DANIEL 5 - Cho Bible Common Language 2016

Belshazzar ah Mang-ei

¹ Khomü ät ung ghangpughang Belshazzar naw mang-ei aktung ah shong ne, bawimang akda khü ci, ngami cu atäng ah sapyit tui awk ci gui.

² Ani awk sangung Belshazzar naw thu k’bäi ne, apa Nebukhadnezzar naw Jerusalem Taigüim ungka a law pu’i ah ghui la ngui khap gui, khawk gui ung ami law püi vai ah pyen ci. Ghangpughang naw tüi gui sei, ani, abawi mang gui, ak chu gui, ak chu ba gui cu a cun gui ung awk ci gui.

³ Ghui khap gui la khawk gui cu ang ghit ah law püi u sei, ngami ami v an naw a cun ung sapyit tui cu awk ci gui,

⁴ ghui ni, ngui ni, kyei ni, m’sii ni, sing ni, lung ni awn ami pyan ah khanpughi gui cu m’hlüngtai ci gui.

⁵ Ang ghit ah chang ah kut cu dang law ne, mang-im paang ung ca gu lawk ci. Cun cu mei däi ah akhang nak pi ung ah kuyak ci. Ghangpughang naw cun ah ca guk ciah kut cu hmuk ci.

⁶ Ani cu a hmai ng’ham sei kyikyawk ne, am khuuk phi ng’tum ci.

⁷ Ani naw m’lau ne chang tumat am, cäbang ci gui, cee gui la kho m’khin ci gui cu khü sak gui ci. Cun gui gawk law u khäta, ghangpughang naw pyen na gui ci, “Shin ah ca guk phat hning ne, amawng pyen hning ciah chang am, bawimang suinu amvo m’sui ne, m’tam nak ah ghui äh a gawn ung m’awi ne, shin ah uknak khaw ung ak thum nak ah huham mah nak cu pek vai nei” cik ci.

⁸ Bawi ng’vai gui cu lawk ci gui, cun ung phi a u naw phi cun ah ca guk cu kä phat hning ci, amawng phi ghangpughang am kä m’thein hning ci.

⁹ Ghangpughang Belshazzar cu cäi aih ne a hmai m’kyum ne ng’haam ci, a bawi ng’vai gui phi a i ami bi vai kä hmat cii gui.

¹⁰ Ghangpughang nu naw ghangpughang la bawi ng’vai gui ah ami ng’htau cu ng’ya neta, ei awk nak ah kyong ah lut lawk ci. Ani naw, “Ghangpughang ghi ne ghing ä! Cun aih ah na m’lung kä thüi aih sä, kä cäi ä aih ä.

¹¹ Na uknak ah khaw ung chang tumat om ci, cun cu mum cha theing naw a om nak ah kyak ci nei. Na pa ghangpughang ah a kyak yah ung, cun ah chang naw, khanpughi gui ungka cüivai nak ah mäih ah kyak ciah nikiom nak, hmuhmat nak la cüivai nak gui cu m’dang ci nei. Ghangpughang Nebukhadnezzar, napa naw, cängbang ci gui, cee gui, tukaih ci gui, kho m’khin ci gui ung ang vaipi ah a tha nei.

¹² Ani ung a u ah kä bi hning bi nak hning om ci, cüivai ci, mang phlan nak hning om ci, thu yii la ak thuuk kau gui phi phlan hning ci; Cun ah kyasei Belteshazzar ah ghangpughang naw a ming a pek ah Daniela cu k’thäh ä. Ani naw shin ah mawng avan cu ning m’thein khai nei.”

Ca guk cu Daniela naw K’phlan ci

¹³ Daniela cu ang ghit ah ghangpughang ah ma ah hteh püi u sei, ghangpughang naw ani cu pyen nak ci, “Nang cu ka pa ghangpughang naw Judah khaw ah ka a law püi ah Jew chang, omtu, Daniela ma?

¹⁴ Nang cu theingcim ciah mümcha naw ning om na sei, bi nak hning, hmuhmat nak, cüivai nak, nang ung om ciah ka ng’yak ci nei.

¹⁵ Bawi ng’vai gui la cängbang ci gui cu k’thäh gui ne, shin ah ca phat ne a mawng ami na m’thein vai ah ka pyen ci, Cun ung phi ngami naw amawng kä hmu hlawt ci gui.

