.

² Cun cu mü ka hmuh m’hnüt nak ah kyak ci. Lam avan ung kho khi law ci, tuinu ah khan ung tui hnawk lawk ci.

³ Tuinu ungka khiküi nu gui phli lut lawk ci gui, ngami cu tumat la tumat kä täng ci gui.

⁴ Lut law htük cicu phongkawng ah mäih lawk ci, hmuu ah mäih ah ang phia gui om ci. Kei naw ka teng yah ung ang phya gui cu kiawi ne kya lawk ci gui. Khiküi cu tho law ne chang ah mäih ah ng’düi ci. Cun kawn ah ani naw chang ah m’lung ngaih ah mäih cu gah ci.

⁵ A hnih nak ah khiküi cu a hnu khaw awn ng’düi ciah khawm ah ma’ih ah kyak ci. Ani naw gangguh phe thum a haa ung m’kiam ci. K’aw tumat naw ani cu pyen nak ci, “Asa cu na ei hning hlawk ah na ei vai nei.”

⁶ Kei naw ka teng sangung ahei khiküi tumat dang law ba ci. Ani cu kawnghta ah mäih lawk ci, cun ung phi a hnu täng ah ang phya phli om ci, cun cu kha ah ng’phia ah mäih ah kyak ci, ani ung alu phli om ci, cun cu huham mah ciah mäih ah kyak ci.

⁷ Kei naw ka teng sang ung ak phli nak ah khiküi dang lawk ci. Ani cu huham mah ne, kyih she ne kyihkyawk vai ah kyak ci. M’sii ah mäih ah a haa nu gui awn a lawh gui cu m’kyem ne, ami khan ah kai na gui ci. Ani cu ahei gui ah mäih ah kä kyak ci, a ki gha lawk ci.

⁸ A ki gui cu kei kheng ne ka teng sang ung ahei ki gui ah ang lung ung a ki a läm tumat lut law sei ka hmuk ci. A cun naw om ge ciah a ki thum cu plawh ci. Cun ah ki ung chang mik gui ah mäih om ci, chang ah ng’shei ciah am gawng phi om ci.

Angtäi Ghing ciah Tumat a Hmuh ah Mawng

⁹ Kei naw ka teng sangung mang im kyong ah mang kiang gui ka hmuk ci. Mang kiang tumat ung angtäi ghing ci tumat ngok ci. Ani ah suisak gui cu khüi ah mäih ah bawk ne, alu sam cu htome ah mu ah mäih ah kyak ci. Mei ah däi ciah ping gui ah khan ah mang kiang cu mei ah cang ci.

¹⁰ Acun ungka mei cu tuii ah long lawk ci. Acun ung chang phia khak naw a bii bik ci gui, chang tämkäp phya khak cu a ma ah ng’düi ci gui. Ng’thu m’cha nak bi lawk khai gui ah kya sei, ca uk gui cu m’auh ne tha ci gui.

¹¹ Kei naw ka teng sangung a ki aläm cu ng’shei ne, chang k’om ne kya lä ci. Kei naw ka hmuh ge ah khiküi ak phli nak cu ngawn ci gui. A pumsa cu mei däi ung yuk shum ne m’di ci gui.

¹² Ahei khiküi gui cu ami huham ami lak pek gui pyi ah kyak ci, cun ung phi ami m’hnüt nak ah akyong ung ghing tuba cang ci gui.

¹³ Mü ah cun ah muimang ka hmuh sangung, chang ah mäih tumat cu ka hmuk ci. Ani cu khong mei naw koi sei kei täng ah ng’et lawk ci. Cun kawn ah ani cu angtäi ah ghing ciah ma ah hteit ci, a ma ah hteh nak hning gah ci.

¹⁴ Ani cu huham nak, m’tamkhah nak la bawimang nak huham ami pek ah kyak ci. Cun ah kyasei changpakhui gui, pahta gui, pa ng’tän gui avan naw a bi bik ci gui. Ani ah huham cu kä ng’pyi hlawt khai, ani ah uknak khaw cu kä maih hlawt khai.

Muimang ah Mawng M’thein gui ci

¹⁵ Ka hmuh ah muimang naw na cäicat sak sei kei ang htei ah ka cäi ci.

¹⁶ Cun ung ng’düi ci gui ungka tumat ah hteit ne, cun ah mawng avan ana m’thein vai ah ka thäh ci. Cun ah kyasei ani naw cun ah mawng cu na m’thein ci.

¹⁷ Ani naw, “Cun ah khiküi nu phli cu khomdek khan ung dang lawk khai ah, uknak khaw phli ah kyak ci.

¹⁸ Hlüngtai ciah Khanpughi ah chang gui naw, bawi mang huham cu gah u ne, khonglän ung kut shum khai gui.”

¹⁹ Cun kawn ah kei naw ahei gui ung kä täng tuk ciah ak phli nak ah khiküi ah mawng cu ka hmat hlü pi ci — kyihkyawk vai ah khiküi naw a sa lawh cu m’kyem ne, a kyei m’htin awn k’tüi ne, am sii haa awn htui neta kai nak ci.

²⁰ Cun kawn a lu khan ah om ciah a ki gha la a ki thum plawh ne lut lawk ciah a ki ah mawng cu ka hmat hlük ci. A cun ung a mik gui la am gawng om ci, ani cu chang ah ng’shei ci. Cun cu ahei gui ah ta kyih pi vai ah kyak ci.

²¹ Kei naw ka teng sangung cun ah ki naw Khanpughi ah chang gui cu ng’tuk püi gui ne, näng gui ci.

²² Cun kawn ah angtäi ah ghing ciah tumat cu law ne, khanpughi ah chang gui täng ah m’kum ne ng’thumcha vai ah mawng shäu ci. Khanpughi ah chang gui naw bawimang huham ami dou nak vai ah akhin cu gawk lawk ci nei.

²³ Shin cu kei naw ka pek ah m’thein nak ah kyak ci: ak phli nak khiküi cu khomdek khan ung om lawk khai ah ak phli nak ah uknak khaw ah kyak ci, ani cu ahei gui avan awn kä täng tuk ci. Acun naw khomdek khan avan dep ne kai nak khai.

²⁴ A ki gha cu cun ah uknak khaw uk khai gui ah ghangpughang gha ah kyak ci. Cun kawn ah ahei ghangpughang dang lawk khai, ani cu ma lawk ci gui awn ang htei ah ng’lak mah ne, ghangpughang thum cu leh m’hnep gui khai.

²⁵ Ani naw hlüngtai ciah Khanpughi cu hnung tuk püi ne ng’thu pyen ne Khanpughi ah chang gui cu, shedam na gui khai. Ami yum nak täng ung thukhän gui la pawi gui cu ani naw m’thawng pe gui khai. Khanpughi ah chang gui cu khokum thum la avang ung ani ah huham ah ka ung om khai gui.

²⁶ Cun kawn ah khankho ng’thumcha nak ung ngo u neta, ani ah huham cu lak pe ne, maih khai ah m’di khai gui.

²⁷ Khomdek khan ung uknak khaw avan ah huham la dämduh nak cu hlüngtai ciah Khanpughi ah chang gui am pe gui khai gui. Ngami ah bawimang huham cu kä ng’pyi hlawt khai, Khomdekkhan ung uktu avan naw ngami ah bii bi u ne, läk gui khai gui.”

²⁸ Shin cu ka ng’mang ah mawng ang pyi nak ah kyak ci. Kei cu ang htei ah kyikyawk neta ka ng’haam ci, a cun gui avan cu ka m’lung ung ka tha ci.