DANIEL 6 - Cho Bible Common Language 2016

Phongkawng ah Khui ung Daniela

¹ Darius naw a uk nak khaw avan ung uk khai gui ah uktu phia la mkuu tha vai ah k’bäi ci.

² Uktu gui ah khan ah tängpang ne ghangpughang ah phäh ah bilo khai ah Daniela la chang hnih cun phi ghü ne m’düih ci.

³ Daniel naw ahei tängpang ci guii la uktu gui ah ta bä pi khai ah a bi cu dang ci. Ani cu ang htei ah cüivai ci kya sei, uknak khaw avan ung ang vaipi ah tha vai ah ngai ci.

⁴ Ahei tängpang ci gui la uktu gui naw Daniela ah tängpang ne a uknak ung a hma nak hmuh vai ah tha nak ci gui. Cun ung phi kä hmu hlawt ci gui, a i ah kyasei ci ung Daniela cu ba” ciah kya ne hma nak la kä düng nak cu kä bi phung ci.

⁵ Ngami ami mät ng’htau u ne, “Amät ah yum nak lam ah kä a kyak ung mikmi naw Daniela m’kyuk nak vai ah amawng cu kä mi hmu hlawt khai nei” cik ci gui.

⁶ Ngami naw ghangpughang ah hteit u neta ami pyen cu, “Ghangpughang Darius, nang cu khonglän ung ghing ä!

⁷ Nang ah khaw ung kami tängpang ciah keimi kami van tängpang ng’vai gui, uktu ng’vai gui, uktu hmawba gui la ahei bawi gui naw kami yum cu — nang ghangpughang naw thumkhän k’bäi ne ang ceet ah na läk sak gui vai. Hnüüp thum kip ah kyong ung a u chang naw phi, nang ghangpughang ah kawn ung, a i khanpughi ah phi, a i chang ah phi kä a taigü en vai ah ng’thu na k’bäi vai nei. Cun ah thumkhän m’shet ciah chang cu phongkawng awn be ciah khui ung yuk shum vai nei.

⁸ Cun ah kyasei shin ah thukhän cu, gu ne m’hnüt ne shäu vai nei. Cun cu läk bä bä vai, m’thawng ne kä gah vai ah Medes la Persian gui ah thukhän ah kyak khai nei” cik ci gui.

⁹ Cun ah kyasei ghangpughang Darius naw ca gu ne ng’thu k’bäi ci.

¹⁰ Cun ah thu k’bäi ami guk cu Daniela naw hmat neta, a im ah hteit ba ci. A im akhan kyong ah Jerusalem täng ah mang ciah m’kawt gui om ci. A cun ung ani naw akphlüt sei a bi man ah mäih ah, m’kawt hmawng ne m’khuuk dong neta, hnüüp ät ung thum vei ci, Khanpughi ah taigü ci.

¹¹ Daniela ah a ga gui naw Khanpughi ah ak taigü cu hmat u neta,

¹² Daniela cu m’kyuk vai ah ami van ghangpughang ah hteit ci gui. Ngami naw, “Ghangpughang aw, nang naw thukbäi na guk ci, hnüüp thum kip ah kyong ung a u chang phi, nang ah kawn ah, a i khanpughi, a i chang ah phi taigü ci phung cu, phongkawng awn be ciah khui ung yuk shum vai.” Ghangpughang naw, “Hman ci nei, thukbäi cu aküi ah kyak ci, kä ng’thawng hlawt ciah Medes la Persian gui ah thukhän ah kyak ci nei” cik ci.

¹³ Cun kawn ah ngami naw ghangpughang am, “Daniela, Judah ah kaa omtu tumat naw nang ghangpughang cu kä ning chang m’sui ci nei, nang ah m’hnüt ah thukbäi cu kä läk ci nei. Ani cu hnüüp ät ung thum vei ci taigü ci nei” cik ci gui.