¹⁶ Tuhbäi, ng’thup ciah mawng gui nang naw hmu hning ne, thuuk kau ci gui na k’phlan hning ciah kei naw ka ng’yak ci. Nang naw shin ca cu phat hning ne a mawng na na m’thein hning ah a kyak ung, nang cu bawimang suinu amvo ning m’sui ne, m’tam nak ah ghui äh ning m’awi vai, shin ah uknak ah khaw ung ak thum nak huham mah nak phi na gah khai.

¹⁷ Daniel naw m’shang ne, “Na m’cümhnah nak gui cu na mät naw kaa ei na ä, kä cun ung tumat mat am pe en ä, Kei naw cun ah guk ah ca cu phat neta a mawng cu ka ning m’thein khai nei.

¹⁸ “Hlüngtai ciah Khanpughi naw na pa Nebukhadnezzar cu dämduh ciah ghangpughang ah pyang ne, bä khäk nak la bawimang nak cu pek ci nei.

¹⁹ Ani cu dämduh aih sei chang pakhui, chang pahta, chang nü avan naw kyihkyawk u ne, ng’hlet ci gui nei. Ani naw chang a ngawn hlü nüng ngawn ci, am ghin hlü nüng m’ghin ci, am tamkhah hlü nü m’tamkhah ci, am shuk chak hlü nü m’shuk chak ci.

²⁰ Cun ung phi ani cu chang ah ng’shei ne, am lung ling ne, m’ghämce law khäta, bawi mang kiang ungka m’hnawn u sei, m’tam nak ah hmun cu hteh tak ciah kyak ci.

²¹ Ani cu hnicim chang ungka k’äm u sei, amlung cu khisa ah mäih ah ng’lat ci. Ani cu pyama ng’sela gui awn atäng ah om ne, seipat ah mäih ah khu ei ci. Kho k’häu ung ip sei a i naw kä shung sei, k’daam naw book ci. Ak hnu ah hlüngtai ciah Khanpughi naw, hnicim chang ah uknak khaw avan shum ne, a ghü ah chang am huham pe hning ci, cicu ng’kyaa ci.

²² Cun ung phi nang, aning hta cu, cun gui avan na hmat pang ung phi, na m’lung kä na neim sak ci.

²³ Nang naw khankho Bawipa hnung tuk püi ne, ani ah Taigüim ungka khap gui la khawk gui na law püi ci. Nang, na bawi ng’vai gui, na chu gui la na chuba gui naw a cun gui ung sapyit tui aw u ne, ghui, nui, kyei, m’sii, sing la lung awn ami pyan ah khanpughi gui cu m’hlüngtai ci gui — Cun ah khanpughi gui cu a i kä hmuk ci, a i kä ng’yak ci, a i phi kä hmat ciah kyak ci. Cun ung phi nang ah na ghin nak vai la na sih nak vai, m’hnüt bäi hning ne, na bi phung shum ciah Khanpughi cu kä na m’tamkhah ci.

²⁴ Cun ah kyasei Khanpughi naw shin ah ca lung gui guk khai ah kut a tüih law ah kyak ci.

²⁵ Cun ah guk ah ca cu, “Khei, khei, khiin, m’khoicha” ciah kyak ci.

²⁶ Cun ah amawng cu; Khei, Khanpughi naw nang ah uknak gui hnüüp gui cu khei ci, ng’pyi law sak ci;

²⁷ Khiin, nang cu khiin nak ung ning khiin u sei ang htei ah na yaang aih ci;

²⁸ M’Khoicha, nang ah uknak khaw cu k’paai ne Medes la Persian gui am pek gui pyi nei” ciah kyak ci.

²⁹ Belshazzar naw a chang shäm gui cu ang ghit ah ng’thu k’bäi gui ne, Daniela am mangyih suinu amvo m’sui sak gui ne, m’tam nak ah ghui äh a gawn ung m’awi sak gui ci. Cun kawn ah ani naw uknak khaw ung, ak thum nak ah huham mah khai ah pyang ci.

³⁰ A cun ah mü ung Babilon ghangpughang Belshazzar cu ngawn ci gui;

³¹ A khokum chuk kip lei-goi lawk ciah Mede pakhui Darius naw bawimang huham cu khäm ci.