¹⁴ Cun mawng cu ghangpughang naw ng’ya neta, amlung kä ni sei, Daniela k’phyawn nak vai ah lam akni pi cu shui ci. Khohni a hang kyak güt ung tha na ne shui ci.

¹⁵ Cun kawn ah chang tumat cu ghangpughang ah law ba neta, am thein cu, “Nang ghangpughang naw na hmat ci, Medes gui la Persian gui ah thukhän ung thukbäi pyi cu kä m’thawng ba man nei.”

¹⁶ Cun ah kyasei ghangpughang ah thukbäi awn Daniela cu pha ne, phongkawng be ciah khui ung yuk shum vai kyak ci. Ani naw Daniela am, “Bekhüt ne na khawihnah ah na Khanpughi naw, ning gung sä” ci nak ci.

¹⁷ Lungnu cu khui ah m’kawt ung auk tha ci gui, ghangpughang naw amät ah m’hnüt nak awn m’hnüt ci, bawi ng’vai gui naw phi lung ung m’hnüt ci gui. Cun ah kyasei a u naw Daniela cu kä gung hning ci.

¹⁸ Cun kawn ah ghangpughang cu mang im ah law ba ne, amu “pum kä ip hlawt ne, a ei kaa ah a i kä ei awk ah om ci.

¹⁹ A ngawi ung khongawi hta ghangpughang cu tho law ne ang ghit a cun ah khui ah hteit ci.

²⁰ Acu ah gawk neta ani naw ang ä nak awn, “Daniela, ghing ciah Khanpughi ah chang shäm! Nang naw bekhüt aih ne nang ap nak ah Khanpughi naw, phongkawng ah ei nak vaisü ung ning phiawn ne ang?” cik ci.

²¹ Daniela naw m’shang ne, “Ghangpughang ghi ne ghing ä!

²² Khanpughi naw a khanchang cu phongkawng ah m’gawng bawm khai ah yuk chah law sei, kawng gui naw kä na cik ci gui nei. Ani naw cun ah abi cu a i ah kyasei ci ung, ani naw kei cu changniah na hmat ci, a i ah kyasei ci ung ghangpughang aw, nang ah khan ah kei katnak kä om ci nei” cik ci.

²³ Ghangpughang cu yei aih neta, Daniela cu khui ungka ami yu so tuba vai ah ng’thu k’bäi ci. Cun ah kyasei ani cu yu so tuba ci gui. Ani cu Khanpughi ung ng’ap ciah kya ne, api ah phi kä leimbai sei hmuk ci gui.

²⁴ Cun kawn ah ghangpughang naw ng’thu k’bäi ne, Daniela m’kyuk ciah chang gui ami van pha sak gui neta, ami chu gui la ami hta gui awn atäng ah phongkawng awn be ciah khui ung yuk shum gui ci gui. Khui ah anglung kä ami yuk pha pha ung kawng gui naw pah gui ne ami guh avan m’kyem gui ci gui.

²⁵ Cun kawn ghangpughang Darius naw ca gu ne, changpakhui gui, pahta gui, pa ng’tän gui avan am pe gui ci. “Ning yavaih gui nei!

²⁶ Ka uknak ah khaw avan ung thukhän ka bik ci nei, Daniela ah Khanpughi cu chang nü naw a kyih vai nei, a chang m’sui vai nei. “Ani cu ghing ciah Khanpughi, Ani naw khonglän ung uk khai nei. Ani ah uknak khaw cu a i naw kä m’di hlawt khai nei, ani ah huham cu kä ng’pyi hlawt khai nei.

²⁷ Ani naw hun ci, gung ci nei; Ani naw cäicat gui vai la cäi aih gui vai cu khankho la khomdek ung dang sak ci nei. Ani naw Daniela cu phongkawng gui naw ami lawh vai süte hun ci nei.”

²⁸ Daniela cu Darius ah uk sang ung la Persian chang Sairus ah uk sang ung bämang ne om ci.